(46) ساڵ ئاوێتەی گیانمان بوویت!
ئامانج غازیئامانج غازی بۆ مامۆستا
زرار محەمەدزرار محەمەد
- ساڵی 1975: لە ئێران و ئاوارەیی گەڕایتەوە؛ من ئەوسات تەمەنم دە ساڵان بوو کە بۆ تیپی سرودی قوتابخانەی پاشای گەورە هەڵتبژاردم.
- 1976: فێری خۆشەویستیی خاک و نیشتمانت کردم.
- 1977: تیپی موزیکی پاشای گەورەت دامەزراند و، ئامێری (عود) ت خستە باوەشمەوە و پێت وتم: ئەوە ئاییندەتە ئامانج.
- 1978: لە
رواندزرواندزی مێژووەوه، بەرەو
هەولێرهەولێری باپیرت بردین، تا بە شێوازی ژەنین لەگەڵ تیپەکانی تردا ئاشنا بین.
- 1979: پلەی یەکەممان لەسەر ئاستی ئێراق لە شاری (سەماوە) ، لەگەڵ چالاکیی قوتابخانەکانی هەولێر بەدەست هێنا وبە شکۆوە گەڕاینەوە ڕواندز.
- 1980: بۆ ئەوەی لە پەیمانگەی هونەرە جوانەکان وەربگیرێین، بە چلەی هاوین لەگەڵماندا هاتی بۆ بەغدا؛ دواتر (من و چەتۆ و سەید ئەحمەد) لە موسڵ گیرساینەوە.
- 1981: ئەوەی لە ڕواندز لەسەر موزیک فێرببووین، کارێکی کرد کە زانیارییەکانی قۆناغی یەکەمی پەیمانگە هەر هەمووی بۆ ئێمە دووبارە بێت. چەند گەورە بوویت ڕابەری هونەر! هەر لەم ساڵەدا (سیروان و شێرزاد) ت لە کاروانی دووەمدا بۆ پەیمانگەی موسڵ بەڕێ کرد.
- 1982: سێیەمین کاروانی بەهرەدارانت بۆ موسڵ ڕەوانە کرد و (فاڕوق و کارۆخ) گەیشتنە لامان. هەر لەم ساڵەدا خۆمان بۆ بڵاوکردنەوەی بەرهەمی تیپی مۆسیقای پاشای گەورە، ساز و ئامادە کرد.
- 1983: زۆر بە نهێنی و ورەوە پێت وتم: دەستنیشانم کردوویت تا ببیت بە ئەندامی یەکێتیی هونەرمەندانی کوردستان لە شاخ. ئای خودایە ئەوسا (نیشتمان) بۆ هەمووان چەند پیرۆز بوو!
- 1984: نۆبەرەی بەرهەم و شاکاری هونەریی تیپی موزیکی پاشای گەورە، چاوی لەنێو ناوەندی هونەریی کوردستاندا هەڵێنا و، جارێکی دیکە ڕواندز تیرۆژی داهێنانی بەرکەوتەوە. هەر لەم ساڵەدا نەوەی دووەمی بەهرەداران هاتنە نێو کۆڕی خەباتی هونەری.
- 1985: بە پلەی نایاب لە پەیمانگەی هونەرە جوانەکانی موسڵ دەرچووم و هاتینەوە شار و قۆڵی خزمەتمان لێ هەڵکرد. ئەوە بوو (ئۆرکسترای پاشای گەورە) بۆ یەکەمین جار لەسەر ئاستی کوردستان، چەندین بەرهەمی موزیکی جیهانیی، لە هەولێر پێشکەش کرد.
- 1986: گۆرانی و موزیکی تیپی مۆسیقای پاشای گەورە گەیشتە ئێزگەی کوردی لە (بەغدا) و، دواتر لە تەلەفزێۆنی (کەرکووک) یش بەگەورەییەوە پێشوازی کراین.
- 1987: بەو دەست و پەنجە زێڕینانەت، سەرجەم بەرهەمە هونەرییەکانت تۆمار کردن. هەر ئەم ساڵەش ئێزگە و تەلەڤزیۆنی (موسڵ) باوەشی بۆ کردینەوە.
