ژێدەرەکی ژ کۆمبوونا قوباد تالەبانی یا ڕوژا #09-05-2023# دگەل تیما #یەکێتی نشتیمانی کوردستان# یا کو ل دەباشان هاتبو کرن راگەهاند، قوباد تالەبانی جێگرێ سەرۆکوەزیرێن هەرێمێ و تیما ئێکەتیێ دێ ڤەگەرنە کۆمبوونێن جڤاتا وەزیرێن حکومەتا هەرێمێ .
ئاماژە دایە ئەوێ چەندێ ژی، ئێکشەمبیا بهێت تیما ئێکەتیێ دێ پشکداری کۆمبوونا جڤاتا وەزیرێن هەرێمێ بیت و جارەکا دی دێ بەردەوامیێ دەنە پشکداریێ د کۆمبوونا جڤاتا وەزیران دا .
ژ 26ی ئۆکتوبەرا سالا 2022 وەرە و پشتی تێکچوونا پەیوەندیێن ناڤبەرا پارتی و ئێکەتیێ دا، قوباد تالەبانی بایکۆتا کۆمبوونێن جڤاتا وەزیران کر و ل 22ی 12یا هەمان ساڵ وەزیرێن ئێکەتیێ ژی بایکۆتا کۆمبوونان کرنە،
بریارا ڤەگەریان قوباد تالەبانی و تیما ئێکەتی بۆ کۆمبوونێن جڤاتا وەزیران ژی پشتی وێ یەکێ هاتیە دوهی ناڤهاتی دگەل سەرۆکوەزیرێن هەرێمێ مەسرور بارزانی کۆم ببوو و ئاماژە دابوو وێ چەندێ کو فراڤینەکا خۆش و بەرهەمدار ل گەل سەرۆکێ حکومەتێ هەبوو.
کۆمبوونا سەرۆک و جێگرێ سەرۆکوەزیران کارڤەدان پەیداکربوون، هەردو وەلاتێن ئەمریکا و بریتانیا و هژمارەیەکا وەلاتان خۆشحالیا خۆ ب وێ کۆمبوونێ دیارکربوون.
سەرۆکێ هەرێما کوردستانێ چەندین جارا داخوازا ڤەگەریانا تیمێ ئێکەتیێ کربوو، گاڤێن پێدڤی ژی بۆ ئاساییکرنا پەیوەندیان هاڤێتبوون.[1]