کورد دلې چەرخەکا تاریخینە
هۊرئەوەگېڵنای و ئاماڎەکەرڎەی: ئەسعەد ڕەشید
بەشەی: چوارسەڎ و شاڼزەهەمە
* ئەچی ساڵېنە (18) زانکۋې دلې تورکیاینە بیېنې، کە تەنیا یۊشا جە ئەرزەڕۊم بییەن و جە دیاربەکریچ چن کۊلیژێ بیېنې.
* کۊچی دمایینو تاریخنویس محەمەڎ مەردۊخی کورڎەسانی جە شارو سنەی.
* کۊچی دمایینو (محەی سالە سوور)، نامبریا پېشمەرگێوە ئازا سوپاکې شېخ مەحمووڎی بې.
* کۊچی دمایینو (خدر ئەحمەد دزەیی)، کە چن ساڵێ کیانیاو هۆلېری بې دلې ئەنجومەنو ئېراقینە.
* دمای هەرەسەو شۆڕشو کورڎی، ژمارەو ئەنداما کۊمەڵەو ڕەنجدەرا کورڎەسانی دلې شارو هۆلېرینە یاوێ (30 _ 40) کەسې، کە ئینې نامې چن کەسێشانە: ڕێباز، تەلعەت خدر، محەمەد عوسمان، کانەبی عوسمان، هادی _ کرېکار دلې کارخانەو جگەرانە، مام بارام، شەیڎ حەیدەر جوکل، شەهیڎ عەلی ساڵح، شەهیڎ مەولود حەمزە، شەهیڎ محەمەد عەجەم، شەهیڎ محەمەڎ زەنگەنە، شەهیڎ عەبدولڕەزاق _ وەرپەرسو هۆلېری ئەندامو ڕاوەبەری کۊمەڵەی، شەهیڎ محەمەڎ جەمیل قەشقە، شەهیڎ سەعدی خەلیل، شەهیڎ نادر قەشقە، شەهیڎ جەمیل ڕەنجبەر، شەهیڎ عوسمان گچکە، کۆسرەت ڕەسوول، شاخەوان، فەیزوڵڵا، قاسم عەزیز، سەفین، تەحسین کاوانی، مامۊسا بەکر، مەلا غەفوور، فاروق عەلی مەولود، یوسف بەحرکە، مەلا سڵېمان، مەجید عەبدوڵڵا دەروېش، ڕزگار زاهېر، حەمید کەریم، وریا حەوێز جوکل، ڕەسوول مەحمووڎ _ هەوراز، عەبدوڵڵا تۆفېق.
* بەپاو ڕاپورتێ کۊمەڵەو پەشتگیری گەلە چۆسیاکا جە ئەڵمانیاو کۊمەڵەو مافو مروڤی جە هۆڵەندا، ژمارەو ئا کوردا کە دمای هەرەسې جە پانیشتو کورڎەسانیۆ فاڕیێنێ پەی پانیشتو ئېڕاقی (200) هەزار کەسې بیېنې و (116) دەگێچ کاولې کریێنې و (25) ویس و پەنج هەزار کوردې ئیزیدیې جە شەنگال فاڕێنێ پەی یاگا تەری.
* پیلانەو پارتو توودەی ئېرانی پەی هوروەشنایۆ حېزبو دیموکراتو کوردەسانو ئېرانی.
* بەپاو ئامارو ئی ساڵې، ژمارەو کورڎی جە سەرنیشت (7,5) ملیۊنې و جە پانیشت (2,5) ملیۊنې و جە وەرکۆت (3,53) ملیۊنې و جە وەرنیشت (600) هەزارې بیېنې.
* دوەبەرەیی میانو هەر دوە خېڵو خۆرمەک و جبران جە سەرنیشتو کورڎەسانی.
* نماییشکەرڎەی شانۊگەری (تروسکەو هیوای) کە باسو هەرەسەو شۆڕشو ئەیلوولې کەرې جە سلېمانی، جە نویستەی سالار عومەر قەراخی.
* نماییشکەرڎەی شانۊیی (چایخانەو وانکارا) بە بەشداری ئەکتەرا تیپو نمانای لاوا جە سلېمانی و بەرئاردەیش سالار عومەر قەراخی.
* تیپو ئەرمانای لاوا جە سلېمانی شانۊیی (ئافاتو تاعوونی) کە جە بەرئاردەی سالار عومەر قەراخی بې، نماییش کریا.
* تاریخو (#03-01-1975#ز.) کۊچی دمایینو (سدېق شاوەیس)ی.
* تاریخو (#15-01-1975#ز.) داگیرکاری ئېراقی داواش جە حېزبو دیموکراتو کوردەسانو ئېرانی کەرد کە یام مەشۊم بە خرابە سەرو مستەفا بارزانی بنویساو بە پیاو ئەمەریکایش بزانان، یام مەشۊم ڕۊنامەکەیشان جە ئېراق چاپ نەکەران، ئاڎیچې ئینەو دوەمیشان هورچنی و ڕۊنامەکەشان وزیارە.
* مانگەو (02) ئی ساڵې، دارا تۆفېق ماچۊ: بودجەو شۊڕشی (50) پەنجا ملیۊن دیناری ئېراقییەن.
* مانگەو (02) ئی ساڵې، حکومەتو ئېرانی گوردانێ تۊپخانەیش ئارد نزیکو بارەگاو بارزای، کە (12) تۊپې 155ملم و (200) سەربازې ئېرانیېش چەنەبېنې.
* تاریخو (#06-02-1975#ز.) ئامای کوردئەشناسی هوڵەندی (مارتین فان برونەسن) پەی پانیشتو کورڎەسانی.
* تاریخو (#20-02-1975#ز.) باڵیوزو میسری جە بێرووت، بە بەرزانیش یاونا کە سەرۊک ئەنوەر سادات گەرەکشەن چەمش بگنۊ پەنەش.
* تاریخو (#26-02-1975#ز.) بارزانی لوا پەی تارانی، بەڵام دمای بەرکۆتەی ڕېککۆتەی میانو ئېران و ئېراقی، بە نائومېڎی گېڵاوە پەی کورڎەسانی.
* تاریخو (#28-02-1975#ز.) سامی عەبدولڕەحمان لوا پەی قاهېرەی و جیاتی بارزانی چەمش کۆت بە سەرۊک ئەنوەر ساداتی. سامی عەبدولڕەحمانش یاونانە کە ڕېککۆتێوە میانو ئېران و ئېراقی جە جەزائیر، ئینا مێڎانەنە.
بەشێ جە کتېبو هاوڕێنامەی، نویستەی هاوڕێ باخەوان، هۊرگېڵنای پەی سەرو زوانی هۆرامی: ئەسعەد ڕەشید.[1]