وېش مەی
بەشو حەڤڎەهۆمی
گراڵەم گېرت وېم زەنگش پەی بڎەو. زانێنا پووڵی فرەیچش گەرەکەن، بەڵام واچېنا جە بېهەواڵی خاستەرەن. هەر پا شمارە زەنگش دابێ گېرتموە هۊرش نەگېرت. کاتێ قەتم کەرد گووشیەکەم دلې دەسیمەنە بې مشتەش لەرزنانیوە. عازا هۆرم گېرت، وېش بې. واچېنی دنیاشا کەرڎېنە خەڵاتم. ئی جارە من بېنا بە زەوقێوە سڵامەعەلەیکش کەرېنا. ئاڎیچ وەشحاڵ بې. واتم بېماریفەت چکۆگەنی؟! پەی چێ هەواڵېۋەم نمەپەرسی؟ واتش: هەقەو وېتەن سەحەر هەر چیم پەنە واچی هەقوو وېتەن. تۊ نمەزانی چن سەرقاڵەنا. شېرکەتەکەم حەساوی کەوتەن ڕا پاسە بزانوو گرڎش دوعای خەیروو تۊ با چوون هەڵای نەیاوینا وەروە دنیایە قەوڵێم داینێ. مەمنوونتەنا کە دوعای خەیریم پەی مەکەری. واتم تەنیا هەرمانېوەن کە دەسمەنە مەخېزیۆ. واتش: سەحەر تەلەفوونم پەی نەکەری با خەرجت نەلۆ سەر، بەرنامیە سەرو گووشیەکەیتوە مەرزنەرە پاسە خەرجت کەمتەرەن. حەساوی وەشحاڵت کەردانی.
واتم یانی پېسەنە پێخام کیاناکەی وېما؟
واتش ئەرې، منیچ واتم پام نیان دلې بیسوو چوار ساڵا ڕاسەکەێش تاکو ئیسە تاقیم نەکەرڎەنوە و سەرەش چەنە بەرنماروو.. هەر هێنوو ئانەیچەنە ئێخلاقە قەڎیمیانامە مەنێنێ و چکیە وېمانەتەرەنا و جە دنیای هەنا دماوە. نزیکوو دە دەقێقا یۊوە قسێما کەرڎې، یانی فرەتەر ئاڎ قسێ کەرې و جە هەرماناش و هەرمانە و باریش واچې و موڵەتوو من نەڎێ. منیچ فرە فرە وەشحاڵە بېنا. شۊنی خوڎاحافێزیرە حەساوی سەرحاڵە و گەشە بیانیوە. ئەڎا گەورێم زاناش و ماچۊ چېشەن دێسان پېسەو گوراڵێ تەنگیایوە؟ منیچ خوێنا و سەرش گېرێنارە بە شۊخی کەرڎەی.
بەرنامەو پێخامگیرەکەیم سەرو گووشیەکەیموە مەرزنارە، وردە وردە دەسم عاڎەتش پەنە کەرد و فێرەش بیانې. تاقە کەسیە بە گووشی قسېش چەنی کەرېنا و نامەکېم هۆرگېرتەبێ ئاڎ بې. ئەوڵوە فرە قسێم چەنی کەرې، منیچ هەرپاسە. تەنانەت چن جارێو فیلم و وێنەو وێچش نیارە پەیم. ئا فیلم و وێنە بییێبېنې تاقە دڵوەشی من و شەوېم بە تەماشاو ئانەنە دێنێ سەر.
نویسەر: ئارەزوو ئەمانی
هۆروەگېڵنای: گوڵزار شەریفی_بېساران.[1]
کوردیپێدیا بەرپرس نییە لە ناوەڕۆکی ئەم تۆمارە و خاوەنەکەی لێی بەرپرسیارە. کوردیپێدیا بە مەبەستی ئەرشیڤکردن تۆماری کردووە.
ئەم بابەتە بەزمانی (هەورامی) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
ئەم بابەتە 202 جار بینراوە
ڕای خۆت دەربارەی ئەم بابەتە بنووسە!