تاریخو ئەدەبیاتو یارسانی
بەشۍ ویس و چوارەمە
جە شېعرێشەنە سوڵتان سەهاک باس جە چل تەن، یانی چل فریشتا و داوودی کەرۊن:
ناز ڕەوای یاران، ناز ڕەوای یاران
حوسێنی شەهید، ناز ڕەوای یاران
توحفەی عەجوز ڕەنگ، تەبرېز شاران
قەرینت نېیا، هەوا هەواران
داوود سەر قەتار، چل تەن چلانە
شەفەق کېش سوبح کە بوو نیشانە
سوبح و ڕۊ ڕەنگن، جەو ڕای دېوانە
حەواڵەن بارۊ، پیروەی مەکانە
ماناش:
ناز کەردەی شایەستەو یاران، حوسێنی شەهید، ناز کەردەت شایەستەو یاران، نەختینەو زەمینی شارو تەورېزیەن، وېنەو تۊ نېیەن جە هیچ جاو مەکانێ، داوود سەرقەتارەن، چل کەسەکۍ ئینێ دلۍ ئاڎیینە، شەفەقو ساعبی بېیەن بە نیشانېشا، سەحەر و وەرکۆت ڕەنگەو دېوانەی مرمانا، بابا گۆرە گوزەر مەکەرۊن پەی ئا یاگۍ.
سوڵتان سەهاک جە شېعرێ تەرەنە، باس جە حۆتەوانەی کەرۊن، جە ڕاسینە حۆتەوانە مەخسەڎش حۆت یارەکۍ سوڵتانی، کە یارمەتیدەرېش بېنۍ پەی ڕاوەبەردەی بەشو گیانیی ئایینو یارسانی، حۆتەوانە ئینۍ بېنۍ:
سەید موحەمەدی گەورە سوارە
سەید ئەبولوەفا
سەید باوەیسی
میر سوور
سەید موستەفا
شېخ شەهابەدین
سەید حەبیب شا.
ئا دەرگا و پەردە، ئا دەرگا و پەردە
غولامان نیگایکەر، ئا دەرگا و پەردە
بەیان بوینان، وېڵکەران هەردە
جە سڕڕی قودرەت، جە ڕەنگیم کەردە
بیای ساجی نار ئیگام ئاوەردە
غوڵامان وېڵ نەوان، ئی سەراو پەردە
ساز نام هەفت نوور، جام بۍ گەردە
جە ئەزەل مېردان، سەر پېش سپەردە
ماناش:
ئی بەرەو پەردە، غوڵامەکا سەرنجەو ئی بەرەو پەردەیە بڎەیدۍ، با وېنەکۍ دیارېبان چانېشا کە جە کەشۆ گومڕێ بیۍ، جە سیڕڕو قودرەتینە ڕەنگەم دیارەنە، من ساجو ئایېریم پەی ئېگەی ئاردەن، با غوڵامۍ چی سەراو پەردەیە وېڵۍ نەبان، وەشکەردەی حۆت نوورا پېسەنە جامێ بېگەردی، هەر جە ئەزەلۊ قەرارش سەردریان.[1]