دەمەتەقێوە وېمانۍ چەنی ئاشنێوە سۆرانی زوانی
بەشۍ: چوارەمە
تۊ تەنانەت ئەر پاڵتەنە دوێ ھەورامیێ بە زوانی ئەڎایی وېشا قسێ کەران، زوو وېت خوڵتنی دلێ قسەکاشا و ماچی شمەی ھەورامی (عنصری) یندێ و کە یاودێ بە یۆی هەر بە هۆرامی قسێ کەردێ. دەی ئینە ئەر سووکایەتی و بەکەم زانای زوانەکەو من نەبۊ، چېشەن؟ چی مەگەر تۊ چەنی هامزوانەکاو وېت بە سۆرانی قسێ نمەکەری؟ چی مشۊ تۊ ئا مافتەبۊ و من نەبۊم؟ ئینە بە ئاشکرا بەکەم زانای و پەراوێزوستەی و نکوولی کەردەی جە زوانەکەو منەن؟ چینەیە خرواتەر ئینە بەڕاسی ئەوپەڕوو شۆڤینیسمی زوانین کە نازی دوێ هامزوانێ بە زوانی ئەڎاییشا چەنی یۆی قسی کەرا. ئی هۆرزوکەوتە شۆڤینیستانە هەر هۆرزوکەوتە شۆڤینیستانەکەو کەمال ئاتا ترکین کە شکستش وارد و پەی هەتاهەتاین نریا گۆڕە.
دەی من پان هۆرامیستنا یان تۊ پان سۆرانیست؟
تۊ ئەر ڕات گنۆ هۆرامان یان پەی ژیوای بەی هۆرامان، چەمەڕاو ئانەینی کە گرد هۆرامی زوانێو جە هۆرامانەکەو وێچشەنە چەنی تۆی تاقە سۆرانی هەر بە سۆرانی قسێ کەرۊ، بەڵام ئەر من بەو هەولێر و سلێمانی و مەهابادو شارەکا تەری مشۊ زوانەکەو وېم بنیەو کەنارەو و هەر بە زوانەکەو تۊ قسێ کەروو. چی مشۊ تۊ بەی هۆرامان و هۆرامی فێر نەبی؟ بەڵام بە گېیان و دڵ ملی ترکی و فارسی وعەرەبی کە زوانێ داگیرکەرەکاتەنێ فێر بی و شانازیج کەری کە فێرشا بی.
دەی من پان هۆرامیستنا یان تۊ پان سۆرانیست؟
موختار کەریمی.[1]