باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و هەشتەمە
مامۊ پېخامئاوەری (ئەبولەهەب) سەرەتاوە پارېزگاری جە برازاکەیش کەرۍ، بەڵام ڕازی نەبۍ بە دینەکەیش، قوڕەیشیەکۍ و زیاتەریچ ئەبوجەهل، تانەو تەشەرش دېنۍ وەنە، تا چن جارێ کیاستشا پەی لاو پېخامئاوەری، پەی پەرسو جوابی، کە دما پەرسە یاگۍ ئەبوتالیبی جە قیامەتەنە؟، پېخامئاوەر فەرماواش: مادام ئیمانش بە دینی تازەی ناردەن، ئانە یاگەش جەحەڼەمەن، ئیتر ئەبولەهەب قینیش خرۊشیاو مەژگ نەمەن سەرەشەنە، بە تووڕەییۆ پېخامئاوەرش جیائاست و ماچۊ: تا دنیا دنیانە من دژایەتی تۊ کەروون.
حەزرەت مەشغووڵ بی بە دەعوەت جە نۊ
زەڕە بیم نەکەرد جە قەومی بەدخۊ
موشریکان نەبی یارای بەدیشان
وە ساتێ سەڎجار حەزرەت مەدیشان
تاکە ئەبوجەهل، بن هیشامی قیت
چەنی عەتبە بن ئەبی موقیت
ئەو دوو شەیتانە عەلەیهی لەعنە
داشان ئەبولەهەب، چن تیر و تەعنە
واتەن: محەمەد برازادەی تۊن
بپرسن عەبدولموتلیب جە کۊن
چوون ئەبولەهەب، شنەفت ئەی خەبەر
تا شیی وەحوزوور پاکی پېغەمبەر
وات: یا محەمەد سوئالێ داروون
لوتفی جەوابت وە چەم مەداروون
عەبدولموتەلیب مەنزڵش کامەن
ئیسە ئەڕواحش جە کام مەقامەن
فەرما: ئەی سوئال فایدەش چېشەن
ئەو ماواش جە لای قەومانی وېشەن
ئەبولەهەب، هەم وە لای قەوم یاوا
واتش: محەمەد وەیتەور فەرماوا
ئەبوجەهل وات: ئینە مەعناشەن
یانی های دوزەخ ئەبەدی جاشەن
باز ئەبولەهەب دیسان نادم کەرد
جە نۊ هەم سوئال وە لای حەزرەت بەرد
وات: یا محەمەد بۊ ڕاس واچە تۊ
عەبدولوتەلیب وە دوزەخ مەشۊ
حەزرەت وات: بەڵۍکارش وېیەردەن
هەرکەس تابیعەت دینی ئەو کەردەن
سەڎ هەزار بەڵا گشت نە ڕاشانەن
سەعیدی دوزەخ دایېم جاشانەن
ئەبولەهەب جە قین خەشمش خرۊشا
مەغزش نە کەللەی کاپوولش جۊشا
وات: وەڵڵا هەنی بەینی من و تۊ
تا ڕووی قیامەت عەداوەت مەبۊ.
جە موعاوەنەت حەزرەت کېشا دەست
هەم چەنی قوڕەش ئیتیفاقش بەست
دایېم وېنەی گېج دۊریا مەجۊشا
جە ئەیزا وئەزرار حەزرەت مەکۊشا
غەرەز هەر ئەوەند جەسارەت کەردەن
ئەموالی ئەسحاب وەئیحجاف بەردەن
حەزرەت جە ئەندېش عەدوی بېشمار
بەرشیی جە مەککەی شەریف وە ناچار.[1]