باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و ویس و ششەمە
جوبرەئیل و حەزرەت یاوێ بە ماواو حەزرەتو ئاڎەمی، حەزرەت پەرساش ئانە کېن؟ جوبرەئیل ماچۊ: ئانە باباتەن، لوە خزمەتش، مژدەو ڕیسالەیش دە پەنە.
حەزەت دیی شەخسێ تەمام موبارەک
وېش پەی ئیستیقبال کەردەن تەدارەک
جوبرەئیل جە نۊ وات بە پېغەمەر
ئانە ئادەمەن شای ئەبولبەشەر
ئاخر باباتەن سەلام بکەر لېش
موژدەی ڕیسالەت هەم وېت بدەر پېش
حەزرەت کەرد سەلام شای ئەبولبەشەر
ئادەم سەندەوە سەلام جەو سەروەر
واتش: مەرحەبا فەرزەندی ساڵح
قەزات وە فەرزەند سەد هەزار تالح
وەش ئامای سەروەر گردین سەروەران
ئەی خەتمی جوملەی گرد پېغەممەران
حەزرەت دیش دەربی جە لای ڕاستی ئەو
بۊی عەترش مەیۊ وېنەی شەوبۊی شەو
دەربی جە لای چەپ ئەو هەم دیارەن
بۊی عەفوونەش چوون بۊی مردارەن
ئاڎەم جەو دەمدا نامی حەقق مەبەرد
گاهی مەگرەوا، گاهی خەندەش کەرد
حەزرەت پەرسا کەرد جە ڕوحەلئەمین
فەرماکە ئەی پەیک ڕەببەلعالەمین
ئاڎەم یە پەی چېش جەرگش بریانەن
گاه گاه نە خەندان، گاه نە گریانەن
ئەو دەربی بونخوش چەنی ئەو بۊی بەڎ
ڕەمزی ئەو چېشەن دانای خورەدمەند.[1]