بنەچەو بەگزاڎەکا هۆرامانی
بەشۊ ۋیس و ششەمۍ

حەمەمین سان:
حەمەمین سان پیێوە خاوەن ۋیروباوەڕو نیشتیمان پەرۋەر بېیەن، وەختێ (دکتور موصەدیق) وەراۋەر بە (حەمەڕەزا شاو پەهلەوی) شوڕشش بەرپاکەرد جە تاریخو (29/4/1951ز) بی بە سەروک ۋەزیرانو ئێرانی، حەمەمین سان و حسێن بەگو وەکېڵی لایەنگیرۍ ئا شورشەیە بېنۍ، پەشتگیریشان جە کابینەو حکومەتەکەیش کەردە، دمای خېزیای شوڕشو ئەیلوولی ساڵەو (1961ز) ، حەمەمین سان ئامان پەی کوردەسانو ئێراقی جە ناوچە ئازاڎکریاکانە نیشتەجا بی، هەرچن دەسەڵاتدارۍ ئێرانی هۆڵېشا دێنۍ گېڵناشۆ، بەڵام ئاڎ قایېل نەبېیەن، تاکو سەردەمو ۋڕارەی ڕژېمو (عەبدولکەریم قاسمی) ساڵەو (1963ز) ئێراقەنە مەنەنۆ، عەینو ساڵۍ باڵیوزخانەو ئێرانی جە شارو بەغڎای داواش ۋەنەکەرۊن کە بگېڵوۋە پەی ئێرانی، حەمەڕەزا شا چن پەیمانېش مڎۊ پەنەو قەرارو چەنەۋەشبېیەی و پلە بەرزکەردەیۆش پەی بەرکەرۊن، ئاڎییچ مەگېڵۊۋە پەی ئێرانی.
وەختێ (قادری نامدار) ساڵەو (1963ز) ناوچەو هۆرامانو لهونی دژ بە ڕژېمو پەهلەوی دەسشدان چەکی، حەمەمین سان پېوەڼیش پۆۋە کەردەن، حەمەمین سان چېرەنە خەریکو هەرمانۍ ڕېکۋستەی بېیەن دژ بە ڕژېمو پەهلەوی، شانێوە نیهانیش ۋەشکەردەن، پېوەڼیش چەنی ناڕازیەکا ئێرانی گېرتەن، ساڵەو (1968ز) تەیموور بەختیار کە ئوپوزوسیونێ ئێرانی بېیەن، نامێۋە مەکیانۊ پەی حەمەمین سانی، ڕانە نامەکۍ مەگنۊ دەسو ساۋاکو ئێرانی، ئاشکەرێ مەبان و گرد گېریان، هامکارەکېشا بە زیڼانیێ توولانی حوکم دریان، حەمەمین سان و زوراب بەگو لهونی و ئەمین بەگو لهونی بە قەنارەدای حوکم دریا، بەڵام بە مەڵامەتو بەتەمەنیشان حوکمەکەشان فاڕیان پەی دە ساڵا زیڼانی، ساڵەو (1983ز) حەمەمین سان کوچی دمایینش کەردەن.[1]