- 1988: لە گەرمەی (ئەنفال و کیمیابارانی
هەڵەبجەهەڵەبجە) دا، بڕیارێکی مێژوویت دا، بەوەی کە سەرجەم ئەندامانی تیپی مۆسیقای پاشای گەورە بچنە خەباتی شاخ و لەوێدا درێژە بە خەباتی هونەرییان بدەن. دواتر وا بە باش زانرا، کە مانەوە لە شاردا بەرگرییەکی بێوێنەیە لەو سات و سەردەمەدا.
- 1989: بە دەیان شەو بەنهینی و دوور لە چاوی ڕژێمی بەعسەوە، سرود و گۆرانیی خۆڕاگریت بۆ (فاتیمە و کاڵێ و بەکر لەگزی و نەجمەدین غوڵامی) و هونەرمەندانی پێشمەرگە تۆمار کرد و تیپی مۆسیقای پاشای گەورە، چووە قۆناغێکی تری خەباتی سیاسی و هونەرییەوە.
- 1990: بەناچاری و دوای گفتوگۆیەکی گەرم و خوێندنەوەی پێشهاتەکان، پێت وتین: تەنیا ڕێگا لە بەردەمتاندا ئەوەیە، کە بچنە خزمەتی سەربازی، تا دواتر بتوانن درێژە بە خوێندن بدەن: (من و چەتۆ و سەید ئەحمەد) .
- 1991: ڕاپەرین بوو بە مەشخەڵێکی نوێی وەچەرخانی هونەریلە سەرتاسەری کوردستان؛ تۆی ڕابەر و پەروەردەکار و هونەرمەندی بەئەزموون لەنێو جەرگەی ڕووداوەکاندا بوویت.
لەم ساڵەدا، تیپی مۆسیقای پاشای گەورە، وەک یەکەم تیپی دوای ڕاپەڕین، هونەری بەرگری پێشکەش بە جەماوەری ئاوارە و کۆچڕەوە ملیۆنییەکە کرد. ئەوێ ڕۆژێ ئاهەنگەکانی (شوان پەروەر) و (ناسڕی ڕەزازی) عەرشی ڕژێمی بەعسیان دەهەژاند و، ڕواندز بووبوو بە هەواری سەرکردە و جەماوەری خۆڕاگر و پێشمەرگەی نەبەرد.
- 1992: خەونی لەمێژینەی تۆ بەدی هات: پەڕڵەمان و حکومەتی هەرێمی کوردستان دامەزران.
- 1993: ئاهەنگی سەرکەوتن و خۆڕاگری و نیشتمانپەروەری، دروشم و باوەڕی گەورەی ئێوە بوون مامۆستای گەورەمان. لەم ساڵەدا نەوەی سێیەمی بەهرەمەندانی ڕواندز گەیشتنە کاروانی خزمەتی هونەریی موزیک.
- 1994، 1995، 1996: شەڕی ماڵوێرانکەری براکوژی، خەون و خۆزگە و ئێستا و ئاییندەی پوکاندەوەولە بار برد! بیرمە بەحەسرەتەوە پێت وتم: هونەرمەندی خاوەنهەڵوێست، دەبێت هەمیشە پارێزەری خاک و نیشتمانی خۆی بێت. ناشێت ببێت بە دەستوپێوەندی حیزب. پێت وتین: زۆر وریای خۆتان بن؛ هەڵنەخلیسکێن!
- 1997: پەرتەوازەبوونی هونەرمەندانی تیپی مۆسیقای پاشای گەورە و دابەشبوونیان بەسەر حیزبەکانی کوردستان و، ڕەنگدانەوەی ئینتیمای تەسکی حیزبایەتی لەسەر ڕەوتی کار و چالاکییەکانی تیپ!
ئەمە تۆی زۆر نیگەران کرد و، دەستەڵاتدارانیش درێخیان لە ڕاکێشانی ئەم و ئەودا نەکرد بەلای خۆیاندا.
- 1998: هەوڵ و کۆششی نەپساوی هەندێک لە ئەندامانی خەمخۆری تیپەکە، بۆ ڕاستکردنەوەی باری لاری دۆخەکە و دەست کردنەوە بە چالاکییەکانی تیپی مۆسیقای پاشای گەورە، هیچی وای لێ سەوز نەبوو. چونکە حیزب چووبووە بنکڵێشە و بەداخەوە هەندێک لە ئەندامان هەڵخلیسکان!
