باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و چل و چوارەمە
قوڕەیشییەکۍ داواکاریێ گرانتەرشان جە حەزرەتی کەرد، ئاڎییچ گەر بە ڕاس پېخامئاوەرەن، مەشۊم مانگۍ شەقق کەرۊن، کەرۊش بە دوۍ نیمە لتۍ، حەزرەت ئانەیچشە کەرد، بەڵام واتشان: محەمەد عەجیب ساحېرێن!
دیسان هەم یەک ڕۊ قوڕەیشی یەکسەر
جەم بین نە خزمەت شای خەیرولبەشەر
واتشان: ساتۊ ئەر پېغەممەری
ئەر سالاری سەف سارای مەحشەری
ئیعجازی بوزورگ بنمانە پېمان
تا کە نادم بین جە کردەی وېمان
ئېمەو عەشایېر عارەبانی بەڕ
بە پېغەممەریت مەکەرین باوەڕ
حەزرەت فەرماوا شمەو خوداتان
دووبارە چېشەن هەم مودەعاتان
واتشان: مەتڵەب وە بۍ لام و جیم
قەمەر جە گەردوون بکەری دوو نیم
خاس هەردوو قیسم زەریف دیابان
هەردوو وە عالەم گرد ئاشکەرابان
تاکە یەک سەعات وە ڕووی سەماوە
هەردوو وە تەرتیب بشان وە ڕاوە
حەزرەت وات: بەڵۍ مەتڵەبم زانا
ئەر من وە تەوفیق دانای تەوانا
جە ڕووی ئاسمان شەقق کەردم قەمەر
زاهیر هەردوو شەقق ئاما وە نەزەر
ماوەردی ئیمان بە خوڎای بېباک
بە وەحدانییەت فەردی تەنیای تاک
قوڕەیش وات: نەعەم خلافش نەبۊ
ئیمان ماوەریم بە خودا و بە تۊ
شای خەتمی پەنا حەبیبی داوەر
ڕووی ئەنگوشت کەرد ئیشارە قەمەر
وە ئەمری خالیس تاکی تەنیای فەرد
مانگ جە ئاسمان دەر سەعات شەق کەرد
چوون سەیفی وە تېخ کەریش بە دوولەت
دوو شەقق بیی جە سەر ئەعجازی حەزرەت
بەو تەور دوورکەوتەن جە سەمای ئەزرەق
تا، تۊی هەور کەوت ،بەین هەردوو شەقق
کوففاری بەڎبەخت ڕووسیای ڕوو زەرد
واتەن: محەمەد عەجیب سیحرێ کەرد.[1]