چن شەوێ چەنی مارسێل پروستی
بەشەی یەرەمە
فڕانسوازە ئیتر هیچکام جە بەرنامەکانو ئوپرایش نەوینا ناستوە، بە ئومیدېوی وەشباۋەڕییوە گرڎو ئا خوڵکانە پەی شامی جە ئاڎې مەکریێنێ قەبوڵێش کەرڎې. پانزە ڕوێ ویەرد، هېمای دو لالئاندش نەدیە بې و شەوېنە بە ویرو ئینەیوە جە چە ڕایانېوە ئادی بوینۆ جە وەرمی هۆرمەئێستەوە.ئەر چېش داییمە و دەرە وەرو وېشەرە مەواتش ئاد پیایێوی وەش پەنە کەوتە نیەن و تاقەتو بەشەری سەرمەبەرۆ، فرەتەر جە ڕۊشن ویران و جەزابتەرین پیایان ویرش شۊنیشەوە بې. بە تەمامیایو وەرزێ، ئیتر فورسەتێو پەی وینای دوبارەیش نمەئاما وەروە، وە فڕانسوازە لێرە سەختە بې ئەچینە فورسەتێوی باوەرۆ وەروە و کۊشش مەکەرد.
شەوېوە بە ژنەویوێ واتش:
نەواتت ئاغایێوی بە نامۊ دو لالئاندی مەژناسی؟
ژاک دو لالئاند؟ مەژناسوش بەڵام نە ئاندە. بە هەنگەری ئەژناسیایمێ، وەلێ هیچ کات کارتېوش نەنیارە پەیم، هیچ پێوەندېوم نییەن چەنیش.
هەقێقەت ئینەن بۊنەو هەرمانېوی وردیوە، یا ڕەنگا گۆرەیچوە، مەشۆم چەنیش ئاشنا ببونە و بوینوش. هەرمانېوەن بە وېم ڕەبتېوش نیەن و دەسەکەم تاکو مانگێو ئیجازەم نېیەن چەنیو تۊ بوزونەش وەرو باسی ( تاکو مانگێو چەنیو دو لالئاندی دروېوەش مەپېچنا یۆرە تاکو ڕازەکېش نەگنۊوە سارا، وە ئی ویرو بییەیو ڕازێوی کە تەنیا ئا دوە ئاگاهێ ببان چەنەش پەیش شیرین بې). تەمەنا مەکەرو ڕایېوە پەی وینایش بیۆزەوە چوونکای وەرزە تەمامیاینە، ئیتر هیچ مێمانیێو و جەژنېوە نېیەنە و ئیتر نمەتاو چەنیش ئاشنا ببو.
ڕا و ڕەسمو زەریفو دۆسی، کە ئەر ڕاسانە ببۆ دڵی سەفا مەدۊ، هەم ژنەویوێ و هەمیچ فڕانسوازێ جە سەرەکېشانېوی بەری مەکەرې کە فرەو ئەشرافەکان چەنەشان لەزەتێوی شەرم ئاوەر مەبەرێنێ.ئەچی ڕوەوە ژنەویوە، بې ئانەیە حەتا یەک سات نیەت و خېزیای و حەتا ویرو ئینەیشە ببۆ جە ڕەفېقەکېش سوالێوە بپەرسۆ، بە گېیان و دڵ کەوتە وشکنای و تەنیا دڵوەرە بې جە ئینەی ئەپاسە کە مەگېڵێ نمەیۆستشوە.
حەیف مادام ئا لوای بې. ئاغای دو گروملویچ هەن، بەڵام نمەتاۋۊ هەرمانېو بکەرۊ، ئاخور بەشەر چېش بواچۆ پەنەش؟ ئەها، ویرێو یاوا نەزەرەم! دولالئاند ویۊلۆنسێلە مەدۊ وەنە، خرابیچ مەدۊ وەنە، وەلێ موهێم نېیەن. دو گروملو فرە وەشش مەینە چەنەش، شۊنیچشەرە بەشەرێوی خنگەن و فرە وەشحاڵ مەبۊ جە ئینەی کە خزمەتێو بکەرۊ بە ئەتۆ. بەڵام تۊ تاکو ئیسە چەنەش بەینت گېرتە بې و جە لایېوتەروە وەشت نمەینە بەشەرانێو کە خزمەتشان کەرڎەن پەنەت بنیەی قەراخوە، سا ڕەنگا دڵت نەوازۆ ساڵېوتەر مەجبورە ببی ئادیچی خوڵکە بکەری پەی یانەیت.
بەڵام فڕانسوازە، هۆرئاما جە وەشحاڵی، بە هەیەجانوە واتش:
چە هەمیەتېوش هەن. ئەر پەنەواز ببۆ گرڎو نەو کیسەکانو پاریسیچ خوڵکە مەکەرو. بجمەوە ژنەویوە وەشڵەکېم، چەندە عالەنی!
وە ژنەویوە نویستش:
دماو سڵامی، هاگاتان هەنە من جە هەر فورسەتێوی ئیستیفادە مەکەرو هەتا ڕەفېقەکېم خاتو دوبریوێ وەشحاڵە بکەرو کە بې شک چەنیش ئاشناییتان هەن. ئی ڕەفېقێو ئەمنە چڼینکەڕەتێ جە ئا باسانە چەبارەو ویۊلۆنسێڵېوە بییێنێمان دڵوەریش نمانان کە هیچ کات نەوازەندەییو دۆسی نزیکو جەنابیتان، ئاغای دولالئاندیش نەژنەفتەن. ئایا مومکێنەن جە شمە داوا بکەرو تەرتیبو جەلەسێوی چەنیشان پەی من و ڕەفېقەکېم بدەیدێ؟ ئەچی ڕواڼە کە ئازادێنمێ، ڕەنگا ئاندە زەحمەتېوش نەبۊ پەیتان و لوتفېوی گۆرەن دەرهەقو ئېمەنە.
وەر وەرتەر جە مەرحەمەتو شمە سپاس گوزارێنمێ
ئالریوور بوییور
فڕانسوازە بە نۆکەرېوی واتش: ئی نامې گورج بېیاونە یانەو ئاغای دو گروملوی، ماتڵو جوابی نەمانی، بەڵام بواچە نامەکې حزورو وېتاڼە بېیاونان دەسشان.
سەوایو ئا ڕۊیە ژنەویوە ئی جوابو ئاغای دو گروملویشە یاونا بە خاتو دوبریوێ:
دماو سڵامی، فرەتەر جە حەدو تەسەوۆڕو شمە وەشحاڵ مەبېیانی ئەر مەتاواینەم بە دڵوازو شمە و خاتو دوبریوێ جلێو عەمەڵی بپۊشو، ئێدێ کەمېو مەژناسو و دوراودور پەنەشان فرە ئیرادەتم هەن. هەر ئەپی بۊنۆ بە کەماڵو دڵوەریوە بە ئەرزتان مەیاونو جە بەختەی خرابە هەنە ئاغای دولالئاند هەر ئی دوە ڕوە وەرینە سەفەرش کەرد پەی بېیاریتزی و ناوەشانە چڼینمانگێ ئەچاگەنە مەمانۆوە.
بە ئەوپەڕو ئیحترامی...
گروملو
فڕانسوازە ڕەنگ پڕا ڕەما ڕو بە بەرەکەی تاکو بژەنۊش، وەلێ قولینەو گرەوای ناستەوە ڕەدێ و هەرسی جە چەمەکانشەرە مجېیاتیرە.
هورئەوەگېڵنای: مەحمووڎ قادری.[1]