کارتە پۆستاڵ
هەڤاڵەکان!
وتم پیرۆز باییتان لێ بکەم
بەهار دێت و
شیعرێک تازە بهۆنمەوە
بۆ کوردستان!
وتم بە جوانترین وشە
نەورۆز بکەم بە ملوانک
بۆ گەردنی بەرزی کوێستان!
زۆر هەوڵمدا
بۆتان بڵێم شێعرێکی تەڕ
هەزار وشەم ڕست کرد و هەر
نەهاتە بەر!
پەنام بردە بەر پیکاسۆ
گرینیکای بۆم ڕەسم کرد و وتی هانێ
وتم لۆرکا ئەی تۆ، وتی:
شیعرەکانم
لە کاستیلا بەجێماون
ڕێگا نادەن گورگەکانی
وتم بە هایکۆی ژاپۆنی
ئەرکی شانم بەجێ بێنم
هیرۆشیما گڕی گرت و
وشەی هایکۆ بوو بە فرمێسک
ڕژایە نێو گۆمی خوێنم!
هەڤاڵەکان!
ڕاستە بەهار جوان و شەنگە
نەورۆز جێژنێکی تایبەتی گەلی کوردە
لێم ببوورن
پیرۆز باییتان لێ ناکەم
چون ناوێرم.
بەڵام کارتە پۆستاڵێکی هەڵەبجەتان بۆ دەنێرم.
سەرچاوە: #زڕەی زنجیری وشە دیلەکان# [1]
هۆزانەوان: #جەلال مەلەکشا#
سەرچاوەی دەق: ڤەژینبوکس [2]
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 80 keer bekeken
Schrijf uw commentaar over dit item!