گێڕانەوە 01

=KTML_Bold=مزراحێن=KTML_End=
یەکێک لەو یاریانەی لە هەشتاکانی سەدەی بیستدا لەناو گەڕەکە میللییەکانی شاردا باو بوو، #مزراحێن# بوو، دوو جۆری هەبوو، جۆرێکیان لە دار سازدەکرا، دارتاشەکان درووستیان دەکرد، جۆرەکەی تریان کارگە لە ماددەی نایلۆن درووستی دەکرد، #مزراح# شێوەیەکی قووچەکی هەبوو، سەرێکی پان و سەرەکەی تری باریک دەبووەوە، نوکێکی ئاسنی پێوەبوو، پێی دەوترا: (تەمتەمە). هەروەها تاڵە بەنێکی لێدەپێچرا و پێی دەخولێنرایەوە پێی دەوترا: (شیپ).
مزراح بۆ ئەوەی لەکاتی خولانەوەدا دەنگێکی سەرنج ڕاکێش دەرکات، منداڵەکان قەراغی بەشی سەرەوەی مزراحەکانیان کون دەکرد، پێیان دەوت: (قۆڕقۆڕە)، هەروەها ڕۆنی قرچاویان تێدەکرد، لەکاتی خولانەوەدا قۆڕەی دەهات.
مزراحێن وەک هەموو یارییەک لەناو منداڵاندا یاسا و ڕێسای خۆی هەبوو، منداڵان بەم شێوەیە یارییان دەکرد:
مزراحێکیان لەناو ڕاستدا دادەنا، پێیان دەوت: (کۆلکە)، سێ چوار منداڵیش بۆ خۆنواندن مزراحیان بەسەردا دادەکوتی و دەیان خولانەوە، جۆرێک داکوتین هەبوو پێیان دەوت: چەپوخانی، شێوازی گرتنی مزراحەکە و خولانەوەی هونەرێکی جوانی تێدابوو، هەموو منداڵێک نەی دەزانی.
هەر منداڵێک مزراحەکەی بەسەر کۆلکەدا دابکوتیایە، دەبوو مزراحەکە لەنێوانی هەردوو پەنجەی دۆشاومژە و زەرنەقوتەوە بخاتە سەر بەری دەستی و بگاتەوە سەر کۆلکە. ئەگەر دوو مزراحی دوو منداڵ لەکاتی خولانەوەدا بەریەک بکەوتنایە، پێیان دەوت: (ماچ). ئەگەر مزراحێک زۆر هەڵبەزیایەتەوە، بەئاسانی نەچوایەتە سەر دەست: دەیاوت: (تووشی گدگدە) بووە. ئەگەر مزراحێک بەهێواشی بەر کۆلکە بکەوتایە، پێیان دەوت: (سەرەشیپ)، ئەگەر سێ پێ بیپەڕاندایە پێیان دەوت: (کاسە ئارد)، ئەگەر زۆر بیپەڕاندایە دەیان وت: (ناردی بۆ حەبلی حەبان). هەروەها ئەگەر مزراحێک بەتوندی بەر کۆلکە بکەوتایە و بیشکاندایە، پێیان دەوت: (تەمتەمەی حەڵاڵە)، ئەو منداڵەی دەیشکاند، تەمتەمەکەی بۆ خۆی بوو. ئەگەر مزراحێک لەکاتی خولانەوەدا بەڕێکەوت تەمتەمەکەی بپەڕیایە، مزراحەکە خواروخەچ دەخولایەوە و دەوەستا، منداڵەکە تێدەکەوت و مزراحەکەی دەبووە کۆلکە. پێیان دەوت: (تەمتەمەی پەڕیوە).
لەناو دەستەواژەی منداڵانەی ئەم یارییەدا، چەند ئیدیۆمێک درووستبووە، لەناو خەڵکیدا بەئاستی جۆراوجۆر بەکاردێت:
=KTML_Bold=یەکەم:=KTML_End= #شیپت پێیە#
شیپ بەنێکی درێژە، مزراحی پێدەخولێتەوە، جۆرێکی تری هەیە، کارگە درووستی دەکات، ماددەیەکی نایلۆنییە، لەکاتی مزراحێندا شیپ زووزوو دەپسا و منداڵ هەبوو جار لە دوای جار شیپەکەی کوورت دەبووەوە و دواجار بۆ مزراح خولانەوە شیپی پێنەدەما. بۆ کەسێک بەکاردێت کە لە کارێکدا مایەپووچ بووبێت و هیچی بەدەستەوە نەمابێت.
