بنەچەو بەگزاڎەکا هۆرامانی
بەشۊ ۋیس و یەرەمۍ
ڕوسەم سان:
یۊن جە سانە بەنامبانگەکا هۆرامانی، هەر جە سەرەتاو دەسبەکاربېیەیشەنە هۆڵېش دێنۍ سزاو ئا کەسا بڎۊ هەکە دەسشان بېیەن جە کوشتەو تاتەیشەنە (حەمەسەعیڎسان) ، بەڵام بە هېمنی و بە نەرمی هەرمانەکۍش کەردەن، سەرەتا نامۍ ئا کەساشە نویستېنە کە دەسشان بېیەن جە کوشتەو تاتەیشەنە، دمایی جە نیمەشەوێنە گردش گېرتېنۍ و قوڵبەسېش کەردېنۍ و ۋستېنېش زیڼان، بەپاو سەرچەمە تاریخییەکا ئانۍ کە زیڼانی کریێنۍ، تەنیا یۊشا بە زیڼەیی نەزیانەرە، ڕوسەم سان پەی دیڎەنی حەزرەتو (شېخ عومەرو بېیارۍ) چەنی ژمارێ جە تفەنگچییەکاش ڕوەشکەردېنە بېیارۍ، چېرو ساباتەکۍ شېخ عومەرینە خەریکۍ واتەوگۊشگېرتەی بان، چا عانەنە (جافر بەگ) ی براش کە وەڵتەر جە دەسو ڕوسەم سانینە ڕەمانو ئامان پەی بېیارۍ، چەمش مەگنۊ پەنەشان، فرە تەرسۊ، بەڵام حەزرەتو شېخ عومەری چڕۊش، ماچۊ بۊ نیشەرە، ئاڎییچ مێ، شېخ پەنەش ماچۊ: وەختێ کەردیما بە سانو هۆرامانی، ئانېچ کە ئیساتۍ دژمەنېتەنۍ مەبان بە دۊسېت و بە گۊشت کەران، (ڕوسەم سان) پا قسۍ فرە بېتاقەت بۊن، تەرسیش مەنیشۊ ۋەنە، چونکم خاس مزانۊ کە شېخ عومەر هەر جە وېشۆ قسۍ نمەکەرۊن، کەراماتێش پەنەن، ڕوسەم سان جە لاو وېشۆ پیلانێ مجۊرە پەی ئانەی براکەیش (جافر بەگ) ی بکشۊن، ماچۊ ئی برامە مەبۊن بە سەرەوەرەم.
ڕوسەم سان ساڵەو (1310ک/ 1892ز) چا عانەنە کە خەریکو زەماۋەڼەو هامسەرگیری بېیەن چەنی کناچێ هاوارییۍ، بە دەسو (حسێن بەگ کوڕو مسەفا سانی دوەمی) ئەشناسیا بە (حسێنە زەرد) ی کوشیان.[1]