چاشتەو خاڎمی
هورئەوەگېڵنای و ئاماڎەکەرڎەی: #ئەسعەد ڕەشید#
بەشەی چواردەهەمە
گەمەو شەوا، ئانې کە ویرم مەنېبا: مەڵڵا تەقتەقانی، هەری سوری پرچ درېژ، کڵاوانی، هەی جۊ، چەمەشارکې. چوونکوم ئەڎام بە نەوەشی سیلی مەردېبې تەرسەو ئانەی بې کە منیچ گېرتەبۊم، مەشیێ هەتاکو پەیم لېویێ دلې هەوای سافینە ژیوێنا، لایێ تەریچۆ تاتەم حەزکەرې کوڕەکەش خڎې نەگېرو بە ژیوای شاری و ناسکی و خاوی و خلیچکیۆ، بەڵکوم گەرەکشبې ژیوایێ زبر و ناڕەحەت بژیوۊ، گرڎ وەهار و هامنێ کیانېم پەی لاڎەگای، یام لوېنا پەی هەوارو مامۊ سەیڎی، کە سەی محەمەڎی لاجانیش نامبې، من پەنەش واچېنا ماۊ سەیېڎ، یام دلې دەگاو (سەرەوانان) یانەو لالوام ژیوېنا. جە ڕاسینە ژیوای زارڵەیی دلې لاڎەگاینە هیچ ژیوایێ شارەسانیش نمەیاوۊ پەنە، پېسەنە پاڎشای، هەر ڕۊ بیێوە دەشت و دەرەرە بەرەڵڵێ بېنمۍ، هېلیانەو مەلا ئېزېنمێ، دامەشا پەی نیېنمێ، هېڵېشا چەنە دزېنمې، ئېنجا لوە دلې باخ و بېسانا، هوروەزە دار و درەختەرە، خۊ وېرەگا هەر باسش نمەکریۊ، دەمژمارێ ڕۊ مەنۊ بزیەرەو سوارو هەرێ بې کۊپانی بە، ڕوەو یانە غار مڎۊ، جووتلې مەشانۊ، ئازابەو وېت بگېرەو نەگنیرە، ڕەنگە زیاتەر جە ویس جارا ئەچا گاڵتەو گەمە وەشەنە سەرەم مەڕیابۊ، بەڵام سەرەمەڕیای جە ڕاو هەر غارداینە خەڵاتەن. جە لالۊزایەکامەنە دوې لالۊزێ هامتەمەنېم بېنې، حەمەڎ ئەمین و مامۊ ڕەحمان کە چەنی ئاڎیشا فرە کەیفم ساز بې، حەزکەرېنې هەریاگێ فرە بەرزەن بلوو سەرش پەی ئانەی بزانو چۆڎیم چېش هەن. فرەو جاری بە تەنیا ملو ڕێ گېرېناوەرو کەشەرە هوروەزېنا، جارێ چا جارا کە گەرەکمبې بلو سەرو کەشێ فرەم پۆ شییەبې، یانەو مامۊ سەیڎی ئەجیابېشا ماری گەستەنا، بییەبې بە هەراو هاوارو چن کەسێشا کیاستېبېنې شۊنیمەرە کە بېزامۆ، بەڵام ئاڎې چەنەم نائومېڎې بیېبېنې و پەی وېم ئامابېناوە. چەنی شوانەکەو یانەو مامۊ سەیڎی لوېنې گەلو گەلەی، نامې گژ و گیواویش چەنە پەرسېنې، ڕازې وەشېش چەنە ئەژنەوېنې، شارەزایی جە حەیوانا، پېسە پسپۆڕێم پەنەئامابې و شوانەکە ئافەریمم چەنەکەرې، نان و شۊتشا چەنی وەرېنا و سەرو زەمینیۆ وسېناو ژیوای شاریم ویر شییەبێ. پاسەدیارەن بەشو لوای مەکتەبیم سەرشییەبې، بەردانېشا پەی حوجرەو مزگی هەباسئاوای، پەی ئانەی ببوون بە فەقی، منشان بە مامۊساکەی ئەسپارانې،
پیێوە باڵابەرزی ڕیش پانی چەم زاقی لووت بەرانی بې، بە مەڵڵا سەعیدە شېتە مەشهووربې، یۊ تەریچ لاو ئاڎیۆ وانې، خڕەلێوە چەم زەردی گۊش قوت بە نامې فەقی باییز. وەر جە گرڎ چېوێ فېرشان کەردان کە چەنی وېرەگانە یانارە بگېڵو و هاوار بکەرو: نانو فەقییا، ڕەحمەتو خوڎایتا وەنەبۊ، کۊشبکەروەو بارووشۆ پەی حوجرەی، دمای شەرم کەرڎەی و میڼگەمیڼگی پا سنعاتە وەشەیە ئامانېرە. ئەچاگە بڕیار دریا دەرسو گوڵستانی سەعدی بوانو، ئینجا دماتەر بگېڵوەو بە واتاوە پەنەم بواچان، قورئان واناکەیچم ئانە یاگې وېش، مەشیێ هەر خەتمش بکەرو و فرەیچم ڕەوان بۊن، مەڵڵا سەعیڎ هەر عەرەبی دلۍ کتېبی زانې، تەنانەت نەتاوې نامې وېش بە ڕەوانی بنویسۊ، مەشق و خەت و فارسی ملو فەقی باییزی بې. ڕوێشا پېسە بەڵای ناگەهانی زاروڵێشا ئارد پەی حوجرەی کە بە تەمەن جە من گۆرەتەرو وەشپەنەکۆتەتەر بې، کوڵەباڵاتەر، سورێوە چەم زیت، وەنەم بی بە ئیزرائیل، مەشیێ ئاڎیچ گوڵستانش بوانێ، هەتیم ئڼە زیرەک بې نەبۊوە، من بە هەزار حاڵې دوې خەتې ڕەوان کەرېنا، ئاڎ پەلێ و دوې پەلې ڕەوان کەرې، پېسەبې ئاییرو قۊرەتی، جا بۊ زللې و چەپۊکی بوەرە، ئاڎ ئڼەو ئڼەش ڕەوان کەرڎەن و تۊ هەر منجە منجت بۊ، وەرو وېمەرە لاڵیېناوە خوڎای ئا بەڎفەڕە مەردێ و من ڕزگارم بیێ، نامېش عەبدولڕەحمان کوڕو سۊفی مینەی بې. بەشێ جە کتېبو چێشتی مجێور، نویستەی هەژار موکریانی، هورئەوەگېڵنای پەی سەرو زوانی هۆرامی: ئەسعەد ڕەشید.[1]