ئارەزوو گەشەکەردەی کتېویانەو هۆرامی
ئومېڎم ئانەن هەرچی ڕوێنێ شاهیڎو بەڕاوە بەردەی ئی جۊرە جەماوەریانە بۊمێ. وەختیە کتێویە مەی بەروە نیشانە مەڎۊ کە کەسایەتیە ڕۊشن ویر بە ئێحساسوو ئەرکیە سەرو شانەیش چېویەش بېیەن پەی واتەی و نووسیەی، ئا چېویە بە هەر زوانیە بنوسیەو مەو بە پایەو کۊڵەکی پەی ئا زوانیە. ڕاسی واقعی (ڕئاڵ) ئانەنە کە زوانیە پەنەش نەنووسی و گڵوریەش هەر ڕاو دەرەینەو بە زوویی نۆقم مەونە. نویسەریە کە بە زەحمەتی فراوان و بە سەرو وەشەویسی کتێوش نووسی تەکلیفەن مەردمی دەس پەنە مەکەرۊ. پەنەوازەن گردو ئا ملەتیە کە پا زوانەیە مەدوا ئا کتێوەیە بواناوەو ئەر پارێزنای زوان و فەرهەنگوو وېشا گەرەکبۊ ئەشیوم بە وەنەیش و بایەخ دای پا ئەسەریە کۊمەک کەرا بە فەرهەنگ و زوانەکەیشا. ئەر غەیر چانەیە بۊ مەردمیە لاواز و بی مەژگێنی و مەشیۆم تەمەڎاروو وتەی میراسیشا با. هەرپاسە ئەرکەن سەرو ئا کەساوە کە جە بواری ماڵی دەسشا مېیاوۆ یارمەتی با پەی ئی هەرمانە گەورێ و هەرپاسە پەی ئی ڕا و ڕەسمیە برایا ڕەسوڵی (کێمنەی) قوڵېشا هۊرماڵەی و پیایانە هەزینەو ئی جەماوەریشانە گېرت سەرو شانەو ویشا.
موهەندێس و ئەندازیاری فەرهیختە کاکە ساڵح ڕەسووڵی و برای وەشەویس بە تەرخان دای هەزینەو بەڕاوە بەردەی ئی پەردە لادایە، گەورەتەرین هەنگامەشا جە بواروو ماڵیوە هۆرگیرتە. ئی هەرمانیە مەشیۆم بو بە ڕوشنائیە پەی ئا جەماوەروو پوڵداری کە جە پاڵو خزمەتگوزاری ئابووری و سەرمایە گۆزاری ئێقتێسادی بەشیەچ تەرخان با بە سەرمایەگۆزاری فەرهەنگی پەی گشودە بېیەی ئی بەشیەو دوڵەمەنی فەرهەنگی. ئینە ئیژیاتەرین سەرمایە گۆزارین چوون جە دریژخاینەنە مەو بایسوو ئاسایېشوو زاوڕوەکات و میرات بەرەکات.
هەرپاسە نیازەن ئیشارە کەروو ئەندام و بەڕاوە بەراو ئەنجۆمەو ڕۆجیاری پلیە بەرزەشا نېیا پەشتەو سەرەی و کەمتەر جە دوێ مانگێن دوێ مەراسمێشا بەردەی ڕاوە. بە ڕاسی ڕکوردشا دانە. ئیشەڵڵا ئی ڕوتە هەر درێژەشبۊ.
ڕەحیم غوڵاموەیسی.[1]