باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و ڼۊزڎەهەمە

نەوەشی وەبا و تاعوونی جە شارو مەدینەی و چواردەوریش وەڵا بیەبێ، خەڵک گرد نەوەش، ئەبوبەکر و عومەر و عوسمان و عەلی، یاوەرەکېش، گرد گیرۊڎەو دەردۍ بېنۍ. حەزرەت لاڵا جە پەروەردگاری کە بەڵا و ناوەشی سەرشاوە هۊرگېرۊن، خوڎای گۆرە نزاکېش گیراکەردە، سرووشتو مەدینەی گەشیاوە، نەوەشی بارشکەرد.

بەڵ مەدینە ڕای گشت حیجاز بۍ
هەم پەڕ عەفوونەت گەرم و ناساز بۍ
خوسووسەن غەریب دایېم بیمار بۍ
ئەنگەبین جە لاش چوون زەهری مار بۍ
دایېم هەم وەبا هەر تاعوون تېش بۍ
هەرکەسێ خەریک ناوەشی وېش بۍ
ئەهلی موهاجیر دایەرەی ئەنسار
مەناڵان جە دەرد هەر سوبح تا ئېوار
بووبەکری سیدیق فارووقی ئەعزەم
چەنی زینوورەین دارای موکەڕەم
مورتەزا عەلی ماباقی یاران
بیلال و عەممار شای وەفاداران
دایېم جە سیححەت خار و خەستە بین
خراوتەر جە نېش ماران گەستە بین
پەی مەککەی شەریف هەر خەم مەوەردەن
وە ئەهلی ئینکار لەعنەت مەکەردەن
مەواتەن: شیبە عەتیەی سەرسەف
تا ئەبوجەهل ئومەییە بن خەلەف
ماباقی موشریک گرووی بەڎ حاڵەت
بینای زاتشان یەکسەر وە لەعنەت
تا عەجزی ئەسحاب جەو زەید و ماوا
دەسش بوڵند کەر پەرێ موناجات
لاڵا نە دەرگای قازییولحاجات
وات: یا ڕەب زەواڵ فەردی فەریاد ڕەس
یا کانی کەرەم پەی بۍ کەسان کەس
هەوای مەدینە تەبدیل کەر جە کۊ
هەنی موعتەدیل یا سازگار بۊ
تاکە ڕاحەتبان یاران پەی وېشان
جەو دما وەیتەور عوسرەت نەکېشان
دۊعاش وە هەدەف ئیجابەت یاوا
تەبدیل بیی هەوای ئەو زەید و ماوا
شەرارەی هاموون مەدینەی جاران
بیی بە هەوای سەرد بەرزی کوساران
هەنی نە بۊی بەڎ، نە ناخوشی مەند
جە هامن سەردیی زور جە گەرمیی سەند
سەحابان نیشتەن ڕاحەت پەی وېشان
هەنی وە شاڎیی گرد ویەرد لېشان.[1]