- 1999: ئێستاش لەبیرمە لە کۆمەڵەی هونەرە جوانەکان دانیشتبووین؛ پێت وتین: دەبێت هەندێک گۆڕانکاریی ڕیشەیی لە تێڕوانینی ئێمە بۆ قۆناغی دوای ڕاپەڕین بکرێت، ئەگەرنا پاشاگەرادانیی هونەریی ڕاماندەماڵێت!
- 2000: نەوەی چوارەمی منداڵە چاوگەشەکانی ڕواندز، بە دەستە و پەنجە و ئامێرەکانیان، گڕوتینێکی گەورەیان بەخشییە هەوڵەکان و، ئاماژەکانیان نامەیەکی کراوە بوون بۆ ئێمەمانان، تا دووبارە بگەڕێنەوە سەر چالاکییەکانمان.
- 2001: دوای (26) ساڵ ئاشنایەتی لەگەڵ ڕۆحی پڕ لە سۆزت، ئەم ساڵە هەستم کرد، کە ئومێدی ئەوەیان لە چنگ دەرهێناویت، کە بتوانین جارێکی دیکە پێکەوە لەژێر چەتری داهێناندا، موزیک بکەینەوە بە ڕەشماڵی هونەری.
- 2002: لەنێو جەنجاڵی ژیان و نەهامەتییەوە، خوێندنەوە و نووسین بۆ ئێوە تاکە هیوای گەیشتن بووە بەو خۆزگانەی لە بوار و ژیانی سۆزداری و ئەڤینییەوە لەدەستت دان مامۆستای گەورەمان.
- 2003: حوکمی بەعس کەوت. لەم ساڵەدا هەستم دەکرد دەتەوێت لە بوارێکی دیکەدا، بە گڕوتینێکی جیاوازتر خزمەتی نەپساوەتان درێژە پێ بدەن. هێندە سادە و خاکەڕا بوویت، هیچ نهێنییەک پەی پێ نەدەبردیت.
- 2004: باش بەبیرمە، ڕۆژێکی ساردوسڕی خەزانی ئەم ساڵە بوو، بە هەردووکمان خەریکی کۆکردنەوەی هەوڵە شکستخواردووەکان بووین، بۆ دووبارە کۆکردنەوەی ئەندامانی تیپی مۆسیقای پاشای گەورە. بۆ دڵدانەوەی تۆی گەورەش هەرچی (بەکرە و کاسێت و ئەرشیفی گۆرانی) ، کە هەبوو لە کۆمەڵە، گواستمانەوە ژوورە بێنازەکەتان.
- 2005: وەک ئەحمەدی شاملۆ دەفەرمووێت: ببورە باران، تۆ هەر دەباریت و ئێمەش پاک نابینەوە! داخی گرانم! نەمتوانی چاکەی شەونخوونی و گیانفیدایتان بدەمەوە و، وەفا بۆ ئەو ماندووبوون و هیلاکییەتان بنوێنم.
- 2006: لەسەر دانانی پەیکەری عومری پڕئەسرینت لەنێو شاردا، خەریکبوو دۆست و خۆشەویستان تەقە لە سێبەری یەکتری بکەن! ئەمەشیان تەنیا بۆ ڕازیکردن و بەدەستهێنانی دڵ و ئافەرینێکی سەرووی خۆیان بوو! بەڵێ! دەیانویست گەورەیی هەنگاوەکانت ڕابگرن. هەزار حەیف!
- 2007: چاوە شەکەت و ماندووەکانت گلەیی ئەوەیان لە گوێچکە پڕ هەستەکانت دەکرد، کە ناتوانن لەو سات و وەختە ناهەموارەدا، فریای هەناسە پاکەکانت بکەون. چ دۆزەخێکە ئەم ژیانە!
- 2008: دەستنووس و هەندێک لەسەرە قەڵەمەکانی پەڕتووکی (هونەر لە ڕواندزێ) ت، لەنێو هەگبە و دەستە پیرۆزەکانتدا، بەگەورەییەوە گەیشتنە نێو دەستە لەرزۆکەکانم و بەتاسەوە لێم وەرگرتیت گەورەم.
- 2009: بۆ کردنەوەی پەیمانگەی هونەرە جوانەکان لە ڕواندز، زۆر بەپەڕۆشەوە پێت وتم: بە هەموو توانایەکت، تەنانەت ئەگەر تەنازولیشتان پێ کرا لە هەندێک شت، ئەوا کۆڵ مەدەن و با ئەو پڕۆژەیە سەر بگرێت.
