تارېخو ئەدەبیاتو یارسانی
بەشۍ دەهەمە
چی بەشەنە سروودەو حەوتەمۍ و هەشتەمۍ پېسە نموونەی و بەڵگەی وزمۍ ڕوە، چوونکم سروودەی حەوتەمە جە بارەو (عەلی) ین، کە بە نەتەوە عەرەبەن، سروودەی هەشتەمەیچ دەربارەو (بابا یادگار) ین ک بە نەتەوە کوردەن، بەڵام مەشوم ئانەی بزانمۍ کە یارسانەکۍ وېشا و گرد سەرکردەکېشا بە نەژاد کوردېنۍ.
سروودەی حەوتەمە:
ئەوەڵ ئاخیر یار
بوا نام سەنای ، ئەوەڵ ئاخیر یار
یار یەعنی مەولام ، ساحیب زولفەقار
ئوستادی ئەزەل ، جە بەڕ تا وە بار
میعماری کەونەین ، سەما سێ و چار
سەمای چار مەلەک ، پەیکی پەیغام ئار
یەک لومەع نووری ، وەرا نام خۆوەر
قەرار دا نە ڕووی ، سەما چوون گەوهەر
یەک نووری هەنی ، قورسی قەمەرەن
موسەوەر نە ڕووی ، عەرشی ئەنوەرەن
ئەختەر بۍ شەمار ، سابیت و سەییار
پەرۍ ڕۊشنایی ، شەبستانی تار
سروودەی هەشتەمە:
یادگاری یار
دەخیلەن ئامان، یادگاری یار
یا زاتی زات پاک سەرداری سەرکار
نازی ناز ڕەواج، ژ پەروەردگار
چلانە چل تەن ، سەبز پۊش نوور پۊش
سەرانەی باقی ، تېژ هۊش ، تېژ گۊش
ڕەواجی هەر دین ، سەر حەڵقەی شاهان
جەمشیدی جەم بەن ، شۊن بەری ڕاهان
ئیرەجی یەحییا ، سیا وەحشی کەی
حوسێن شەهید، نە کەربەلای تەی
عالی قەلەندەر، تاهیر قەلەندەر
هەنی چیش وا چووم، پووری ئەسکەندەر
٭٭٭
یادگار دەخیل، تۊ تاجی شاهی
تۊ تاجی تاجیەخش، جیهان نەمایی
یادگار وە حەق، سوڵتانی سەرجەم
وە ئیسمی سوڵتان ، سەد هەزاران کەم
وە حەققی داوود، ڕەهبەرەن وە نوور
وە حەققی عیسا، مووسای کۊهی توور
وە شای یەرزەمەل، پیرە ڕەنگینەن
پیری ئەو شاهەن، ئیسمەش سەنگینەن
مەتلەبی حاجەت، (فاریغ) ڕەواکەر
وە ساحیب کەرەم ، سوڵتان سەروەر .[1]