هەڕەش هەسە بیېنۆ
هەڕە، بە تېکەڵکەردەی خوڵۍ و ئاوۍ وەشەمەبۊن. ژیوای جارانی دلۍ دەگایەکا و شارەکڵەکانە هەڕە سوودی فرەش بییەن، پەی وەشکەردەی دیوارو یانەکاشا، پەی سەرو بانەکاشا، پەی وەشکەردەی خشتا کە بەکارئامێنۍ پەی دیوارو یانەکا و پەی وەشکەردەی کوورۍ نانکەردەی. کاتو ئاماڎەکەردەی هەڕېنە بە خاکەنازە، تاکو ئاویش فرۍ بۊ، هەرمانکەردەیش وەشەن، بەڵام کاتێ ئاویش کەمەبۊن، هیلاکی و زامەتش فرەتەرەن، چوونکوم هەڕەی تڼە هەم قورسەنەو هەم بە زامەت خاکەنازەکېوە فاڕیۊوە. پېسە پەندێ پەی کەسێ بەکارئامان هەکە تووشو گرفت و کەچی و ناڕەحەتیێ فرەی بییەبۊن، کۆتەبۊ ملوو نەگبەتییەکا وېشەرە. بڕێ جارېچ ئەڎا و تاتە بە زاروڵەکاشا ماچان، کاتێ زاروڵێوەشا ناگۊشگیربۊن و خەریکو گېچەڵ ورەتەی بۊن، پەنەش ماچان بە خوڎا تازە هەڕەش هەسە بیېنۆ، سەرەمڕە جەنگ ورەشۊ، حەلش نییەن.[1]