شەوێ بنمەڕی
ساڵێشا تازە چلۍ تەمامیێبۍ، دیل مەرەخەس بۍ، کەوتێبێنمۍ وەنە، ئانە واچی ئاڵف کاڎان و بنمەڕنە نەمەنەبېما، دووېر یانۍ پێوەرە حەیوانما تێکەڵ کەرد، داماوەرو بەردما مەڕەکاو کەڕەجاڵۍ، هیشتای نۋ هەوارۍ بېنمۍ تازە بنەوبارگەما وستەبۍ، چەمېما نەکەرڎېبېنۍ، وېرەگابۍ، هۆرە گرمېو هۆرە ترێشقۍ دەسشا پەنە کەرد، هەرچن شرێقنێنۍ ئا دەسان دەسە دەنگ دېوە، عاسمان ئجۍ پلورەنە پڕۆ، هۆری سیاو ئاور، لاسۆمۍ کەرېنۍ مەڕەکېرە، گەلە حەیبەتیێنە بە قاڕای کەرۍ بنکاچارە، کوڕم گەرەکبۍ ویش گېرۋ، دنیا تاریکنابېشرە. ئەچینەینە بېنمۍ دەنگێ ئاما، دەنگو چېشی؟ کە ئامێ وەرۆ، مڎیەیمۍ پیێوەن هەوسارو هەرەلاتێوەش گېرتەن و دوۍ کناچڵۍ ئینێ سەرو هەرلێوەو ژەنېچ گڵێمێ ئینا کۊڵێشۆو ئینا شۋنەو هەرلێوە، نەی وشکەشا پۆوە بڕیێبۍ، وېما ۋیرش شیۆ پەی ئاڎیشا، تەڕېو تڵیسۍ بییێبېنېو دەرقاچەکاشارە ئاوی کریێرە، زاڕۆڵۍ لەرزی گېرتێبېنۍ، واتم؛ ئادەی بووڵە ئینا بوڵگای زلەنە، ئاویرما خاس ورگڕناو یەرێچوار مەیێما دۆشتێو شۊتما خاس گریناو دەرخواردما دێ، کناچڵۍ یوەشا کوچێ دشتە بۍ، ڕوەش نەبۍ گنۋ لارە، چەنی ئەڎاو تاتەیش کەوتیمۍ قسۍ، ماچۋ هەجمنەوە ئامێنمێو کەم دەسێنمۍ، ملمۍ پی شارەزوررە بەش ئینەخوان چیوێما دەس گنۋ.
ئا شەوە ئېمە کەردماو شەوگاری کەردش تاکو ڕۋ بیۆ، سەعبێ وېشا پېتۆو خواحافیزیشا کەرد، واتم خوڎا گیان خەڵکو کۆگەی بیو یاوی کۋگەو کۋگە بۊ بە نسیبت. فرەش پەنە نەشی دماو دوېر ساڵا لوایمۍ مەڕەو عەوڵاڎانی، پەشتەو دارو سەی محەمەڎی، فەسڵ چی کاتەنە بۍ، گیواوڵەو کەشی سەرەش بەر ئاردەبۍ، سەعبانێ (بەرەگاوان)رە گەلەم بەرد پەی تاشڵۍ، کاتو وەرەتاو کەوتەی بۍ مڎیەو کناچڵۍ زیێوە، خورماڵۆ ئامێبېنۍ قڼەرو ڕوسقە کەڼەی، یاوێ لاو من، ورد بیانێ مڎیەو یوەشا غەریبە نیەنە وەرەچەمامۆ، هەرجەوېمۆ ڕەحمم لوا ملشرە، ئاڎیچە هەر عەینو من بۍ، کاتێ ۋیرم کەردۆو ئاماوە خیاڵم، واتم وەڵڵا ئینە کناچۍ ساڵەکۍ کەڕەجاڵێنە، لوانی وەرۆ ئاڎیچە وێناش کەردا، بەڵام ڕوەش نەبۍ درکنۋش، واتم گیواو کەنەکېم دە با من قڼەری کەنونەو تۊیچ هۊرشا پاچەو کەرەشا وەربینە، کاتێ گیواو کەنەکېم چەنە ورگېرتە، کناچڵا دەسشا کەرد خوای، واتشا ئەری وەڵا شەمامە شوانەکەش گەرەکا، تاکو ئا عانەیچە نەزانابێم نامېش شەمامەنە.
دەمو عەسری ئاڎۍ لوێوەو منیچ ڕوەو بنمەڕ ئامانێ.
تا کاتێو لوایمۍ یانەو پاییزی، سەرەشا کەچەڵ کەرڎا ئاڼە واتانیشا پەنە ژەنې بارە، منیچ واتم ژەنەو من ئینا خورماڵ، واتشا دەی تۊ کەی لوانی خورماڵ، ئتر حاڵو مەسەلەکەم پەی گېڵنێوە.
کەوتیمۍ ڕا پەی خورماڵی، هەرکەسی یاوێنمۍ واچېنمۍ شۊنۊ یانێرە گېڵمۍ کە کناچېشا هەنە نامېش شەمامەنە، چکۆوەن یانەشا؟
نیشانەشا دایېمێو یاوایمۍ.
کاتېو لوایمی یانە، وېم شەوەو مەڕەکۍ کەڕەجاڵێم پەی گېڵنێوەو ئاڎیشایچ واتشا ئیسە ئامێنمۍ داواو ئی کناچېتا پەی ئی کوڕەیماو با یەکجار بیمۍ بە قەومۍ.
ئاڎیچۍ دەسشا نەنیا ڕوەماوەو دەسما ماچ کەردۍ.
هەر ئا پاییزەیچ شەمامەم فاڕاوە.
تاتەو شەمامۍ نامېش سەعە بۍ، بە (سەعە مەیتەر) مەشهور بیەنو لاو شێخ حیسامەددینیۆ بیەنو خەڵکو هەجمنەو لاو هەزارخانی ئۆ دیمی بییەن.
عەفان دەرەمەڕی.[1]