تارېخو ئایینو یارسانی
بەشۍ سی و چوارەمە

عەلی قەلەندەر، یۊن جە پیرەکا یارسانی، تەمەنێش خەرج کەردەن ڕاو یاونای ۋیروباوەڕەکاشەنە، کە بە شېعرۍ بەرش ۋستەن، فرەو بەیتە شېعرەکېش ئینێ دلۍ کتېبو سەرنجامینە. باس جە باوەڕو دۆنا دۆنی کەرۊن، ئاڎ گیانو وېش بە هینو پېخامئاوەرا، پاشاکا، ئیمامی عەلی، حسێنی کوڕیش مزانۊ، کە بە دۆنادۆن ئامان پەیش.
عەلی قەلەندەر ماچۊ:
گەردی دۆنا دۆن
مەی بوانیم، گەردی دۆنا دۆن
ئامایم دۆن وە دۆن، بېگاندیم ئەوشوون
ئیرەج بییانم، پووری فەرەیدوون
ماناش:
من ئیرەجو کوڕو فەرەیدوونۍ بېنا، بە دونا دون ئامانۍ تاکو یاوانۍ ئېگە.
دیسان عەلی قەلەنفدەر مچۊ:
مەستی مەی نۊشەن
عالینان عالی، مەستی مەی نۊشەن
هەر وەخت کە جیهان، وە هەم مەخرۊشۊ
چاکەی ناو دەم دا، یا ساقم کېشۊ
سیاوەحشەنان ، هوونم مەجۆ شۆ
قاف تاکو قاف جیهام، وە هەم مەخرۊشۊ.
ماناش:
من مەسسەنا، مەسسو مەینا، گەردوون گرد مەخرۊشیۊ، گردو چېویم وەنە مەنام کریان، پېسە سیاوۋەحشی ۋنیم خرۊشیۊ، جە قاف تاکو قاف (چیسەرو دنیێوە تاکو ئۆسەرو دنیێ) دنیا گرد مەخرۊشیۊ.
عەلی قەلەندەر ماچۊ:
سەر چەوېمێنان
عالینان عالی، سەر چەوېمێنان
میهتەران گرد بەیان بێدەیمێ گۆوا
ئەزی حوسێنان پووری شەهنشا
سەرچەوېمێنان: ئاگام جە وېمەن، من هۊشیارەنان، سەردارەکۍ گرد بەیان شاهېڎی بڎان، من حوسێنەنا کوڕو شاهنشای.
دیسان ماچۊ:
تەن وە بۍ سەری
عالینان عالی، تەن وە بۍ سەری
جە ئەزەل پەرۍ، غەم وەستن بەری
ئەز ئیمام حوسێن، پووری حەیدەری
لاشەی بۍ سەرە، من بەرز و بڵندەنا، جە ئەزەلۆ پەی خەمی خولقیانا، من ئیمام حوسێن، کوڕو حەیدەرینا.
عەلی قەلەندەر ماچۊ:
شام بی وە مهمان
عالینان عالی، شام بی وە مهمان
چەنی نوهسەدە، باش قەلەندەران
بابا تاهیر بیم، مێردی هەمەدان
من بەرز و بڵندەنا، شا بی بە مېمانم، نۊسەڎ نەفەرۍ جە قەلەندەرا، مېمانېم بېنۍ، من بابا تاهیرەنا، خەڵکو هەمەڎانی.
عەلی قەلەندەر ماچۊ:
ئەو کۊ بەسەوی
عالینان عالی، ئەو کۊ بەسەوی
بەرادەران چەنیم، کەردەن غەدەوی
یووسف بیبانی پووری یەعقووبی
ماناش:
من حەزرەتو یوسفی بېنا، من بڵندەنا، برێکېم بیۍ بە دژمەنېم.
عەلی قەلەندەر ماچۊ:
مەست و دېوانە
عالینان عالی، مەست و دېوانە
یورت وە یورت یاوان، یانە وە یانە
خۊشحاڵ ئەو گەلە عالی چۊبانە
من شوانو ئی گەلەینا، من بڵندەنا، یانە بە یانە مەگېڵوون، ئی گەلە بەختیارەن.[1]