باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و سی و هەشتەمە

دماتەر چن کەسێ جە ئەهلو کوففاری لوێ خزمەتو حەزرەتی، ئاڎۍ شارەزاو ڕاو شامی و هەم بەیتەلمەقدیسی بېنۍ، چن پەرسێشا کەردۍ محەمەدی، ئاڎییچ پېسە وېش پەیش باسکەردۍ.
دیسان هەم جەمعی جە قەومی کوففار
ئامان وەخزمەت موستەفای موختار
چونکە بەڵەدبین جە ئەوان چن کەس
پەرساشان جە وەزع بەیتولموقەددەس
شای خەتمی پەنا شەفیعی موختار
یەکیەک دا جواب ڕوئەسای کوففار
یاوا وەجایێ نەقشیی زەمیرش
هیچ نەمەندەبۍحەزرەت جە ویرش
ساتێ مات بی کەردش تەئەممول
غوسسەی بېپایان جەم کەرد نە تۊی دڵ
جوبریل بە ئەمری پادشای ئەقدەس
هورکەند بە جای وېش بەیتولموقەددەس
جە یانەی عەقیل نیاش ئەو نەزەر
ڕوو بە ڕووی حەزرەت شای خەیرولبەشەر
بە قەولی ڕاوی دانای ساحیب فام
مورتەد بیی جەو دەم بەعزی جە ئیسلام
سەعیدیی نەمەند جە بنیادشان
هەر ئېد بی سەبەب ئیراتی دادشان
قافلەی قوڕەیش جە مەککە هەم شام
بە یەک ماه مەشین بۍ سەبر و ئارام
باوەڕ بە میعراج حەزرەت نەکەردەن
نعوذەن بالله، وە کافری مەردەن
بەڵ چوون حەزرەت خەتمولئەنبیا
بەیان کەرد وە زبح مەسجیدلئەقسا
موشریکان واتەن بۍ کەم و کاسەن
جە مەساجیدان قەولت گرد ڕاسەن
بەڵام قافڵەی قەبایل یەکسەر
شین پەرێ شام نەداران ئەسەر
ئەحواڵی ئەوان مەعلووم کەر لېمان
ئامای و نامای گرد بواچە پېمان
حەزرەت فەرماوا وە بۍ وەسیلە
قافڵەی سەنگین فڵان قەبیلە
جە دەشتی ڕۊحا هەردە وە هەردە
مەگېڵان پەرێ ناقەی گومکەردە
جە مەنزڵگاشان یەک قەدەح پەڕ ئاو
من چوون تەشنەس بیم سېر نۊشام تاو تاو
وەختێ مەیاوان وە ماوای وېشان
جەو ئاوی قەدەح بپەرسین لېشان
تا سیدق و کیزب مەعلووم بۊ وە گشت
وە ئەهلی ئینکار فیرقەی زېباو زشت
فەرما پەی میعراج وەختی وېیەردەم
تەماشای فڵان کاروان کەردەم
دوو شەخس نامشان فڵان وە فڵان
سوار بین وە پشت یەک وشتر جوان
جە بوراقی من وشتر سیل کەردش
چوون تەیری تیژباڵ وەزاق مەبەردش
یەکێ جەو دوو کەس ناگاه کەوت بە وار
یەک دەسش شکیا پېچ وەردش چوون مار
بپەرسین لېشان ڕازی سەربەستە
دەستی کام ئەشخاس بېیەن شکەستە
ڕوئەسای قوڕەیش قەبیلەی ئەشرار
دیسان جە حەزرەت کەردەن ئیستیفسار
واتەن: وشتران شیرین تەدارەک
قافڵەی مەخسووس مەککەی موبارەک.[1]