تنۆکێک ئاو لەسەر گەڵایەکی پان، لە ئانی هەڵخزاندا!
بەختیار حەمەسوور

لە پێش پەنجەرە تەماشای گەڵای درەختێک لە ماڵەکەی ئەوبەرمان دەکەم، باران بەسەریدا دەبارێت. گەڵاکە بریقەی دێت، ساف و ڕوون و هاوکات سەوزی تێر. هەموو بارانبارینێک داوەتنامەیەکە بۆ کەنارپەنجەرە و بینینی ئەم دیمەنە. لە مێژە خۆم لە باران و هەموو پەنجەرەکان دزیوەتەوە. دواجار کە تەماشای هەمان دیمەنم کرد، چەند ساڵ لەمەوبەر بوو، ڕۆژێک، لەم ژوورەدا نا، لە بەردەم ئەم پەنجەرەیەدا نا، لە ژوورێکی تر و بەردەم پەنجەرەیەکی تر، لە ماڵی هاوڕێییەک کە هەموومان ئیرەییمان پێ دەبرد، وەستابووین و بە بێدەنگی و تەماشای هەمان دیمەنمان دەکرد.
بەر لەوەی بکەوێتە ماڵەوە و دەرگا و پەنجەرە بەسەر خۆیدا ببەستێت، دیم، لە نزیک ماڵی خۆیان، ڕێک ئێوارەی سێ ساڵ لەمەوبەر، پاییز بوو وا بزانم، تازەکی ئەنجامی پشکنینەکانی وەرگرتبووە و دکتۆر هەموو شتێکی پێ گوتبوو. پێی گوتم. وتی ئیتر نابێت کەس بمبینێت و کەس ببینم. وتم: «قسەی قۆڕ!» دواجار کە چووم، نەمناسییەوە، لە ماڵی خۆیان، لە ژوورەکەی خۆی، بەڵام نەک هەمان ژووری پێشوو کە تەماشای بارانی پشت پەنجەرەمان کردبوو، لەسەر قەرەوێڵە ڕاکشابوو، دایکی هەر دەروژووری بوو، لەسەر کورسییەکی دارین لە تەنیشتی دانیشتم. بەتانییەکی پڕگوڵ، تا سەرسینگ دایپۆشیبوو، بۆ ساتێک بەتانییەکە لەسەر جەستەی خزی، بنێس و ئێسقانی، ئەو کوڕەی ڕۆژانێک هەموومان ئیرەییمان پێ دەبرد، هەر هێندەی چنگێکی مابووەوە. تابلۆیەک لە ژوورسەری هەڵواسرابوو کە دەمێک بوو هەڵواسرابوو: «تنۆکێک ئاو لەسەر گەڵایەکی پان، لە ئانی هەڵخزاندا!» بیرمە جارێک گوتم ئەو تابلۆیە زۆر خەمگینە. وتی چیرۆکی پشت تابلۆکە خەمگینترە. کاری ژنە هونەرمەندێکی هاوڕێی بوو کە لە ساتێکی سەختدا کێشابوویەوە؛ ناسینی ئەم و ئەو ژنە کۆنتر لەو ساتە بوو. ڕۆژێک ژنە نامەی بۆ ئەم ناردبوو، هەر ئەوەندەی نووسیبوو: «من تەواو...» ئەم ئاگادار بوو کە لە دۆخێکی ناهەمواردایە، بەڵام بەو ڕادەش ترساک نا. تازە لە مێردەکەی جیابووبووەوە. پاش نامەکە، بە نیازی خۆکوشتن، مستێک حەبی خواردبوو. دەیگوت ئێستاش نەیزانیوە چۆن گەیشتووەتە شوقەکەی و بە نیوەمردوویی لەسەر تەختەکەی و لە تەنیشتیشی چەند قوتووی خاڵیکراو لە حەب، دیویەتی. ژنە ئەو تابلۆیەی هەر ئەو ڕۆژانە، بە دەستی لەرزۆک و ڕەنگی سپیهەڵگەڕاو و گەڕاوە لە مەرگێکی بێچەندووچوون، لە هەمان ژوورە پڕ ژیانەکەی ئەم، نەک ئەو ژوورە تاریک و دڵتەنگەکەی بۆ دواجار چووم و دیم، کێشابوو و دواتر، کردبووی بە دیاریی ئەم و ئەمیش لە ژوورسەری خۆی هەڵیواسیبوو.
بڕیار دەدەم ئیدی نەیەمە بەر هیچ پەنجەرەیەک کە باران لە پشتییەوە ببارێ.[1]