باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و نۊهەمە
میرزا ئۆلقاڎرو پاوەی، باس چا ساتەیە کەرۊن کە حەزرەت کۊچش کەرد، شاروو مەککەیش جیائاست، ڕوەو یەسریب، دیسان باس جە سەفەرو ڕاکېش کەرۊن کە چەنی چن کەس و عەشرەتێ کۊ بیۆ، داواش وەنەکەردۍ موسوڵمانی بان، بەڵام کەسشا ئیمانشا نارد.
شای خەتمی پەنا سەیدولئەبرار
شەفیعی ئومەم موستەفای موختار
جە شەڕی ئەشرار قەومی دڵ جە سەنگ
حەزرەت فراوان دڵ ئاوەرد وە تەنگ
جە مەککەی شەریف کۊچی خەیر کەردش
زەید بەنی حارس چەنی وېش بەردش
ئەو ڕۊ تەشریف بەرد تاکە خۊر ئاوا
تا وە قەبیلەی بەنی بەکر یاوا
وانا حەمدی زات تاکی تەنیای فەرد
پەی ڕای موستەقیم مەردوم دەعوەت کەرد
چوون تەوفیقی حەقق نەبیشان ڕەفیق
هیچکام بە حەزرەت نەکەردەن تەسدیق
بادیەی بېدی جە نۊ کەردش تەی
تاکە تەشریف بەرد وە قەبیلەی حەیی
ئەهالی ئەو قەوم هەر سوبح تا بە شام
یەکیەک دەعوەت کەرد بە دینی ئیسلام
بە قەولی حەزرەت ئەوەڵ حازم بین
جەو دما دیسان یەکسەر نادم بین
حەزرەت وە مایوس جەوان هەم وېیەرد
ڕوو بەقەبیلەی ئەهلی تایف کەرد
قەبیلەی شەفیق عەرەب عەشایېر
مەشیی وە لاشان شەیتان وە زاهېر
خولاسە حەزرەت شای گەردەن بېگەرد
دەرو جەو مەکان تەوەقوفش کەرد
ڕوئەسای شەفیق ئەشرافی ئەقوام
یەکیەک دەعوەت کەرد وە دینی ئیسلام
هیچ کام بە خوڎا ئیمانش ناوەرد
هیچ کەس وە حەزرەت باوەڕش نەکەرد
چوون بۍ دەولەتان حەقق نەدان پېشان
نەوېیەردەن جە دین زەعیفی وېشان.[1]