نامۍ: عوسمان
نازنام: هۆرامی
نامۊ تاتەی: محەمەڎ
ساڵۊ پېڎابییەی: 1940ز.
ڕۊ مەرڎەی: #15_10_2020ز.#
یاگۊ پېڎابییەی: #تەۋېڵۍ_هۆرامان#
یاگۊ مەرڎەی: سلێمانی

$ژیۋاینامە$
مامۊسا عوسمان هۆرامی؛ مامۊسای شاعېر و نویسەر، عوسمان محەمەڎ ساڵح فەرەج، ئەشناسیا بە عوسمان هۆرامی، ساڵەو (1940ز.) دلۍ شارەکڵەو تەۋېڵۍ ئامان دنیا، چەمېش بە دیمەنە زەریفەکانو تەوېڵۍ، باخۍ و گوڵۍ و سەرکەشەکا، ئاشنێ ئەپی دنیایە بیېنۍ، دلۍ ئامېزو باوشەو ئەڎێوە سۊزدارۍ بە سەڎاو لایلایەی هۆرامی و تاتێوە دەنگ وەش و شېعر دۊسینە گۊشېش زرنگیێنێ. گرڎو ئینېشا بیېنۍ بە ئامیانو سەرچەمەو ژێوایێ پەڕ جە بەهرەی شاعېرانەیش.
ساڵەی یەکەمەو وانایش دلۍ وانگاکا تەوېڵېنە تەمامنان، دماتەر بنەیانەکەشان کۊچ و بارشان کەرڎەن پەی شارو سلېمانی، ئەچاگە بارگەو بنەشان وستەن.
مامۊسا عوسمان هۆرامی، جە شارو سلېمانی تەمامو قۊناغەکانو وانایش بە سەرکۆتەیی تەمامنێنۍ، ساڵەو (1958ز.) دلۍ شارەکڵەو تەوېڵېنە بېیەن بە مامۊسا، ساڵەو (1959ز.) بەشو زوانی کورڎی کۊلیژو ئەدەبېیاتی زانکۊ بەغڎای وەرگیریان، بەڵام بە مەڵامەتو هەژاری و ئاتاجی بنەیانەکەیشاوە نەتاوانش درېژە بە وانای زانکۊی بڎۊن، دمای دۋۍ مانگا بە ناچاریۍ وازش جە وانای زانکۊی ئاردەن و گېڵانۆ پەی سلېمانی.
دمای گېڵایۆش جە زانکۊ بەغڎای، بېیەن بە مامۊسا، یەکەم مەرزنارەیش دلۍ دەگاو (چنارنە)ی سەر بە ناحیەو بنگرڎی بېیەن ساڵەو (1959ز)، دمای ساڵێ فاڕیانۆ پەی دەگاو (شێنێ) سەر بە قەزاو پشدەری. ئی مامۊسا بەهرەمەڼە، عاشقێ بېوېنەو زوانی کورڎی بېیەن، جەناوچەو پشدەری ئیسفاڎەی فرەش کەرڎەن جە شېوەزاری پاک و بېگەردی ئا ناوچەیە کە سەر بە ناوچەو موکریانین.تەنانەت بڕێ جە پەیجوورکارا زوانی کورڎی، بە قوڕەیشی کورڎیشان نېیانەرە، یوە ئەچا واچە جوان و ڕەسەنا کە هەر دەم مامۊسا عوسمان شانازیش پۆوە کەرۍ، واچۍ (ئاماژە) کە جە زوانو خەڵکو (شێنێ) وەرشگېرتېبۍ.
ئی مامۊسا دڵسۊزە، دمای چن ساڵێ جە خزمەت کەرڎەی بە پرۊسەو پەروەردە و فېرکەرڎەی دلې دەگا ڕەنگینەکانو کوردەسانینە، سەرئەنجام گېڵانۆ پەی دلۍ شارو سلېمانی، ئەچېگەیچ ساڵانێ فرە دلۍ وانگاکانە خزمەتش بە زاروڵە چەم گەشەکا شاری کەرڎەن، پېسە وانگاو (زانستی ئێواران، سەیوان، دەگاشېخان، هۆرامان، تەوېڵۍ، ئەیوبییە، ئاراس، پەیمان، گزنگ، میدیا، هێمن، کانی، دوکان، دەربەندیخان، مېیانی نۆرۊزی کچان- وانەبێژی ئینگلیزی)، دلۍ گرڎو ئی وانگایانە فېروازەکېش فېرو وەشەویسی مەکتەبی و زانست و هونەری کەردېنۍ.
ئی مامۊسا بەهرەمەڼە، فرە عاشقو پیت و واچە کورڎییا بېیەن، فېروازەکېش فېرو وەشەویسی واچە جوانەکا کەردېنۍ، سەرەمڕە هانیش دێنۍ قیمەت بنیارە پەی وانایۆ کتېب و گۊڤارەکا، دلۍ وانەکاشەنە فرە قیمەتش دان بە هونەری، وەشەویسیێ فرەش بېیەن پەی هونەرو گۊرانییە کورڎییا.
