وېش مەی
بەشو نۊزڎەهۆمی
ڕاو ڕەسموو هێجوی کەرڎەی سەرد و سڕ لوا ڕاوە. قسێ مەسخەرێ، یەک کەڕەت چەمم کەوتەبێ پا کوڕیە سەعید نمەزانو پەی چێ دابېش مەژگم چەنی پەیمانی لەیەکش دێناوە؟! خوڎاو پەیمانی چکۆ و ئێڎ چکۆ؟!
ئاڎیچ جار جار وردوە بې، بەڵام منیچ پەشتەو چەمام ناسکوە کەرېنا پەیش. دلې دڵوو وېمەنە واچېنا چن ڕوودارەن چەنی چەمېم چەنە نمەبڕۊ؟! حەساوی دەسو ئەڎایموە تووڕێ بېنې. چی بەینە کتووپڕ بابەو سەعیدی واتش: کناچەکېم سەعید هیچ کېشېوەش نییەن چەنی ئەڎا گەورێت پێوەرە بژیودێ. ژنەوتەنم شەرتەو تۊ فەقەت ئانێنە. وەی یا ئەڵڵا ئاڎ ئێتر چېشش وات؟!!!
ئەرې ڕوڵە گیان گۆرەتەریە پاڵیچتانە بۊ وەشتەرەن خاستەر ڕا مەوردێ سەرو ژیوای وېتا و مەمەرزیێدێرە ئیشەڵڵا... سەرەنجوو ئەڎایم دام فرە وەشحاڵ دیارە بې. دلې دڵوو وېشەنە خەراور خەراور قەڼ کەرې ئاوی پا قسانە. گۆناحێوەیچش نەبې فەقیرێ. حەز کەرې هەم من سامانە گېرو و هەمیچ وېش دوورە نەگنۊوە چەنەم. چەمې کوڕەی واقێ بییێبېنې ملو منەرە. یا ئەڵڵا نەزانېنا پەی چێ ئەسڵەن دڵم پەیش نەڎێنە. مەگەر نمەواچا چا کاتەنە کناچې دڵش پېسەو مرووچڵێ مەفڕیۆ؟!!! ئەی پەی چێ من ئڼە بېخیاڵە بېنا؟؟
بابەش واتش: ئاخروو قسێتا چېشەن؟ پی حەڎە ئەڎام دەم کەرۊوە و قسێ وېش کەروو عازا دام دلې قسەکاشارە و قسێم بڕیە و واتم: جارێ مۊڵەتیم گەرەکەن تاکو ۋیرش سەر کەرووە. فرە پەنەشا ناوەش بې، بەڵام هیچشا نەوات. هێجوی کەردایە مەسخەرە لوا ڕاوە. بە ئەڎا گەورێم واتم وەشم ناما چەنەش. ئینەمە وات و لوانی یانەی ئۆدیمین نیشتانیرە و گووشیەکەم کەردوە دەسم کەرد تەماشا کەرڎەو وێنە و فیلمەکاو پەیمانی. دیسان گەشە بیانیوە، بەڵام ئێتر نە زەنگم دا و نە لوانی بزانوو ئانلاینەن یام نە.
پەیمان منش ویر شیێبېنېوە. یام گاهەز چا کناچە زڵف شۆڕەو و کاڵ و کۊڵاو ئاگەیە وەشش ئاما بۊ کە بە شۊخی شۊخی باسش کەرڎې. ئێتر منی قژ سیاوش بیزیێبوو.
خێڵوو یانەو زهووری حەساوی زۊرشا ئاوردەبێ. ئێتر هەواڵیە جە پەیمانیچ نەبې مەشییایا هەواڵم پەنە دایانېوە و ئاخر قسێ وېم کەردایام.
نویسەر: ئارەزوو ئەمانی
هۆروەگېڵنای: گوڵزار شەریفی_بېساران.[1]
کوردیپێدیا بەرپرس نییە لە ناوەڕۆکی ئەم تۆمارە و خاوەنەکەی لێی بەرپرسیارە. کوردیپێدیا بە مەبەستی ئەرشیڤکردن تۆماری کردووە.
ئەم بابەتە بەزمانی (هەورامی) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
ئەم بابەتە 148 جار بینراوە
ڕای خۆت دەربارەی ئەم بابەتە بنووسە!