چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی پەڼجا و یەرەمە
نافیع مەزهەری شاعېر، پا بۊنۆ قەسیدێوە عالەش واتېبې، چن بەیتێش نەبۊ ویرم نەمەنېنە. جە بارەو کوردە خائینەکاوە ماچۊ:
دزی خانەگی! واجبە کوشتنت
لەبۆ عیبرەتی غەیرە، خوێن ڕشتنت
یام ماچۊ:
چ خۆشە کە یەک سانیە بیتە شێر
نەوەک دوو هەزار ساڵە بتنێنە ژێر
چ شیرینە شاعیر! کە ئەنجامی کار
لە سەر پاسی ئەو قەومە بتدەن لە دار.
تفەنگەکەم پەنج تیرێ فرە خراب بې، ئاواتەوازبېنا تفەڼگی بڕنەوم بۊن؛ بەڵام دەسم نەلې بسانووش. شېعرێم پەی حەمەڕەشیڎخانی نویستە، واتم جائیزە تفەڼگم پەنە مڎۊن؛ بەڵام کەسی هەر نەواناوە.
چا ماوەنە سەیڎ کامیل لواوە پەی ئانەی سەرو یانەی بڎۊوە جە (گەردیگلان) و من بە تەماو گېڵایۆش جە سەقز مەنانێ؛ بەڵام کە ئاڎ فرەش پەنەشی ناماوە، یانەکەم فاڕاوە پەی یانێ تەری. شەوێشا چەنی کابرێوە پېوەرە قەرارمان دا بلمېوە پەی وەڵاتی. وېرەگا سەیې نزمې بیېبېنېرەو شارەنە بەرشییەیمې. کابرا یەرې قۆمې وېش چەنیش بېنې. زوو یاوانېنە کە تووشو بەڵێوە مەبوون، ئاڎې کارشان خەڵک ڕووت کەردەیۆن. فرە بە وېپارېزی پەشتیشاوە لوېنا و تفەڼگم سەرو پەیاوەو ئاماڎەبېنا پەی هەر چېوێ. نماو نیمەشەوێ دېری دۆرو دەگاو (قارەوا) سەقزی بڕێ ڕەشەوڵاخ و هەرې بە کۊپانېوە لەوەڕیېنې. ڕەفېقەکەم چەنی قۆمەکاش دەربازەو کۊنە قاوەخانێوەشا سەرو هەرەکا وستەرەو گۊرەکې و گاوەکېشا دێ وەرو وېشاو دزیېشا. فرە دوورې نەکۆتېبېنمێ، خەڵکو دەگێ کۆتې شۊنیماو چن تفەڼگێشا تەقنێ. من کە گەرەکم بې چنگې ئا پییا خراپانا ڕزگارم بۊ، واتم شمە لۊدې من چېگە وەر جە هاوارچییەکا مەگېروون. ئۆسا لوێ و منشان جیائاست. هاوارچییەکې دمای تەقنای چن گرۊڵیێ گېڵێوە. منیچ سوار بییاو نابەڵەڎ ملم نییا. تووشو جوێ ئاوې گۆرې بییا؛ گەرەکم بې بازی بڎەو، هەیم جە ماینەکې کەرد؛ بازیشدا؛ بەڵام چېرلەمو ماینەکې (تەڼگې زینەکې) پڕچیاو کۆتا دلې هەڕو لیتەو جوەکې. هەرنۊع بی ئامانې بەر، دوورۆ چراوێوەم بەڎی کەردەو هاوارم کەرد دیاربې خەڵکې تەرې تەرسېنې، ئاخری دوې کەسې بە تفەڼگۆ ئامێ. کە زاناشا یاگې تەرسې نییەنا، من و زینەی هەڕینە و ماینەشا کېشتەو بەردانېشا پەی یانێوە، وېم شتەرە. کابرا چاییش پەی نیانې سەرو سەیانێ. کە باسو وېم پەی گېڵناوە، لاشۆ سەیر بې. ماچۊ:
- ئا ڕەفېقەتە کە نامېش حەمەکەریمی مەجیدی بې، پەی دوې قڕانا پیێوەش کوشتەن؛ چەنی تۊ نەجاتت بییەن چەنەش، ڕەنگە جە تەرسەو سەیڎ کامیلی نەیارابۊش بکشۊت و تفەڼگ و مایینەکېت بەرۊن.
زیاتەر جە سی ساڵا سەرو ئا قۊمیێرە ویەردەن، ڕوێ لوانې خزمەتو بارزانی، سۊفی عەلی نامێ فرە بە گەرمی ئەحواڵم مەپەرسې. بارزانی فەرماواش: کەیۆن هەژاری مشناسی؟ ماچۊ: قوربان چا کاتۆن کە ئاڎ هەرې دۆرو سەقزی مەدزې! ڕازەکېم پەی بارزانی گېڵناوە؛ فەرماواش: نەزانابېم هەریچت دزییەن!
کۊمەڵو (ژێ-کاف) گەرەکش بې خەڵکو شاری بتەرسنۊن؛ شەوې تەقەشان جە حاکمێ ئېرانی کەرد کە وەرنەکۆت؛ بەڵام شارش جیائاست و ڕەما. (عیسازادە) نامێ کە زەمانو پەهلەوی شەیتانی جە خەڵکی کەرې و زەبیحی و فاروقش دێ گېرتەی و خەبەرش جە من و مەلا حەمەدەمینی حەدادی دابې، دەسو دۆڵەتینە ڕەمێبېنمې و وېما شارتەبێ، بە فەرمانو حېزبی کتېبیانەکەش تاڵان کریا. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید.[1]