#قوباد تاڵەبانی#، لە کۆبوونەوەی لەگەڵ وەفدێکی هاوبەشی فەڕەنسی- ئەڵمانی، جەختی لە گرنگی ئەنجامدانی هەڵبژاردنێکی بێگەرد لە هەرێمی کوردستان کردەوە، وتیشی: ئێمە لەگەڵ ئەوەین ڕێککەوتن هەبێت لەسەر کۆی کێشە هەڵپەسێردراوەکان لەگەڵ حکومەتی ئێراق.
قوباد تاڵەبانی، جێگری سەرۆک وەزیران ئەمڕۆ #22-01-2023# لە #هەولێر# پێشوازی کرد لە ئیریک شۆڤالیێ، باڵیۆزی فەرەنسا و مارتین یێگەر، باڵیۆزى ئەڵمانیا لە ئێراق. لە کۆبوونەوەکەدا کە کونسوڵی گشتی هەردوو وڵاتەکە و دابان شەدەڵە جێگری سەرۆکی فەرمانگەی پەیوەندییەکانی دەرەوەی هەرێم ئامادەیبوون، باسیان لە پەیوەندییەکانی نێوان هەرێمی کوردستان لەگەڵ ئەڵمانیا و فەڕەنسا کرد و هەروەها دواپێشهاتە سیاسییەکان گفتۆگۆویان لەبارەوە کرا.
جێگری سەرۆک وەزیران ئاماژەی بە گرفتە سیاسییەکانی هەرێمی کوردستان و هەنگاوەکانی قۆناغی داهاتوو بۆ چارەسەری ئەو گرفتانە کرد و جەختی کردەوە؛ دەبێت کێشەکان بە گفتوگۆ چارەسەر بکرێن لەپێناو بەرژەوەندی گشتیدا.
لەبارەی پەیوەندییەکان لەگەڵ حکومەتی ئێراقیش، قوباد تاڵەبانی وتی: تێگەیشتنی باش هەیە بۆ چارەسەر کردنی گرفتەکان لەگەڵ حکومەتەکەی بەڕێز سوودانی و چاوەڕێین ئەمە لە یاسای بوودجەی 2023 ڕەنگدانەوەی هەبێت کە ئەوەش کێشەیەکی سەرەکییە لەنێوان هەردوو حکومەتدا. جەختیشی کردەوە کە؛ ئێمە لەگەڵ ئەوەین بە ڕێککەوتن لەگەڵ #بەغدا# کۆی کێشە هەڵپەسێردراوەکان چارەسەر بکرێن.
پرسی وزە و نەوت و غاز بەشێکی تری کۆبوونەوەکە بوو، کە تێیدا جێگری سەرۆک وەزیران وتی: ئەم پرسە نیشتمانییە و دەبێت سازانی لەسەر بێت تا سامان و داهاتی وڵات بۆ خۆشگوزەرانی خەڵک بەکاربێت.
سەبارەت بە هەڵبژاردنی پەڕڵەمانی کوردستانیش، جێگری سەرۆک وەزیران جەختی لە گرنگیی ئەنجامدانی هەڵبژاردنێکی بێگەرد لە هەرێمی کوردستان کردەوە بە ڕەچاوکردنی تێبینییەکانی لایەنە سیاسییەکان و ماف و پێگەی هەموو پێکهاتەکان. [1]