چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی پەڼجاهەمە
سەرنام: ماموورییەت دلې (ژێ-کاف)ینە
مانگەو چېڵکڕی بې، درەوەو یەوا دۆرو بۊکانی دەسش پەنەکەرڎەبې، حېزبو ژې کافی کیاستش شۊنیم، لوانې پەی سابڵاخی، چەنی میرزا قاسمی قادری و زەبیحی کە بییەیمې بە یەرې کەسې، واتشان مەبۊ بلدې پەی (دزەی مەرگەوەڕ) چەنی کیانیاکاو حیزبو هیوای کوردەسانو ئېراقی واتە و واچ بکەردې و هەر قەرارێ شمە بڎەیدېش ئېمە پەنەش ڕازیېنمې. بە سواری ترومبیلی ڕوەو ورمێ کۆتیمې ڕا، کە چاگۆ ئەسپ و عەرەبانە هەن مەبەرۊما پەی مەرگەوەڕی. یاوایمې دەگاو (باڵانیش)، جەنگ و هەرێوە بې تووتە ساحېبو وېش نەشناسې. زێڕۆ ئاغای هەرکی چەنی دۆڵەتی گژیێبېنې. پۊستو ئەمنیەی سۊتەبې؛ هەشت کەلاکې ئېژیێبېنېرە. هەر کوردې بېنې و جە ورمێ ڕەمێبېنې و ئامێبېنې. بە پەلە ترومبیلمان جیائاست و ڕوەو کەش لوایمې. لوایمې دەگاو (کوکێ) کە یانە زیڕۆش چەنەبې؛ بە نیازو مېمانی لوایمې، کابرێوە گەرمیانی کە کۊنە ئاشناو زەبیحی بې وەربەرەنە گېڵنایمېشۆ، ماچۊ: زێڕۆ دژمەنو شېخ عەبدوڵڵای دزەیین. چانېشانە ڕووتېتا بکەرۊوە؛ چوونکی ملدې یانەو ئاڎی. چاگەیچ بېدەنگ وېمان ڕزگار کەردو لوایمې دەگاو (قاسملوو)ی، دۊڵەو قاسملۊی بنارو کەشو دمدمی؛ کە ئیسەیچ شۊنەوارو خانو لەپزێڕینیش چەنە دیارەن. شەوې یانەو مسەفاغا نامێ مېمانې بېنمې. کابرا نیازش بې ڕووتېما بکەرۊوە؛ بەڵام کە زاناش دەمانچەمان پەنەن وازش ئارد. سەحەر وڵاخما جە سۊفی شېرە نامێ بە کرې گېرت و لوایمې دۊڵەو دزەی. پەی نیمەڕۊی لاو عەبدولقادری کوڕو شېخ عەبدوڵڵای جە (گردوان) بېنمې و وېرەگا لوایمې پەی سیاوماڵو یانەو شېخی جە دزە.
کیانیاکانو هیوای: (شېخ عوبەیدیڵڵای زینوێ)، (سەیڎ عەزیزی شەمزینی) کە ئەفسەرێ عېراقی بې، (سەعیدی کانی مارانی) نامێچ، کە تازە لاوێ و کوڕەزاو شېخ عوبەیدوڵڵای بې، چەنیشان ئامابې. چڼین جارې پېوەرە نیشتېمېرەو سەرو دواڼزە خاڵا ڕېکېکۆتیمې کە هەر دوە حیزبەکە پېوەرە هامکاری بکەران و مەعلوومات بفاڕاوە. جا چوونکەتی ئەچا یاگېنە کە ڕېکې کۆتیمی بنارو (داڵانپەڕ) و لێوەش شەمزینان و ئیلاش ئېران بې؛ نامېمان نییا (پێمانو یەرە سنووری). بڕیار دریا هەر دوەلا هەریۊ لاو وېشۆ بەیانەکەی وەڵا بکەرۊوە، دمای حۆت شەوا جە (دزە) ڕاو (شنۆیرە) گېڵایمێ. جە شنۆوە بە پێ ئامایمې نەغەدە و جە نەغەدەیچۆ بە سواری ترومبیلێ سینمایی ئینگلیسیانی، کە ئې پەی سابڵاخی، ئامایمێ. ئېمە دەس بە جا نوسخە بەیانو وېمان دلې نیشتیمانینە چاپ کەرد. هەڵای وەڵامان نەکەرڎەبێ، هەواڵشا دایمې کە حېزبو هیوای پا ڕېککۆتەیە ڕازی نەبییەن و چاپش مەکەردې. ڕووپەلە چاپکریاکەو ڕېککۆتەکەیمان دلې گۊڤارەکېنە دڕی.
وەشی ئانەبې کە دلې خاڵێ ڕېککۆتەکەینە واچې: (گەر ئینگلیسەکې جە ئېراقەنە بەشێ بدان بە کورڎی، مەشۊم کوردەکانو بەرو ئېراقی، یانی پارچەکانو تەریچ بگېرۊوە، نمەبۊن جیاشان بکەراوە؛ چوونکوم کوردەسان یەکپارچەن. با بواچان ئېمە بەشەو کورڎی بە هەق مەزانمې و بەپاو تەوانای یاردی گرڎ کوردێ مڎەیمې. کە ئېمەیچ چەنی ڕووسانی هەر ئا حۆلەیە مڎەیمې و موکریانی جە کوردو تورکیا و ئېراقی بە جییا نمەزانمې).
حېزبو هیوای کە بە سەرداری مامۊسا ڕەفیق حیلمی بې، بە مەسڵەحەتش نەزانابې کە هیچ نامێ جە ڕووسی و کوردو ئېرانی و تورکیەی ببۊن، واتا نەیانه دلې باسی. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید.[1]
کوردیپێدیا بەرپرس نییە لە ناوەڕۆکی ئەم تۆمارە و خاوەنەکەی لێی بەرپرسیارە. کوردیپێدیا بە مەبەستی ئەرشیڤکردن تۆماری کردووە.
ئەم بابەتە بەزمانی (هەورامی) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
ئەم بابەتە 16 جار بینراوە
ڕای خۆت دەربارەی ئەم بابەتە بنووسە!