چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی چل و حۆتەمە
یاڼزە کەسې دلې باخو (سیسەی سابڵاخ) چەنی میرحاجی مەنیشتېرە. سەرو مۊچیاری ئاڎی، حېزبو (ژێ-کاف) مەمەرزنارە؛ هەر ئەچاگەیچ قەسەمنامەکەیش مەنوساوە. پڕوگرامو حېزبو هیوای بە کوچێ دەسکارییۆ، مەکەران بە پڕۆگرامو (ژێ-کاف). حسێن فروهەر، زەبیحی، تەوحیدی مەلانەجمە، ئیمامی، محەممەڎی نانەوا، قادری مودەرڕیسی، محەممەڎی یاهوو، شاپەسەڼی، محەممەڎی سەلیمی، قاسم قادری و خاڵە مەلای داودی، یاڼزە کەسې بناغەنییەرې بېنې. جا کە زەبیحی منش بەردا پەی قەسەمدای، بە منۆ بییەیمې بە ویس ئەندامې. حسێن ئەندامی ژمارە یەک و زەبیحی ژمارە دوې بې و حسێن سەرۆکو کۊمەڵو (ژێ-کاف) بې.
تازە بیېبېنمې بە (ژێ-کاف)، پاسەم ویرەن یەرەمین کۊبونەوەمان بې، حسێن فرووهەر ماچۊ:
من وەرنیار مەکەروون هەژاری بەرکەرمېن، چوونکوم هیچ هەرمانێش دەسەنە نمێ.
ڕەنگەم زەردە بییە، تف دلې دەمیمەنە وشک بی، بە نووزێوە واتم:
نا توخوڎا بەرم نمەکەردې! هەرمانەم پەنە بسپاردې. ئاخر من یانەم ئینا لاڎەگانەو شمەیچ تاکو ئیسە لاڎەگانە هەرمانەتان نەکەردېنە.
هەڵسیم مجیێرە... بەزەییشان ئامانێ پۊرەو واتشان قەیڎ نمەکەروون؛ ڕاسەن فرە دەسەوسانەنی، بەڵام هەر دلې کۊمەڵینە مەنۆ!
بە درېژایی تەمەنیم، کە ئیسە پلې حۆتەمە و ئینانا شەسس و یەرە ساڵی ژیوایمەنەحېزبې فرېم جە نزیکۆ دیڎېنې؛ باسو ڕەفتار و ویەردەو فرېشانم وانانۆ. فرە زامەتەن هیچ کۊمەڵێ پېسە ئەندامانو (ژێ-کاف) ئەپاسە فیداکارې و دڵگەرمې و یۊ وەشەویسې بیېبان. جە بارەو یاوەرانو پېخامئاوەری فرە باسو یەکدڵی و فیداکاری هەن، وەختەن بواچوو ئەندامانو ئا حېزبەیە چېوێ چامنې بېنې. وېدزیۆ جە فەرمانی، دروې، وېوازی و فېڵبازی بە جارێ تەرې و غاییبې بېنې؛ ماڵو دنیێ ئا کاتە وەشبې کە پەنەوازییەکانو کۊمەڵەیش پەنە ڕەخسیې.
جارێشا جە (تەرەغۆ) ئامانې پەی شاری، ویس تمەنېم پاشەکۆت کەرڎەبې کە جلې پەی زاروڵڵا بسانو و نەخوازە کە دیڎم واڵەکېم کەواکەش پینە کەرڎەبې، فرە دڵتەڼگش کەردا. هەرکە یاوانې شار، وېرەگا بې. لوېنا پەی قاوەخانێ وەر دەرەی کە یاوەرەکام بوینو. سەرو پردەو (داوێنی چۆم) تووشو یۊیشان ئامانې؛ ماچۊ: فڵانی تۊ پووڵت نییەن؟ بڕێ پووڵمان پەنە لازمەن گەرەکمانەن گلېرش بکەرمېوە. دەم و دەس ویس تمەنەکەم پەنەداو هەر ئەچاگۆ گېڵانێ و شارم جیائاست و یاوانێ یانە؛ چوونکوم مەخارجو شەوێم پەی وېم نەگېڵناوە. کە ئامانێ واڵەکېم پەرساش:
جلېت ئەسێ؟
واتم: داخەم، تووشو قومارێ بییاو گرڎو پوولەکەیم دۊڕنا.
ماچۊ: مزانو نەدۊڕنانت؛ بەڵام خەم نمەوەرە! ئېمە هەرنۊعێ بۊ گوزەرنمېش.
هەرچن بە زوویی فرې بیېبېنمې و ئەندامەکېما جە سەڎ و دوەسەڎی ترازیێبېنې، بەڵام گرڎمان ڕووتې و نەڎارې بېنمې و پووڵما پەنە هۊرنەسووڕیې کە بانگەوازی حېزبیش پەنە بکەرمېن. گەرەکمان بې گۊڤارێ بەربشنمېن بە نامې (نیشتیمان)، . حیسابمان پەی کەرڎەبې بەرش نارې. یۊما لوابې بە نامې وېشۆ سەڎ و پەنجا تمەنېش جە حاجیێ قەرز کەرڎەبې کە بە مانگێ بڎۊشۆ. زەبیحی کە مەشیێ بە هەرمانەو گۊۋارەکەیرە بیاوێ و بڕەمێ و کەسیچ پەنەش نەزانێ، لوابې چەنی خەلیفەگەرو ئەرمەنیا جە تەورېز ڕېککۆتەبې کە دلې چاپخانەو کلیسای پەیش چاپ بکەرۊن. چا مانگېنە گۊڤارەکې دماکۆتە. کابرای حاجی قەرزو وېش گەرەکشەن و مەشۊم ئیجازەش چەنە بوازان. ئاخری حاجی واچې: ئا قەرزە پېسە قەرزی تەری نمەشۊ، بابە هەر پەنەم بواچە پەی چېشی چەنەتان قەرز کەرڎەنا گەرەکم نییەن بڎەیدېمۆ! ئاخری گۊڤارە بەرکۆتە و فرە زوو وەڵاکریاوە، دەسمایې ژمارەی دوەمېش قازاڼج کەرد و ئیتر نەپڕچیا و فرە دەنگېش دێوە. تەنانەت ڕۊنامەکې لاو سەری ئېرانیچ کۆتېبېنې باسکەرڎەیش. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید.[1]