باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و ویس و دوەمە
دمای نۊشکەردەی کووپە شۊتەکەی، بوراق بەردەوامەن جە تەیکەردەی دەست و سارای، دمای خەیلێ یەرۍ کەسۍ سەروو ڕێشاوە چن پەرسېشا کەردۍ پېخامئاوەری، بەڵام جوابش نەڎێوە، پەرساش جوبرەئیلی دەربارەشان، ئاڎییچ خزمەتشکەرد.
القصە خەیلێ سەحرا تەیی کەردەن
جە بادیەی بەر بیدی وېیەردەن
یەکێ جە یومن بە ناڵەی خەتەر
وات: یا محەمەد تەوەقوف بکەر
ساتێ من جە تۊ سوئالێ داروون
جەوابی لوتفت وە چەم مەداروون
حەزرەت هیچ نەکەرد زەڕڕە مودارا
نەدا جوابش وېیەرد جەو سارا
هەم جە لای یەسار یەکێ دا خەبەر
وات: یا محەمەد تەوەقوف بکەر
سوئالێ داروون بدەر جوابم
سەحراءگېل بېیەن جە ئیزتیرابم
حەزرەت ئیلتیقات زەڕە نەکەرد پېش
پادا نە بوراق وېیەرد بۍ ئەندېش
دیسان یەک عەورەت شوخی شیرین ناز
وە بانگی بېشەرم بوڵند کەر ئاواز
وات: یا محەمەد ئەسرین مەواروون
ساتێ تامڵکەر نیازێ داروون
حەزرەت هەم بە ئەو نەکەرد ئیلتیفات
وېیەرد وېنەی بەرق هەوری سەماوات
غەرەز جەو مەکان وېیەرد وە تەعجیل
جەودما پەرساش ئەو جە جوبرەئیل
فەرما یا ئەخی ئەو هەرسێ نەفەر
کۍ بین، چ کارەن، پېم بدەر خەبەر
بەڵۍ ئەوەڵ کەس ڕاعی یەهوود بۍ
لەعینی بەڎزات گومڕای مەردوود بۍ
بە تۊ کەردەبۍ چوون ڕووی خیتابش
ئەگەر جەودەم مدای جەوابش
ئومەتت یەکسەر حەرام مەوەردەن
بە دینی یەهوود عەمەل مەکەردەن
ئەو شەخسی دوەم هەم نەسارا بۍ
وە بورجی بەختش ئەوبار وارابۍ
ئەر جەودەم مدای جوابش بە دڵ
مورادش یەکسەر گرد مەبی حاسڵ
زومرەی ئومەتت یەکایەک جە تۊ
نەسارا مەبین گرد جە دمای تۊ
سالیسەن سوئال بەحسی ئەو عەورەت
ئەو باڵا عەرعەر شیرین خاڵ و خەت
ئانە دنیای دوون پەڕ مەڵاڵە بۍ
زەوق و زینەتش گرد جەهالەت بۍ
ئەگەر تۊ مەدای بەو تەور جوابش
ئومەتت مەشیی گرد بە ڕیکابش
نامی قیامەت هیچ نمەبەردەن
یەکسەر دنیای دوون قبووڵ مەکەردەن.[1]