بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ سەڎ و حەفتا و نۊهەمە
هەڵەبجەئەشناسای: کەلتوورو ئازاڎی ژەنۍ، نەبییەی ژەن بە ژەنی، گۆرە بە گولانە، ژەن کوشتەی و ژەن سۊتەی و وېکوشتەی و دژمەنداری، ...هتر ، دیاردە هامشېوەکۍ تەرۍ، گەر بواچمۍ هەر نیەنۍ، یام کاڵېنۍ و سەراپاو کەلتوورەکەی جوانەن، ئینە جە (دین – یاسا) یام جە چېشیۆ سەرچەمەش گېرتەن؟ کاریگەری ئی کەلتوورەیە سەرو ژیوای هەڵەبجەی چەنین بییەن و چەنینەن؟
هۊمایۆن صاحب: ڕەنگە دلۍ باسو کڵاشینە درېژەدادڕیېم جە جوابو پەرسەکېنە پەنجەرەو جوابیم پەی سەرو ئی پەرسېچە کەرڎەبۊوەو بنەوانو سەرچەمەکەیشم بەرۋستەبۊن. چێنە من گەرەکم نیەن کەلتوورو هۆرامییەکا بە کەلتوورو فریشتەو مەلائېکا بڎەونە قەڵەم، بەڵکوم گەرەکمەن بواچوو ئا ژیوایەو ئاگەیە چەمو دۆروبەرەکەیشەنە مروڤانەتەرەن. ئانەیچ پېوەڼییش بە ئەندېشەو ئایینی کۊنی و وەرگېرتەی ئایینی تازەی و ئەندېشەی عیرفانی و هونەری و گۊرانی و ئەدەب و درووسکەرڎەی ژیانیۆ هەن. تەمامو هۆرامییەکا بە هۆرامانو تەختی کە گۊڕەو پیرشالیاریش چەنەنە ماچان (شار)، صەیدیچ بە (ئورمون) نامېش بەرۊن. ئاخر واچۍ شاری قیمەتش هەنو ماناو مەژگەی دیارش هەن. هۆرامانەنە مروڤ سەنتەرەنو کەرامەتش پارېزیان، ڕەنگە زوو نیشتەجابییەی پاسەش کەرڎەبۊن ئاڎۍ هەر زوو کەلتوورو خېڵ و تیرە و تایفەی بنیا لاوە، جە بنەماو شارەسانی و مروڤیەکان نزیکۍ بگناوە، هاندای پەی ئازایی و جەنگۍ وۍ تڕنی و نەزیفو ۋنۍ بنیا لاوەو تاریفدای هەرمانۍ و خوڵقنای جوانی و ۋستەی چېرو باری سرووشتی جە ئەڎێ بۊن، پەوکەی ژیوگایێ ئاوەڎان و ڕازیاوە یاگۍ جەنگی و کاولکاریش گېرتەنۆ، ئینېچە ئینتیما بە جوانی و ئاوەڎانی وەشکەران و دەمارو تڼ و تیژی خاو کەراوەو چەنەۋیەردەی مزیۊنە دلۍ زېڵۍ و نم مڎۊن بە ژیوای. ئیتر هۆرامییەکۍ هەر دەم چارەو جیاوازی و کەتنۍ و خەتاکاشا بە نەرم و نیانی کەرڎەنو بە چەنەۋیەردەی ئا ڤایروسەشا کوشتەن، ئی جوابە خاس و عالە هەر دەم پەی خرابەکا ئڼە زەقەن و دیارەن، دلۍ فەرهەنگو ئەویشانە بە تەرسەزاڵی ئەشناسیان!
پلەو ژەنۍ جە پیای نزمتەرە نیەنە، ژەنی ئا یارە ئازیزۍ سرووشتیەنە کە بزەش گېرتەن پیای و سەرزەمینەکەش ئاوەڎانکەرڎەنۆ، ژەنی ئەڎانەو ئەڎاچ ئەشۊ سالارەو زیندەگی بۊنەو گرڎو جوانی و ئاسووڎەییەکۍ چېرو پەیاو ئاڎېنە بان. بڎیە پەی ئیدیومی هۆرامی و ئەدەبو میللی ناوچەکەی، تەماشەو نامۍ میلۆدی و سیاچەمانەکان: چڼەهاشان بە نامۍ ژەنۍ و هانەی و درەختی و کەشانۍ (ئایشۍ ڕۊ، حەلیمۍ، میناوەی، عەرعەر داڎ، لەیلۍ گیان)، دلۍ میلودی ئېمەنە هۊردای بە هاهاها باڵو قارەمان و شېرە ئازاکارە بەڎی نمەکریۊن، میلودیەکۍ ئېمە پەڕېنۍ جە عەشقی و جوانی و بەرکۆتەکا سرووشتی.
هەڵەبجە ئەشناسای: پەنەم وەشەن ۋانەر وچانێ بڎۊن و باسو ۋاردە دانسقەکا هۆرامانیم پەی بکەرین؟
هۊمایۆن صاحب: پېسە تەمامو ناوچەکانو کوردەواری خوراکمان بە گرڎینەیی نزیکەن جە یۊترینی، بەڵام بەپاو بەر و بوومی و فەرهەنگو ناوچەکەی چن واردەمەنیێ وېمانېمان هەنۍ، چانېشان بڕێ جە گیۋاۋەکاو جۊرو شېوەو ئاماڎەکەرڎەیشان هۆرامانۆ ئامێنېرەو زیاتەریچ دلۍ تەۋېڵۍ و هاواری، بە هۊ بییەی پیرەکا و پیا ئایینی و دەروېشەکاوە هەر دەمێن پەیشان بە گیۋاۋە سووڎبەخشەکان بەردەن، گەرچی من چا بارۆ فرە شارەزاییم نیەن، چوونکوم خۊراکەکۍ لاو منۆ گرڎشان ناعمەتېنۍ و تەنیا نەبییەی و ئاورایی هاریەن، چەنی ئانەیچە نامۍ چن ۋاردێوە وېمانات پەی باسکەروون کە دلۍ سەرچەمەکانو هۆرامانئەشناسینە باسکریێنۍ. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]