کۍ ڕانموونی مەولانا خالیدی نەقشبەڼیش کەرد کە بلۊ پەی هیندستانی؟
مەولانا خالیدی نەقشبەڼی شارو مەدینەی نوورداری یاوا بە خزمەتو پېیاخاسێ یەمەنی
دمای زیارەتو ئارامگاو حەزرەتی نازاری، مەولانا خالید هەوېڵەیەنە بۍ پەی ئېستەیۆ پېیاخاسێ کە ڕانموونیش کەرۊن پەی یاوای بە مەتڵەبیش، پڕێنە چەمش کۆت بە پېیاخاسێ خەڵکو (یەمەنی) ، دمای سەلام و حورمەتی و دەس ماچکەردەیش، مەولانا مەپەرسۊ پېیا خاسەکەی پەی ئانەی کەسێ ئیمانداری ساڵحش پەنە بشناسۊ پەی ئانەی دڵڕۊشنیش دۊ پەنەو ڕانموونیش کەرۊن.
مەگېڵناوە، کابرای یەمەنی بە مەولانایش واتەن لوە پەی مەککەی، چاگە پاڵو کابەینە گەر کەسێت چەم پەنەکۆت هەرمانێ ناپەسەڼەش کەردە، پەلە پەل نمەکەرە جە ئینکاری کەردەی و تاوانبارکەرڎەیش، بەڵکوم خوڎای گۆرە بېیاونۊت بە ئاواتو وېت.
مەولانا جمۊرە پەی شارو مەککەی، ملۊ دلۍ کابەی، دمای تەواف کەردەی و بەجائاوەردەی ئادابو زیارەتی، سووچێنە نیشۊرە دەسکەرۊ بە قورئان وانای، وەختێ سەرە هۊربڕۊ مەوینۊ کابرێوە مدران پاڵش دان کابەیۆو ڕوەش کەردېنە مەولانای، ئیتر دڵو وېشەنە ماچۊ: بڎیە ئا کابرا چن بۍ ئەدەبەن، پەشتیش کەردېنە کابەی و ڕوەش کەردېنە من!
کابرا دڵو مەولانای مەوانۊوە، چڕۊش، پەنەش ماچۊ چی ڕەخنە جە من گېری، ئەی تۊ نمەزانی لاو خوڎای گۆرەیۆ قەدرو حورمەتو ئینسانی جە کابەی فرەتەرەنە، ئەی مەدینە مۊچیاریشان نەکەردی؟ ئیتر مەولانا دڵش ساف بۊن، زانۊ کە ئینە ئا پېیا خاسەنە کە ئاڎ شۊنیشەرە مەگېڵۊ. یەکسەر پەلامارە مڎۊ دەسش ماچ کەرۊ، داواو بەخشایش چەنەکرۊ، ڕانموونیش چەنە داواکەرۊن، ئاڎییچ ماچۊ: فتوحاتو تۊ چېگە نېیەن، بە ئیشارەت یاونۊشەنە کە ئینا (هیندستان) ، ئیتر مەولانا خوڎاحافیزیش چەنەکەرۊن و زیارەتو یانەو خوڎای کەرۊنو ڕاو مەدینەی مەگېرۊن، چاگەیچۆ پەی شامی و جە شامیچۆ پەی کوردەسانی، مێوە پەی شارو ساێمانی و دەسکەرۊن بە دەرس واتەیۆ پېسە جارانی.
ئەسعەد ڕەشید.[1]