#بافڵ تاڵەبانی#، سەرۆکی #یەکێتیی نیشتمانیی کوردستان# لە دەباشان پێشوازی لە هونەرمەندانی بوارەکانی شانۆ، شێوەکاری، فیلمسازی و مۆسیقا کرد.
لە دیدارەکەدا ڕۆڵی هونەر و کاریگەرییەکانی لەسەر کۆمەڵگە، دۆخی ئێستای هونەر لە هەرێمی کوردستان و پاڵپشتی و پشتیوانیی هونەرمەندان گفتوگۆی لەبارەوەکرا.
سەرۆک بافڵ جەلال تاڵەبانی ئاماژەی بە ڕۆڵی هونەرمەندان کرد لە ڕابردوودا کە ڕۆڵێکی گرنگ و کاریگەریان هەبووە و توانیوویانە ماندوونەناسانە خزمەتی فەرهەنگ و کەلەپووری کوردی بکەن و مێژوویەکی درەوشاوە تۆماربکەن. ڕاشیگەیاند، دەبێت هونەر لەسەردەستی ئێوە بەرەوپێشچوونی بەرچاو بەخۆیەوە ببینێت و هەرێمی کوردستان و بەتایبەت شاری سلێمانی کە بە پایتەختی ڕۆشنبیری ناسراوە ڕەنگدانەوەی ناوەکەی بێت. ئێوەی هونەرمەند دەتوانن ڕۆڵێکی کاریگەر بگێڕن لە ئاڕاستەکردنی کۆمەڵگە و سەلیقەی گشتی، بەرهەمەکانتان ڕەنگدانەوەی ژیانی کۆمەڵایەتی و سیاسیی هەرێمەکەمان بێت و نموونەی هونەری باڵا پێشکەش بە خەڵکی خۆمان و جیهان بکەین.
لەبارەی ئازادیی کاری هونەری و دەستتێوەردانی سیاسیشەوە سەرۆک بافڵ وتی، نابێت هونەر بە سیاسی بکرێت و ڕێگەمەدەن هیچ کەس و لایەنێک دەستوەردان لە کارەکانتان بکات. ڕەخنەگربن، لە ڕێگەی هونەرەکەتانەوە بەگژ نادادی و ستەمدا بچنەوە، ئەمەش یەکێکە لە ئەرکەکانی هونەر.
لە بەرامبەردا هونەرمەندانی کوردستان ئاماژەیان بە گرفت و بەربەستەکانی نێو کایەی هونەر کرد و میکانیزمی چارەسەرکردنی کێشەکانیان خستەڕوو و ڕایانگەیاند، ئەم دیدارانە گرنگی خۆیان هەیە و هۆکارێکە بۆ ڕەواندنەوەی کێشەکان و هەنگاونان بە ئاڕاستەی داهێناندا.
هەروەها ستایشی هەوڵ و پشتیوانییەکانی سەرۆک #مام جەلال# و #هێرۆ# خانیان کرد کە لە ڕابردوودا بەهەمووشێوەیەک هاوکاری هونەرمەندان بوون و لەسەر دەستی ئەوان هونەر لە هەرێمی کوردستان بەرەوپێشچوونی بەرچاوی بەخۆیەوە بینیووە.
هەر لە دیدارەکەدا سەرۆک بافڵ چەند بڕیارێکی گرنگ و پێویستی لەبارەی دۆخی هونەر و هونەرمەندان لە هەرێمی کوردستان، بەرەوپێشچوون و گەشەپێدانی ڕەوتی هونەری و پشتیوانیی هونەرمەندان دەرکرد و وتی، ئەنجوومەنێکی تایبەت لە هەموو بوارە هونەرییەکاندا درووستدەکەین و پێکەوە هەنگاوی گەورە لەوبارەیەوە دەنێین.
[1]