ناونیشان: هاتنەوەی سوپای ڕووس
نووسەر: #هێمن عەبدوڵڵا 2#
ڕۆژی دەرچوون: #05-10-2015#
ڕووسیا لە دەستپێکی سەدەی بیست و یەکدا وەکوو دەستپێکی سەدەی بیست بە فڕۆکە و ئاگر و ئاسن هێزی خۆی لە ڕۆژهەڵاتی نێوەڕاستدا نمایشدەکات. نمایشی سەدەی ڕابردوو دامەزراندنی کۆماری کوردستان و بەدوایدا ڕووخانی کۆمارەکەی بەدواداهات. لەم سەدەیەدا ڕووسیا دوای دامەزراندنی کانتۆنەکانی ڕۆژاوای کوردستان دێتەوە، بەڵام دیارنییە پشتیاندەگرێت یان پشتیان لە زەوی دەدات.
بەشداریی ڕووسیا لە شەڕی دژی #داعش# و لەدەرەوەی ئەو هاوپەیمانێتییەی ئەمریکا و هاوپەیمانەکانی پێکیانهێناوە ئەنجامی یارییەکەی سووریا دەگۆڕێت. ئەگەر بڕوا بە قسەکانی پوتین بکەین، ڕووسیا مانەوەی ڕژێمی ئەسەد و پشتیووانیکردن لە #یەپەگە# بە ئامانجی ستراتیژیی خۆی دەزانێت. پوتین لە قسەکانییدا لە نەتەوە یەکگرتووەکان پەسنی سوپای سووریا و یەپەگەی دا و گوتی تەنیا ئەوان شەڕی ڕاستەقینە لە دژی داعش دەکەن.
میدیای ڕووسی وەک بڵێی ڕووماڵی شەڕەکانی سوپای خۆیان بکەن، لە #حەسەکە# و شوێنەکانی دیکە وێنەی هەماهەنگیی سوپای ئەسەد و یەپەگە لە دژی داعش دەگوازنەوە. #پەکەکە# دەزانێت ئەو پشتیووانییەی ڕووسیا مەرجدارە بە پشتیووانیکردنی پەیەدە لە مانەوەی ڕژێمی ئەسەد، بە بەشارەوە یان بەبێ ئەو. دەشزانێت لە باشترین حاڵەتدا ڕژێمی ئەسەد ڕەوشی کانتۆنەکان وەکوو دیفاکتۆ دەهێڵێتەوە و قەت بەفەرمی لەو فۆرمەی ئێستایدا دانی پێدانانێت. بەڵکوو دەیانکاتە فاکتەری مانەوەی هەڕەشە و درووستکردنی ناسەقامگیری لەسەر سنوورەکانی تورکیا و هەرێمی کوردستان. بۆیە بۆ پەکەکە دەرچوون لەو هاوبەندییە و هاتنە ڕیزی هاوبەندیی #هەولێر#واشنتن قازانجی زۆرترە بۆ وەرگرتنی شەرعیەتی نێودەوڵەتی بۆ کانتۆنەکانی. بەڵام پرسیار ئەوەیە ئەگەر ئەمریکا سەختگیری بکات، پەکەکە تا کوێ دەتوانێت بەرگەی ئەو سەختگیرییە بگرێت و خۆی نەخزێنێتەوە باوەشی ڕووسیایەک کە جدیتر لە ئەمریکا بۆ تەفروتوناکردنی داعش لە سووریا هاتووەتە مەیدان؟
بە هەموو بارێکدا هاتنەوەی سوپای ڕووس بۆ ناوچەکە و نزیکبوونەوەی لە کوردستان بیرهێنەرەوەی بیرەوەریی شیرینی مێژوویی نییە بۆ کورد. بۆیە بەرلەوەی شکستی هاوشێوەی کۆماری کوردستان ببینین، گرنگە پەکەکە و پارتی دەست لە ناکۆکییەکانیان لەسەر ڕۆژاوای کوردستان هەڵگرن و پێکەوە هاوپەیمانێتییەکانیان لەگەڵ زلهێزان بۆ هێشتنەوەی ئەزموونی ڕۆژاڤا بەکاربهێنن. [1]