=KTML_Bold=دووەم:=KTML_End= #دەنگی ئەڵێی: قۆڕقۆڕەی شکاوە#
قۆڕقۆڕە بەو کونە دەوترێت کە منداڵان دەیکەنە بەشی سەرەوەی مزراح، پاشان ڕۆنی قرچاوی تێدەکەن، بۆ ئەوەی لەکاتی خوولانەوەدا قۆڕەی بێت، هەر مزراحێک قۆڕەی زیاتربوایە، منداڵەکە خۆی پێوەدەنواند. بۆ کەسێک بەکاردێت لە کۆڕ و کۆبوونەوەیەکدا گۆرانی بڵێت، بەڵام دەنگی زۆر ناخۆش بێت. =KTML_Photo_Begin=https://www.kurdipedia.org/files/relatedfiles/2024/564249/0001.JPG=KTML_Photo_Alt=0001.JPG=KTML_Style=width:15%;height:15%;float:left;=KTML_Photo_Target_Link=https://www.kurdipedia.org/files/relatedfiles/2024/564249/0001.JPG=KTML_Photo_End=
=KTML_Bold=سێیەم:=KTML_End= #ئەڵێی تەمتەمەی پەڕیوە#
تەمتەمە لە ماددەی ئاسن درووست دەکرێت، کەمێک نووکەکەی کووڕە، بەشێکی سەرەکییە، مزراحی لەسەر دەخوولێتەوە، (هەندێک جار لە بزماری ناڵی وڵاخ درووستدەکرا) گەر مزراح لەکاتی خولانەوەدا بەڕێکەوت تەمتەمەکەی بپەڕێت، کەمێک خوار و خێچ دەخولێتەوە پاش کەمێک دەوەستێت. بۆ کەسێک بەکاردێت کە لەکاتی ڕۆیشتندا لەباتی ڕاست و ڕەوان، گێڕوگەواڕ بەڕێگەدا بڕوات.
=KTML_Bold=چوارەم:=KTML_End= #ناردی بۆ حەبلی حەبان#
لە یاریی مزراحێندا، گەر کۆلکە بەهۆی داکوتینەوە زۆر بپەڕێت و دوور بکەوێتەوە، منداڵان وەک گاڵتە بە خاوەنەکەی دەڵێن: ناردی بۆ حەبلی حبان. بۆ کەسێک بەکاردێت کە لە خێزان و بنەماڵەی خۆی زۆر دوور بکەوێتەوە، بەشێوەیەک هاتنەوەی ئاسان نەبێت.
=KTML_Bold=پێنجەم:=KTML_End= #تووشی گدگدە بووە#
لە یاریی مزراحێندا گەر مزراحێک لەکاتی خولانەوەدا بەردەوام هەڵبەزێتەوە و بەئاسانی نەچێتە سەر بەری دەست، دەڵێن: مزراحەکە تووشی گەگدە بووە، بۆ منداڵەک بەکاردێت کە لەکاتی یاریی کردندا نەزانێت دانیشێت و بەردەوام خەریکی هەڵبەز و دابەز بێت. منداڵان پێی دەڵێن: دانیشە دەڵێی: تووشی گدگدە بووی.
=KTML_Bold=شەشەم:=KTML_End= #ئەڵێی کۆلکەیە#
لە یاریی مزراحێندا یەکێک لە مزراحەکان دادەنرێت، منداڵان بۆ خۆنواندن مزراحی بەسەردا دادەکوتن. تا دەیشکێنن و تەمتەمەکەی حەڵاڵ دەکەن. بۆ منداڵێکی ترسنۆک بەکاردێت، لەناو گەڕەک و یاریی منداڵاندا هەرچی ڕاست ببێتەوە بەباش و خراپدا پێدابکێشێت، ئەویش هیچ پەرچەکردارێکی نەبێت.
=KTML_Bold=حەوتەم:=KTML_End= #تەمتەمەکەی حەڵاڵە#
هەر مزراحێک کرابێت بە کۆلکە و لە یاریی مزراحێندا بشکێت، منداڵان دەڵێن: تەمتەمەکەی حەڵاڵە، بۆ ئەو کەسەی لە یارییەکەدا دەیشکێنێت. بۆ دەستکەوتێک بەکاردێت کە کەسێک بە ماندووبوون و شارەزایی خۆی لە ژیاندا بەدەستی هێنابێت، ڕەنجی پێوە کێشابێت.
=KTML_Bold=هەشتەم:=KTML_End= #وەک مزراح دەیخولێنمەوە#
مزراحێن یارییەکی کوردەوارییە، تایبەتە بە کوڕان، بەزۆریی منداڵان هەندێک جار گەورەکانیش لە کاتی یارییدا بە شیپ مزراحەکانیان دەخولێننەوە، بۆ منداڵێک بەکاردێت کە هەڕەشەی شەڕ لە منداڵێکی تر بکات و پێی بڵێت: هێندەت لێدەدەم وەک مزراح بخولێیتەوە. [1]
نووسینی: #ڕێبوار جەمال سەگرمە#