بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ سەڎ و حەفتا و ششەمە
ئاخر خۊ دەمکەرڎەیۆ بە زوانی هۆرامی یەکسان نیەن بە گۊرانیۍ هۆرامیۍ، ئاخر کاتێ گۊرانی واچە هۆرامییەکۍ دلۍ تیڤیەکانە مەقام و گۊرانیۍ ناوچەکانو تەرو کوردەواری مەچڕان، سەقەت کەرڎەی هونەرەکەین، پەوکەی داوام ئانېنە جە دام و دەزگا پېوەڼدارەکا خەمو گۊرانیۍ هۆرامیۍ بوەران، مەشۊم مەحەک نریۊرە، پەی خاترەو بەرنامێوە، یام گۊزەرنای بۊنێوە، مەشۊم مۊرەو گۊرانیە هۆرامییەکا پارېزیۊن، ئەڎا و تاتەشان دلۍ باخینە، عاشقەکۍ پەی مەعشووقەکاشا، ڕاوچیەکۍ کاتو ڕاوېنە، ئەپا تەرزە گۊرانیېشا واتېنۍ، بەڵام ئیسە بە ناشییانە ئامېزانو موسیقایشان کەرانو سەقەتېشان کەران. نەواتەی گۊرانیێ هۆرامیۍ بە سەقەتی، خزمەتەن بە هونەرەکەی، هەر چەنی نەنویستەی تێکستێ ئەدەبی خراب پېسەنە نویستێوە خاست تۊمار کەرڎەبۊ. ئینە پەی سەرجەم کایە ئەدەبییەکا ڕاسەن، دنیا شاعېرەنو ئەی شېعرەی کورڎیە کۊنە؟دنیا فلیم نویسەنو ئەی کۊنە سینەمای کورڎیە؟ زارۊڵۍ کورڎی دیارو دراما بېگانەکاوە مەردۍ، تاریخو میللەتا دنیایشا ئاردۆ، کۊنۍ ئا کۊمپانیێ پەی ئاماڎەکەرڎەی فلیمی؟ خۊ گەر بە هونەرمەڼۍ بېگانېچ بۊن مەتاوان چڼەها فلیمۍ دلۍ ژیوای ئەردەڵان و بابان و جزیرە و بۆتانینە بەرباران، فەرمانداریشان بەشو سەڎەها زنجیرە درامایا کەرۊن. بەهەرحاڵ با زیاتەر نەڕېسوو، چانەی زیاتەر دوور نەگنوە، گرڎ کەس مەیاوۊنەو بڕوانمەکەروون ئانۍ وېچشان جە هەرمانەکاشا ڕازیۍ بان.
هەڵەبجەئەشناسای: کسمو کڵاش چنیەی و چۊخەڕانکی و زەوقو باخداری و بەرهەمو چڼەها جۊرا میوەی، تاکو چن پەی هەڵەبجەی قیمەتش بییەن؟
هومایۆن صاحب: بېشەک، زەوق و سەلېقەو هونەرو باخداری هۆرامییەکا و بەرهەمەکاشان جە گرڎو ڕوەکاوە پەی هەڵەبجەییەکان قیمەتدارەن، هەم پەی فاڕالۍ و هەم پەی پەنەۋازیەکاشان. من دلۍ پەرسەکېتەنە (کڵاش) سەرنجەش کېشتا، تاکو ئیسە کڵاش تەنیا پېسە پاپۊشێ ئەشناسیان، ئیتر دووریە (ڕەهەند) هونەری و عیرفانی و ئەخلاقیەکېش هەڵای شروڤە نەکریێنۍ، پەوکەی مەرامە پەنهانیەکېش نەلێنۍ بەرو هۆرامانی، من بە خاسش مزانو ۋانایەکۆ وېم کە وەڵتەر نویستېنېم و بڕێشا وەڵێم کەردېنێ، پېچنووشا پەرسەکۍ جەنابیتۆ، هەژموونش پەی سەرو تاکو بەرو هۆرامانی هەزار قاتتەر مەبۊن.
گرڎو خەڵکا مزانا ئا پاپۊشە وېمانە کورڎییە ئاردەرەیوە هۆرامییەکانو بە نامۍ ئاڎیشاوە ئەشناسیان، بەرو کوردەسانینە نامبانگش هەنو بییەن بە مایەو سەرسامی خەڵکی، من گەرەکم نیەن پېسە کەرەسەی و پەنەۋازیەکاش باسش کەروون، چوونکوم وەڵتەر جە بەرنامە ڕادیۊ و تیڤیەکانە باسشان کەرڎەن، بەڵکوم من گەرەکمەن جە ڕوە ستاتیکی و ڕەهەندی مۊچیاری و ئەخلاقیۆ باسش بکەروون، دۆرش، هەم پېخامەکەیش دلۍ هۆرامانینەو کاریگەریەکېش پەی خوڵقنای جوانی، ۋزوون وەرباس.
‎ (پاکی – چەرمەیی) دلۍ ویر و ئەندېشەو هۆرامییەکانە تاریخێ کۊنش هەن، پەرۋەرڎەی ئایینی و مۊچیاری وېشانشان سەرۆ بنیاڎ نیان و پەی سەرجەم کایەکانو تەرو ژیوای فاڕانشاوە پەی ڕەفتاری. ئا ویر و ئەندېشە و ڕەفتارە پاک و چەرمە بېگەردە ئینا پەشتەو ئەوەئاردەرەی کلاشیۆ، پەنەمان ماچۊن پاڵو جوانی و ڕازنایۆ ژیوگا سرووشتیەکەو هۆرامانی و وردەکاریەکۍ باخڎاری و بیناسازی و فەرمانداری (مەرېکا- ژیرللۍ مەرۍ) و تڼ و تۊڵی وەشەویسی و جوانی میانو دوە ڕەگەزەکەی، زامنو بنیاڎنیای کۊمەڵگێوە تەندرووسیەن، کڵاش ئامیانو وەرجەسەکریای ئا ویر و ئەندېشە پاکەینە.
گەر پیاو هۆرامانی ئەوەئاردەرەو وېش پا تڼ و تۊڵییە کە وەشکەرڎەی (بنەکڵاش)ین چا کەرەسا هەکە یاگا تەرینە پېسە زۋېڵی فڕەشان مڎان ۋستەبۊ ڕوە، ئانە ژەنی هۆرامانی بە نەرم و نیانی و بە شېنەیی و بە ۋردیۆ جوابش بە چنیەو کلاشی دانۆ. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]