باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و هەشتا و نۊهەمە
بریدە، چەنی حەفتا نەفەرەکەی وەختێ یاوا وەردەموو حەزرەتی، سەرسام مەند، حەزرەت چەنەش پەرسا جە نام و هوز و قەبیلەش، ئاڎییچ پېسە وېش پەیش ڕۊشنکەردۆ، ماچۊ من هوزو قوڕەیشی جە برۍ بەردەنا، کیاستەناشا پەی قەتڵی تۊ، بەڵام پەشیمانەنا.
ئیسە نا پەیدان نەدارو ئەسەر
نمەز جە کام ڕا، کەردەنش گوزەر
حەزرەت حاڵی بیی جە ئەحواڵی ئەو
دڵ وەشکەرد جە نام فەرەح حاڵی ئەو
ڕوو کەرد وە سیدیق فەرما ئەی ڕەفیق
وە(حسب الخوای) تون کاران وە تەحقیق
حەقق ئاواکەردەن ئەی زېد و ماوا
ئوموری ئېمە بە ئەنجام یاوا
باز جە (بریدە) هەم پەرسا خەبەر
جە کام قەبیلە مەردی دلاوەر
وات: ئومی سەلمەن نامی قەبیلەم
بە خوڎا من دڵساف بۍ مەکر و حیلەم
حەزرەت سەلمەش ئیزهار کەرد بە دڵ
واتش: بە سڵامەت مەشیی وە مەنزڵ
باز حەزرەت پەرسا جە کام قەومەنی
حەیف تۊ بۍ سەڵوات هەم بۍ سەومەنی
واتش: من جە تۊ پېڎا بیی وە هەم
جە ئەسڵ و نەسەب جە بەنی سەهمەم
فەرما سەهمی تۊ گرد بەرشیی وە بەر
هەنی نەمەندەن جای کینە و کەدەر
(بریدە) جە سام سەنگینی حەزرەت
جە لوتفی گوفتار شیرینیی حەزرەت
خەیلێ حەیران مەند واتش: یەکێ بۊ
وەیتەور خۊش کەلام خوشڕەنگ و خوش بۊ
عەرز کەرد تۊ کېنی ئەی بوزورگەوار
نامۍ تۊ چېشەن جە ڕووی ڕوژگار
حەزرەت فەرماوا مەرفەعوڵڵام
محەمەد ڕسوول ئیبنی عەبدوڵڵام.[1]