پەی ژووژنایۆ مەژگی
نویستەی: #ئیبراهیم میکە عەلی#
پارادوٙکس: دژبەیوٙی: تَناقض.
پارادوٙکسو کەسی دروٙزنی.
ئی پارادوٙکسە یوەمجار لاو فەیلەسوفەکا یوٙنانی کوٙنیۆ وزیا سارا.
چی پارادوٙکسەنە هەکە پەی مەژگو بنیاڎمی فرە وروژنەرا، جە چڼ وەڵینە و ئیستیدلالێوە لوژیکیۆ چڼ نەتیجێوە نا لوٙژیکیما دەسگنا، ئینەیچە بوٙ بایسو ئانەی هەکە بنیاڎم جە ژیریی ویٛش گنوٙ شکۆ، چوونکە سەرێوەرە هیچ ڕەخنە و ئیرادېوە پیٛڎا مەکەروٙ جە وەڵینە و ئیستیدلالەکاش و سەرێوە تەریچۆ ئاکامو نەتیجەکیٛش پەنە قبوڵیٛ مەکریا.
پارادوٙکسەکە پی جوٙرەنە:
کەسېوە واچوٙ: من دروٙزنەنا.
ئایا ئا قسیٛشە ڕاسەنە یام نا؟
دماجار ئی کابرا یام دروٙزنا یام دروٙزن نیا.
کیٛشەکە ئینا چانەینە ئەر پاسە بنیەمیٛرە هەکە ئی قسیٛ ڕاسەنە، پا نەتیجەیە یاومیٛ هەکە غەڵەتەنە.
ئەر پاسەیچ بنیەیمیٛرە هەکە قسەکیٛ غەڵەتەنە، دماجار پا نەتیجەیە یاومیٛ هەکە ڕاسەنە.
با بەجوٙرێوە تەر باسەکەی کەرمیٛوە:
ئەر پاسە بنیەیمیٛرە هەکە کابرا دروٙزن بوٙ، دماجار پا نەتیجەیە یاومیٛ هەکە ڕاسواچا.
ئەر پاسەیچ بنیەیمیٛرە هەکە کابرا ڕاسواچا، دماجار پا نەتیجەیە یاومیٛ هەکە دروٙزنا.
ئیجا چیٛوی چیمنە بوٙ؟!
سەرەتا با پاسە بنیەیمیٛرە هەکە ئی کابرا ڕاسواچ بوٙ.
وەختێ ویٛش بە دەمو ویٛش ماچوٙ: من درویٛ مڎەو دەی ڕاس ماچوٙ، چوون واقعەن دروٙزنا.
ئینجا با پاسە بنیەیمیٛرە هەکە دروٙزن بوٙ.
کەواتە درویٛنە وەختێ لافو ئانەی مڎوٙ وەنە هەکە دروٙزنا، دەی کەواتە ڕاس ماچوٙ.
پی جوٙرە ئەر پاسە بنیەیمیٛرە هەکە ڕاسواچ بوٙ، پا نەتیجەیە یاومیٛ هەکە دروٙزنا.
ئەر پاسەیچ بنیەمیٛرە هەکە درویٛ مڎوٙ، پا نەتیجەیە یاومیٛ هەکە ڕاسواچا.[1]