- 2010: گلەیی ئەوەت لێ کردین کە بەها پیرۆزەکانی هونەرمان پێشێل کرد و، نەمانتوانی لەگەڵ یەکتریدا خۆمان لە هەژموونی حیزبەکان ڕزگار بکەین.
- 2011: کە (پەیمانگەی هونەرە جوانەکان) ی ڕواندز کەوتە نێو کۆشی شارەوە، تۆ بەگەورەییەوە بەرەوپیری چوویت و تا بە هەموو توانایەکتەوە دەستی بگریت و لەسەر پێی خۆی بوەستێت.
- 2012: ڕێزلێنان و ڕوولێنانت لە شارەکانی تری کوردستان، ئەو ڕاستییە گەورەییەی بیر هێناینەوە، کە تۆ هەردەم بەتەنگ کەلەپور و کولتووری میللەتەکەتەوە بوویت. چ شانازییەکی گەورەیە!
- 2013: مرۆڤی ڕابەر، هەرگیز لە هەڕەشە و پەراوێزخستن نەترساوە، ئەمە تۆ بوویت کە باکت بە هیچ شتێک نەبوو، چونکە تۆ بەتەنیا موڵکی خۆت و نەتەوەکەت بوویت.
- 2014: وەکوو هەڵگری نهێنییەکانی هونەر و مێژوو و بەسەرهاتی جەرگبڕی ڕواندز، زامەکانت قوڵتر و تێڕوانینەکانت وردتر بوون بۆ ئاییندە، بۆیە هەمیشە وەک مەرجەعێکی هونەری جێگای متمانەی هەمووان بوویت.
- 2015: لە مانگی چوار ئەم ساڵەدا، کۆمەڵێ نهێنیی گەورەی نێو هونەرتان بۆ باس کردم، کە دواتر وەکوو پەند لە ژیانی ڕۆژانەمدا ڕەنگیان دایەوە. ئەمە هەر لە ئێوە چاوەڕوان دەکرا.
- 2016: بەبێ جیاوازی، بەبێ سڵکردنەوە، بەبێ گوێدانە ئەملا و ئەولا، گەیاندنی پەیامی پیرۆزی هونەر و ڕاستگۆیی، لە ڕەوتی کاری هونەری و ئەدەبیدا، تاکە ئاوات و خۆزگەتان بوو.
- 2017: برینە ساڕێژنەبووەکانت لەوەی جارێکی تر، تیپی مۆسیقای پاشای گەورە بەشکۆوە لەسەر شانۆ ببینیتەوە، تا ئەمساڵەش هەر بەسوێ بوون.
- 2018: پێڵوی چاوەکانت، هەستی بیستن و گوێگرتن لە خۆشەویستان، گەورەترین بەربەست بوو لەوەی هەموو خەڵک لە ئاواتەکانت بگات. ئەمە چ ئازارێکی تاقەتپڕوکێنە!
- 2019: لە دەڤەری پڕ میهر و جوانی و خۆشەویستیی خەڵکەوە، کە بە بازاڕی شاردا گوزەرت دەکرد، بەسەرسامییەوە خەڵک لە هەنگاوە پڕ شکۆیەکانت ڕادەمان و خۆزگەیان بەو ژیانە پڕ بە بەرپرسیارییەتەدا دەخواست!
- 2020: ئەوەی لە مرۆڤێکی (83) ساڵیدا بەدیم کرد، ئەو گەشبینییە بوو، کاتێک پەڕتووکێکی تازە چاپکراوی هونەریم بۆ دەهێنایت، بەتاسەوە وەرتدەگرت و بەئەسپایی پێت دەوتم: خەمت نەبێت ئامانج، بە زەڕەبینەکەم دەیخوێنمەوە!
- 2021: کێ دەیزانی تراژیدیای مەرگ، لە کۆتایی ڕۆژەکانی ئەم ساڵەدا، فریشتەیەک لە جاڕدانی بانگی هونەر و داهێنان و پەڕتووک و شانۆ و موزیک و شێوەکاری و کارامەییدا کپ دەکات و بە گەروی پڕ تاریکی ژیندا دەیبات!
دڵنیا بە ڕابەری هونەر لە ڕواندزێ، ئەم پانۆرامایە ناوەستێت و هەموو ساتێک تۆ لێرە سەرقافڵەی هونەریت و ئێمەش قوتابیی بەوەفات.
[1]