لاچەمێوی گولانە سەرو کتېبو (بووکەکەی هەورامان)

وەڵێ گرد چېویەنە دەس وەشی و مەبارەک باڏی گەرموو وېم پېشکەشو کاکە ئاسۆ بېیارەی وەشەویسی کەروو. ئۆمێڏوارەنا ویری گەشش، گەشتەر و قەڵەمی ڕەنگینش، ڕەنگینتەربۊ.
وەختێو دەسم کەرد بە وانای ئی کتېبیە، هەر جە پەلەکا ئەوەڵیشەنە، هەس و هۊشم کۆت قسێ چەنی خیاڵیم. ئەرەجیێم دووربینێوی فیلمبەرداری ئینا دەسمۆ و ئی دەگا پەی ئۆ دەگای و ئی یاڵ پەی ئۆ یاڵی خەریکەنا فیلم گیروو. هەر جە قەرداخۆ گېرەش پەنە تاکو شارەزوور و هەڵبجە و بېیارێ و تەوېڵۍ، هەر جە شۆشمێ و نەۆسووڏە تاکو هانەگەرمەڵە و تەتە و زرێبارە و مەریوان.
مەزانۇو چی حەز نەکەرېنێ کامێرەکەی بنیەوەرە. هەرچی زیاتەر پەلێ کتېبەکەی دێنێوە و لوێنێ وەرۆ، زیاتەر هەسم ژڵێویێ و حەسرەت وەرێنێ:
وەشڵەی ئی کتېبە بە هۆرامی نویسیایا؟
ئاخر ئاسمانی کەوە و یاقووت ڕەنگوو وەهاری، سەماو گۆراڵا دلێ تەڵانەو هەنارانە، دەسەملانەو شنگێ و هاڵەکۆکێ، ڕەنگەی سوورە و سویل بەرڎۍ دەرەبۆڵێ، قاسپەو ژەرەژا چەنی خوڕەو هانەکڵەو چیروو پەڵە وەروێ، دەنگو سیاوچەمانەی چەنی کنالەیلوو سۆتە دڵاو هەوارگەو ئاوێسەری، هەوڵ و تەقەلاو شەنیەری پەی مدرای سەرو شاتە وەزەکاوە، وشکە کەڵەکوو پەشتەو بانو کێڵی.
ئینێ گرد چی کتېبەنە ئامێنێ، چ زوانێوتەر بېژگەم زوانی هۆرامی متاوۆ وەسفوو ئینیشا پېسە وېشا کەرۊ؟؟!
چی کتېبەنە ملمێنە دلێ بەسەرئامېوی پەڕ جە کارەسات و تراژدی کە دڵوو هەر ئینسانېوی مارانە قوڵ.
ئاواتێ و ئارەزوێ، دلێ ئاوەنیاو ئەشق و وەشەویسیەنە سەوزێ با و خونچە کەرا، بەڵام خونچەکێ هەرگیز مەبا بە گوڵ و هەر بە خونچەیی زەردێ با و چەنی دووکەڵوو تۆپ و خمپارەی ڕەنگە فاڕا.
نیمەشەوا و گرد کەس وتەن، تەنیا وەیوە ئاشقەکێ قەرەداخی هایشا. تۊ واچی چەم سیاوە هۆرامیەکەم، سالارەکەم، ڕۊشنایی چەماو نوخشەیم، ئی جارەیچە گېڵۊوە؟!
ئی کتېبە بەسەرئامێوا کە ئەوەگېڵیایش پەی کریۆ و نمەگنۇە دلێ قاڵبوو ڕۊمانی، هەربۊنەو ئانەیۆ نەقدی تکنیکیش سەر نیا. بە ئەدەبېیاتێوی تێکەڵاوی سۆرانی و بڕېو یاگێنە جافی و مەحەلی نویسیان و فرە زوو ملۆنە دڵ. زوانو قسە کەردەی سۆرانیا و هەس و سۊز هۆرامی.
جارێوتەر دەس وەشی کەروو جە کاکە ئاسۆی ئازیزی و بە دڵ ماچوو:
گیرایی قەڵەمیت سوکنایی وزۆنە دڵ، هەوڵ دە جاری دماین بە هۆرامی قەڵەمەکەیت چەرخنی تاکو ئېمەیچ چا بەهرەیە بۍ بەشێ نەبیمێ.
ڕەزا بەهمەنی.[1]