چن شەوێ چەنی مارسێل پروستی
بەشەی ششەمە
وەر جە گرڎینە چەمانو وېش لەعنەت مەکەرې، وە ڕەنگا وەر جە ئادیشان حەزی غەرەز هۊرخېزنەریش بە خەڕاتی و سەرەنجدەریش، کە چەمېش چوون گوڵ تنگنای بېنېشوە تاکو ئا جوانی هۆربنیۆ و وەسوەسەش بکەرۊ، ئەجا ئادەش جە وەرانوەرو دیایەکانو لالئاندیوە قەرار دای بې، دیایانېوی جار دڵنیا و چەنیو شیرینیێوی وەرنەگیریاتەر جە چەنەو مورفینی. خیاڵو وێچش لەعنەتش مەکەرد؛ خیاڵش بە ئەچانە موحێبەتێو ئەشقش پەروەرنابېش جار جارێو بە وېش مەواتش نەکای هەر ئی خیاڵە ئادش زا بۊ، زاڕوێو کە ئیتر زاڵ مەبێ ملو ئەدایشەرە و ئازارەش مەدێ. ناسک ویریو وێچش لەعنەتش مەکەرد، کە ئەپا سەلێقە و زانشتوە، ئەپاسە بە وەشی ( وە خرابی) ئا گرڎو ڕازێشە دلېو زەینو ئاڎېنە پەی ئەوەوینایو لالئاندی لکنای بې یۆرە کە مەحاڵی دڵ سەردوە کەرشان گاهەز فرەتەر جە وەرتەری ئادەش بە قارەمانو ئا ڕازانە دڵبەسێ کەرڎە - وە دڵ پاکی و ناسک ویریش، ئەر وېش گیرۆدەو ئا ئەشقی مەکەرد بە پەشیمانی و خەجاڵەتیو ئەشقی گوناباریش سەرمەسیش مەتلنێنێ زەهروە ، وە ئیرادەش کە چە سڵەما و گۊش نەدا و فرز بې جە وېیەردەی جە پەنگیاکاڼە ئا کاتە هەوەسەکېش ئاڎې ڕوەو غەیرەزمومکېنی مەکېشنێنێ، وە چە سیس و لات و دلېنە وڕیا نە تەنیا ئاکاتە کە مەشیەم ناگۊشگیریش کەرڎەی، کە هەرپاسە زەمانێو ئێحساسانېوتەر ئادەش مەکېشنا شۊنۊ وېشەرە. ویریچش لەعنەتش مەکەرد، ویر جە مەلەکوتیتەرین شێوەکانش، بەرەکەتێوی گۆرە کە یاوابێ ئاڎېچێ و بې زانای نامې هەقەتینېش هەر نامۊەمان دان پەنە: ئلهامو شاعری، جەزبەو عارفی، فامایو قوڵاییو تەبێعەتی و موسیقی... ویرێو کە ئەشقش چەنیو نوکو قڵاوەکان، چەنیو ئفۆقە نادیارەکان دابېش گژێشانهۆرە، ئاڎېش جە ڕۊشناییو فەرا تەبێعیو ئەفسونیش نقمێ کەرڎې و جە دەسەوامەنە کوچېو جە ئەفسونیش دابېش بە ئەشقی، ویرێو کە بەرزتەرین و شاریاوەتەرین ژیوای دلېنینو ئاڎېش یەکسەرە چەنیو ئی ئەشقی هامڕێ و دڵ بەسە و کەرڎەبېش یۆ، گرانتەرین گەوهەرەکېو دڵ و ڕەوانیش ئەپاسە کە خەزێنە کلیسایەکېو وەقفو مریەمێ عوزرای متێ بېنېش پاو ئا ئەشقی، دڵش کە فڕانسوازە دنگو ناڵە ناڵیش جە شەونشینیەکان یا جە دەریانە مەژنەوێ کە ماتەمینیش ئیتر چەنیو ماتەمینیو هجرانو ئادی بییەبێ هەمزاد: ئی حسە ئەوەنەواچیەیاو ڕەمزو چېوانشە لەعنەت مەکەرد کە زەینو بەشەری دلېو برۆقەو زەریفیەکاڼە ئەپاسە مەحف مەکەرۊ کە شاریاوەییو ڕۆجیاری وېرەگانەی جە دەریانە، لەعنەتش مەکەرد چوونکای ئەشقش چەقنابېشەرە، جە ئاڵەمو مادەی زنیەبېشەرە، دەرەتانش دابێ، بې بنش کەرڎەبێ بې ئانەیە جە ئازارێش کەم بکەرۊوە، ( ئەپاسە کە بودلېر چەبارەو ئاخرەکانو دمانیمەڕۊو پاییزیوە واتەنش) حێسانېو هەنې نادیاری و نەژناسیایی جە قوڵاییشان کەم نمەکەرۊوە، وە تیرێوە تێژتەرە جە تیرەو بې نەهایەتی نیەنە.
هورئەوەگېڵنای: مەحمووڎ قادری.[1]