باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و هەژدەهەمە
یەهوودیەکۍ جە مەدینە تا شام ساڵانە یەک ڕۊ ڕۊچۍ گېرېنۍ، حەزرەت جە سەبەب ئا ڕوە پەرساش، واتشان ئانە ڕۊچۍ ڕزگاری بەنو ئیسرایلینە جە دەسو فېرعەونی، جە ڕزگاربیێشان جە زوڵم و زۊرو زالمی. دماتەر ڕۊچۍ مانگەو ڕەمەزانی واجیبە کریا سەرو موسوڵمانا.
بەل مورادی ساڵ دیسان جە هیجرەت
چن واقیعات دیی وە بۍ کدوورەت
حەزرەت دیش یەهوود مەدینە تا شام
ڕوزەی عاشوورا مەگېران تەمام
حەزرەت جە سەبەب ئەو ڕوزەداران
پەرسا جە یەهوود ئەهلی مەی خواران
واتشان: بەڵۍ فەزڵش عەزیمەن
جەزاش لەزایز باغچەی نەعیمەن
ئەو ڕوژ کە فیرعەون غەرقی دەریا بی
مووسا جە قەفەس بەو تەور ڕەها بی
جە شوکرانەی حەقق ئەو مەعرەکەی جەنگ
خەلاس بیی جە ئەو گومڕای دڵ جە سەنگ
ئەو ڕوژ کە ڕوژەش گرد بە فەراغەت
پەرێ ئوممەتش هەم بیی بە عادەت
تاکە ڕوزەی فەرز ڕەمەزان یاوا
ڕوزەی عاشوورا جە کول بی ئاوا
ڕەغبەتش نەمەند جە لای خاس و عام
ئەو بیی بە سوڼەت پەی ئەهلی ئیسلام[1].