باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و شاڼزەهەمە
حەزرەت دمای نماو سەحەری، غەریبی شارو مەککەی کەرۍ، بەڵام زەید بەنی حارس ماچۊ: ئېمە بە چ زەحمەتێ چاگە بەرشیېنمۍ، ئیسە مەسڵەحەت نېیەن گېڵمێ، دماتەر حەزرەت هەواڵش کیاست پەی (مەتعەم) ی کە پیاخاسێ مەککەی بۍ، بەشکم یارمەتیشان بڎۊ گېڵاوە.
سەڵات فەجرش هەم بەجا ئاوەرد
ئیرادەی مەنزڵ مەککەی شەریف کەرد
زەید بەنی حارس ئاما ئەو جواب
عەرز کەرد نە خزمەت شای مەلەک ڕیکاب
ئېمە جە ئیزاء ئەزدادی کوففار
بەرشین جە مەککە وە چار و ناچار
ئیسە بۍ جەوار یەکێ جە ئەوان
مەسڵحەت نېیەن بشین بە دەوان
حەزرەت عەرزی زەید قبووڵکەرد بە دڵ
نە کۊهی حەڕڕا گرتشان مەنزڵ
شەخسێ کیانا تا وە لای مەتعەم
وات: مەبۊ ئەو من کەرو خاترجەم
ئېمە بگېرۊ نە جەواری وېش
ئیشەڵڵا مەدام خەیر مەیۊ نە ڕېش
مەتعەم ئیلتیماس ئیجابەت کەردش
قاسید هەم جەواب سەفارش بەردش
قاسید وات: قدووم ئەرزانی کەرۊ
وە بەندەخانە تەشریف باوەرۊ
سەحەر زوو مەتعەم وېش موسەللەح کەرد
سواربی وە ئەسپ چوون مەردانی مەرد
چەنی فرزەندان گرووی قەوم و خوېش
حەزرەت باوەرۊ وە جەواری وېش
شین وە ئیستیقبال شای خەیرولئەنام
غەرەز تا یاوان وە بەیتولحەرام
سا چوون ئەبوجەهل شنەفت ئەی خەبەر
سەرسام جە مەنزڵ وېش شیی وە بەر
جە بەیتولحەرام یاوا وە مەتعەم
بەعد تەوازع وات: یا ئیبنی عەم
دینی ئەحمەدت ئیختیار کەردەن
سوجدەت بە خودای نادیدە بەردەن
واتش: نەوەڵڵا تەعنە مەدەر لېم
ئادم ئاوەردەن بە جەواری وېم
وات: هەر کەس تۊ کەردی دەوای زامانش
ئېمەیچ هادامان یەکسەر ئامانش
حەزرەت تەشریفش بە مەککە ئاوەرد
حەجەرلئەسوەد ئەوەڵ تەواف کەرد
جە کەعبەتوڵڵا دوو ڕکعەت نماز
کەرد پەی ڕیزایەت کەریمی کارساز
نەپەرسا جە کەس، نە کەس پەرسا لېش
تەشریف بەرد وە قەسر هەمایونی وېش
سەحەر هەم تەشریف وە لای مەتعەم بەرد
جە ئەو ئیلتیماس ڕەدی جەوار کەرد
مەتعەم عەرزش کەرد دڵ وە ئەندېشەن
ڕەددی جەوارم سەبەب کە چېشەن
فەرما نەمەبۊم زیاڎ جە یەک ڕۊ
جەواری کوففار موشریک چوون تۊ
مەتعەم مولتەمیس حەزرەت قبووڵ کەرد
حەزرەت هەم تەشریف وە ئەندەروون بەرد
هەفتە دوو هەفتە نیشت بە خاتر شاڎ
خەرمانی خەمان جەو دەم داد وە باڎ.[1]