باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و شەسس و ششەمە
قوڕەیشیەکۍ ئا شەوە چواردۆرو یانەو حەزرەتیشان گېرت، بە نیازو کۊشتەیش، بەڵام بە نیگایێ پەی دڵو حەزرەتی، پەنەش واچیا بزیەرەو لوە، حەزرەت پەناش بەردە بە عەلی ماموزایش، فەرماواش: تۊ پۊشاکەکەو من بپۊشە، یاگەکۍ منەنە بووسە، هیچ تەرسێت نەبۊن، خوڎای لامەکان هاگاڎارتەن، عەلی گوفتەکەو حەزرەتیش بەجائاوەرد.
جەو تەرەف قوڕەیش گرووی زېبا و زشت
یەکسەر وە هەیئات ئیجتیماعی گشت
نە دەوری سەرای موستەفای ئەمین
وېنەی ئېشکچی گرتشان کەمین
حەزرەت حاڵی بی جە وەهلە نەبەرد
پەنا بەرد بە زات تەنیای تاکی فەرد
مورتەزا عەلی تەڵەب کەرد وە پېش
حاڵیش کەرد جە کار قەومی بەڎ ئەندېش
فەرما من مەشوون تۊ بۊ وە جای من
بپۊشە لیباس خەرقە و دیبای من
خەوف نەکەن جە قەوم قەبیلەی کوففار
نیگات مەدارۊ شای پەروەردگار
شای مەردان پۊشا بەرگی پاکی ئەو
خەرقەی موبارەک شەرەفناکی ئەو
شیی وە بان تەخت خوابگای حەزرەت
تەکیە کەرد چوون شېر شەو نە جای حەزرەت
زەڕڕە خەوف نەکەرد جەی غوسسە و خەتەر
وېش کەرد بە فیدای پاکی پېغەممەر
267
حەزرەت تەشریفش ئارد وە بەر، دیش قوڕەیشیەکۍ بە پێوە مدرێنۍ، سوورەتەو (فاغشیناهم) ش وانا، نەمیاوە و مشتێ خوڵەش هورگېرتە، شاناش وە ڕوخسارشان، دیڎەشان بی بە شەوەزەنگ، ئیتر گوزەرش کەرد، نەڎییشان،
تا حەزرەت تەشریف خەیر ئاوەرد وە بەر
دیش سەف سەف مدران قەومی کینەوەر
بە تەوفیقی زات دانای تەوانا
سوورەی موبارەک یاسینش وانا
تا (فاغشیناهم فهم) بە مەحزوون
وانا، تا یاوا (فلا یەبصرون)
دەس بەرد مشتێ خاک هورگرت جە زەمین
شانا وە ڕووی قەوم بېحەیای لەعین
وە ئەمری مەعبوود قەومی دڵ جە سەنگ
دیڎەشان پۊشا پەردەی شەوە زەنگ
زەڕەی ئەو خاکە وە هەرکەس یاوا
جە مەعرەکەی بەدر کوشیا جە داوا
ئەجەل پەرێشان جەو دەم بیی نازڵ
ئەرواشان وە نار دوزەخ بی واسڵ
حەزرەت پەیاپەی مەکەرد نیگاشان
تا بە سەلامەت بەرشیی جە لاشان
هیچ کەس جە قوڕەیش ئەو نەڎیی بە چەم
تاکە تەشریفش وېیەرد وەبۍ خەم.[1]