تارېخو ئەدەبیاتوو یارسانی
بەشۍ ویس و ششەمە
ئەفسانەو دڼە هەناری:
پیر میکائیلی دەودانی مامۊزاو سوڵتان سەهاکی بېیەن، دمای ئانەی کە مەبۊن بە یۊ جە یارە هەرە نزیکەکا سوڵتانی، (سارێ = شارێ) کناچېش پېشکەشە کەرۊن، چا ماوەنە سوڵتان دارو دەسو شا ئیبراهیمی (کە هەڵای زارۊڵەن) مڎۊ دەسو پیر ئیسماعیلو گوڵانی پەی ئانەی دلۍ باخو نیهاڵینە بنیۊش، فەرمانو سوڵتانی جابەجا کریا، دماڕۊ دارەکە ڕساو گوڵش گېرتو هەنارش گېرت، هەنارێ ماران پەی سوڵتانی، سوڵتان فەرمان مڎۊ پەی ئانەی جەمخانەنە گلېرۍ باوە، گردو یارا جەمۍ بان، ئانە یەکەمین جەم بېیەن جە پردیوەر کە دمایی نامېشان نیا (نیاز) .
سوڵتان داوامەکەرۊن ئەو پیر بنیامینی پەی ئانەی دۊعاو نیازی بوانۊوە، بەڵام جە حوزوورو سوڵتانینە پەیش هۊرنەسووڕیا، سوڵتان ڕوەشکەردە داوودی و پیر مووسای، ئاڎییچۍ پەیشان نەکریا، ئینجا ڕوەشکەردە چڼێ جە یارەکاش، بەڵام بۍ سوود بی، کەسشان پەیشان نەکریا، ئیتر سوڵتان فەرمانشدا سەیید محەمەدی گۆرە سوارەو کوڕیش داواکېش جابەجا کەرۊن، ئاڎ دەسشکەرد بە وانایۆ دۊعاو نیازی:
وە ئیشارەی شا، وە فەرموودەی یار
وە شەرت بنیامین، پیری سەر قەتار
وە ڕازی داوود، ڕاهنمای کوففار
وە قەڵەم زەررین، مووسای دەفتەردار
وە قەدری حیشمەت، موستەفای زۊردار
وە خدمەت کەردە، پاک پیری ڕەزبار
وە نازی جەمعی، ئولیای نازدار
وە نازی جەمعی، ئاولیای عەتتار
( عطار نیشابووری )
هەر جە ڕۊژ ئەزەل تا یەومولشمار
( یوم الشمار -- یوم الحساب )
کەردەیی یارسان، سەف بۊ نە تۊمار
دمای ۋانایۆ دوعێ، هەناری مڎان وەرخزمەتو داوودی پەی ئانەی بەششکەرۊن ملو ئاماڎەبیا جەمیرە، ئاڎییچ بەشش کەرۊن، بە ڕېککۆت دڼە هەنارێ مەگنۊ درزەو فەرشەکا، دمای چۊڵبېیەی جەمخانەی، (شارێ) دەسکەرۊ بە پاککەردەیۆ یاگۍ جەمەکەی، وەختو گزیداینە دڼە هەنارەکەی مېزۊۋە، هۊرشگېرۊوەو منیۊش دلۍ دەمیش، دمای موددەتێ لەمەش پەڕەبۊ، ئینجا جە دەمشۆ کوڕێ جە ئەڎێ بۊن، پەڕجۊیێ تەرو کەردگاری بەرمەگنۊ.
سوڵتان فەرمان پەی داوودی بەرکەرۊن کە زارۊڵەکەی پەی ماوەو یەرۍ شەو و ڕوۋا ۋزانە دلۍ تەنوورۍ، دمای یەرە ڕوەکەی سەرو تەنوورەکۍ بەرزکەراوەو زارۆڵەکە هۊرزۊوە سەرو پەیا و سڵام ئەو سوڵتانی کەرۊن:
یادگاری یار، ئوسا بیش مەنزوور
پەرۍ نیشانە، نیاش نە تەنوور
نیاش نە تەنوور، نە شەرارەی نار
فەرما وە داوود، سەر تەنوور بنیار
سێ ڕۆژ سەبرش کەرد، داوودی ڕەهبەر
نیازش وەرکەرد، ئاما وە نەزەر
فەرما وە داوود، نە عەینم باوەر
دیش ئاما وە سەر، پادشای پردیوەر
یادگار جە تەنوور، ورێزا ئەو پا
وە لەفزی شیرین، سڵام دا وەشا
بەرگی خود ڕەنگی، کەرد وە خەڵاتەش
تەمام کوردستان، کەرد وە بەراتەش
پاسە بەرمەگنۊ ئانەی کە ۋزیانەنە دلۍ تەنوورە بڵېسەدارەکۍ (بابا یادگار) بېیەن، کە داوودی ۋستەنەنە، دمای یەرۍ شەو و ڕوۋا بەرشائاردەنۆو سڵامش کەردەن پاشای.
پەڕجوو (موعجیزەو) پېڎابییەی بابا یادگاری پېسەنە پېڎابیۆ حەزرەتو عیسای.[1]