مامۊسا عوسمان هۆرامی، دمای (47) ساڵا خزمەتی مامۊسایی و پەروەردەکەرڎەی چڼین وەچا سەرو واچە ڕەسەنە کورڎییا، یانەنشین کریان، دمای یانەنشین بییەیچش، ڕاو نویستەی و بەرنامەکانو ڕادوین و تیڤیەکاوە سەرەمڕە خزمەتش بە زاروڵە چەمگەشەکانو کوردەسانی کەرڎەن.
زاروڵۍ، لاو عوسمان هۆرامییۆ، فریشتۍ و ۋلی و خەڼۍ و زەردەخەنۍ و ناسکی و جوانین، زاروڵە دەروونش بېگەرد و گەشەن، ئېسک سوک و شاڎی بەخش و ناسکەن، پۆکەی هەر دەم خیاڵش لاشاوە بېیەن و خزمەتش کەردېنۍ.
بېجگە جە بوارو پەروەردە و نویستەی پەی زارۊڵا، پەی ماوەو (14) ساڵا بەرنامەو (خەندە)ی جە ڕادوینو دەنگو گەلو کوردەسانیۆ پېشکەش کەردەن.
عوسمان هۆرامی، دلۍ دنیاو ئەدەبینە خاوەن قەڵەمێ بە گریک و دەس و پەنجێ ڕەنگین بېیەن، ئاڎ یەکەم کەس بېیەن کە شېعرەی هۆرامییەش بە دنیای تازۍ ئەشناسێنە، وەرپەنگەکۍ شېعرۍ هۆرامیېش ماڵێنۍ و پەل و پۊش دێنە پەنە، چوارچېوەو قافیەینە ئامێنە بەرو پەروازش کەرڎەن، عوسمان هۆرامی شېعرەی تازۍ و ئازادەی هۆرامییەش نویستېنە.
ئی کەڵە هونەرمەڼە مانیا نەشناسە، هەر دەم خەمو گلېرکەرڎەیۆ شېعرەو شاعېران و کەشکۊڵی ئەدەبی کورڎینە بېیەن. چەنەکۊڵیایش جە شېعرەکانو مەولەوی و سەیدی هۆرامی و بېسارانی و سەودایی و فرەو شاعېرەکانو مەدرەسەو هۆرامی کەرڎەن و دیوانەکەشان ساغۍ کەردېنێ:
1. دیوانو صەیدی هۆرامی، ساڵەو (1970ز.) چاپکریان.
2. دیوانو وەلی دېوانەی، ساڵەو (1976ز.) چاپکریان.
3. دیوانو موفتی پێنجوێنی، ساڵەو (1984ز.) چاپکریان.
4. دیوانو بەنگینەی، ساڵەو (2016ز.) چاپکریان.
5. دیوانو سەودایی، ساڵەو (1995ز.) چاپکریان.
6. کەشکۊڵو حاجی مەحمودی یاروەیس، ، ساڵەو (1998ز.) چاپکریان.
8. دیوانو ئەحمەد موختار جافی، تاکو ئیسە چاپ نەکریان.
ژمارێ کتېبۍ و کتېبچۍ فرېش چەربارەو ئەدەبو زاروڵا چاپۍ کەردېنۍ، چانېشا:
شاهۆ: شېعرە، ساڵەو (1970ز.) چاپکریان.
خونچە گوڵ، شېعرە، (2000ز.).
مناڵ و گوڵ، شېعرە، (2001ز.).
مافە گەشەکانم، شېعرە (2003ز.).
. جیهانە جوانەکەمان، ئۆپەرێت و شانۆگەری (2004ز.).
چاوانی باوان، شېعرە، (2004ز.).
شنەی شادی، شېعرە (2004ز.).
هەشتەمین دانا، ڕازۍ پەی زاروڵا، هۊرگېڵنای، (2004ز.) .
مافو مرۊڤی، پەی پۆلو پەنجەمی بنەڕەتی (2004ز.). لایلایەو ئەڎایا کوردی، چەنی هاشمی سەلیمی. (2005ز.).
. لالەزار، شېعرە، (2007ز.).
گوڵچنێ هۊنیۍ پەرۋەرڎەیۍ پەی باخچەو ساوایانی، (2008ز.).
گوڵزارو پەروەردەی، شېعرە، (2009ز.).
ئاسۆی گەش، شېعرە، (2009ز.).
ڕۊشنایی، شېعرە، (2009ز.).
گەشە، شېعرە، (2009ز.).
چریکە، شېعرە، (2010ز.).
بۆقی گەشتیار، ڕازە، (2007ز.).
عوسمان هۆرامی، دمای زېیاتەر جە شەس ساڵا خزمەت کەرڎەی بە پەروەردە و ئەدەب و زوانی کورڎی، تاریخو (#15_10_2020#ز.) دما یانەئاواییش جە ژیوای و قەڵەم و کتېب و نیشتمانی کەرڎ، پەی هەتا هەتایی سەرەی ئارامش نیاوە.
ئەسعەد ڕەشید.[1]