باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و ویس و نۊهەمە
دمای ئەشناسای حەزرەتو عیسای و یەحیای، جوبرەئیل بە حەزرەتیش فەرماوا: درەنگەن، خوڎای هەقق چەمەڕامانەن، جمێرە و یاوێ بەگەردوونی یەرەم، ڕانە یاوا بە لیقاو حەزرەتو (یوسف) ی و حەزرەتو (ئیدریس) ی، چەرخی پەنجەمەنە یاوا بە حەزرەتو (هاروون) ی، جە چەرخی ششەمەنە حەزرەتو (مووسا) یش چەمپەنەکۆت.
جوبرەئیل عەرز کەرد یا خەیرولبەشەر
ئینتیزاری تۊن دەهەندەی داوەر
حەزرەت سوار بیی جوبرەئیل وە باڵ
بوراق ڕاهیی بی وېنەی بای شەماڵ
بە تەوفیقی زات دارای موعەززەم
یاوان وە پای گەردوونی سێهەم
وە هەر تەور سابق جە بابان وېیەرد
گفتوگۊ چەنی دەربانان گرد کەرد
موژدەی ئامای خەیر حەزرەت دیاوە
قوفڵی قاپی چەرخ هەر هەفت کریاوە
جە سەفای سەهم شای خەیرولئەنام
یوسف دی وە چەم عەلەیهی سەلام
یاوان بەسەر دیا دیش جەنابی ئیدریس
مەشغووڵەن دایېم بە ئەمری تەدریس
جە چەرخی پەنجەم شای ئەعلا سیفات
هەم چەنی هاروون کەردش موناجات
مەهیمزدا مەرکەب بەرق ئاسای بوراق
نەکەرد مدارا تا چەرخی شەش تاق
حەزرەت نیگا کەرد بەو دیڎە مەخموور
دیش (مووسا) گوستاخ کەلیمی کۊی توور
دمای گفوگۊ و گشت سەفا و سەلام
تەعجیل کەرد حەزرەت شای خەیرولئەنام.[1]