باخچێوە بېگەرد
نویستەی: میرزا ئۆلقاڎرو پاوەی
بەشۊ سەڎ و نەوەڎ و چوارەمۍ
میزا ئۆلقاڎرو پاوەی، باس جە عەزابو خوڎای گۆرەی کەرۊن پەی ئا پەنج کەسەیە کە عەزیەتو پېخامئاوەریشان کەرد، هەر یۊشان بە دەردێ خوڎای هەقە چەنە ئەسێ.
بەڵ ئەوەڵ (عاس) گومڕای بەڎ ئەندېش
سوار بیی چەنی فەرزەندانی وېش
جە مەککە خەیلێ دەورش وەردەوە
ئاخر جەمانی پا ئاوەردەوە
خار شی وە کەففی پەنجەی پاش وە دەو
ڕۊی ڕۊشن جەلاش بی بە بەند شەو
هانا کەرد مارێ دا وە پامەوە
مەتلیا چەنی ئېش و زامەوە
هەرچن تەفەحوس کەردەن پەرێ مار
نە مار نە عەقرەب هیچ نەبی دیار
ئەوەند ئاماس کەرد جە ئېشی خەتەر
بیی بە موازیی لاشەی یەک بەقەر
مەوات پەیاپەی وە هەناسەی سەرد
خوڎای محەمەد منش قەتڵ کەرد
هەر شەو تا سەحەر مەناڵا جە دەرد
تا ڕۊح وە مالک دوزەخ تەسلیم کەرد
سانیەن ئەسوەد ئیبنی موتەلیب
جە گوشەی مەککە یەک ڕۊ موزتەریب
جە سایەی درەخت ئارەزووش خاو بۍ
ناغافڵ هەردوو دیڎەش لېڵاو بۍ
جوبرەئیل وە زور بالی سەختەوە
فەرقی ئەو مەدا بەو درەختەوە
مەناڵا مەوات وە سەڎ داغ و دەرد
خوڎای محەمەد قەتڵی منش کەرد
تا ئەجەل پەرېش ئەرواش بیی نازڵ
وە ناری دوزەخ دەردەم بیی واسڵ
ئەویچ پەی دوزەح ئەجەل هەم تلدا
شیی وە شۊن عاس ئیبنی وابلدا
سێیەم بنی یەغوس گومڕای کەم هونەر
جە مەککە شەریف یەک ڕۊ شیی وە بەر
شەرارەی سەبوون جە ناگاه دا لېش
دەردەم بېزار بیی جە زیندەگی وېش
خەستە بیی جە گېیان چوون پېکانی تیر
پوسی ئەندامش سیاه بیی چوون قیر
خەیلێ جەو وادی بېهۊش مەند خجڵ
موعاوەدەت کەرد جە نۊ پەی مەنزڵ
ئەهلی بەیتی وېش نەشناسان کەس
قاپیەوان ئەوان قفڵی قاپی بەس
هانا مەکەردش وېنەی لاڵی لەنگ
پەی پەی جە غەرەز سەر مەدا وە سەنگ
مەوات: نە یەهوود نە هەم مەجووسم
بەخوڎا من ئەسوەد ئیبنی یەغووسم
بی بە حەسرەت پېش ڕاگەی ئەندەروون
مەواتەن، (هذا ڕجل مجنون)
حولاسەی کەلام تا ئاخر قەدەم
ڕۊحی خەبیسش شیی وە جەهەڼەم
چوارەمین حاریس گومڕای ئیبنی قەیس
غەلیزی ئەشرار تایەفەی ئەوەیس
یەک ماهی شور تەناول کەردش
فەوریی جە عەتش کاریی بی دەردش
هەرچی نۊشا ئاو تەسکین نەدا پېش
بەتنش فەراغ بی چوون بەتنی گاومېش
مەناڵا جە دەرد مەواتش وەیتەور
خۆڎای محەمەد منش کوشت وەیجەور
ئەوەند نۊشا ئاو پەیاپەی جەو دەم
بەتنش چوون سەراو تەوقیا وە هەم
ساتێ وە سەڎ لەون فەریاد مەکەردش
ئەو هەم تا مەنزڵ وە دوزەخ بەردش
پەنجەمین وەلید پلیدی مردار
ئیبنی موغەیرە لەعینی بەڎکار
یەک ڕۊ وە خەیاڵ عەزەم نیازی
ڕاش کەوت یەک پەیکان سازی
پەیکان چوون خار شیی وە دامانش
ساقش کەرد وە زام تا ئیستیخوانش
بەعزێ نە عەورەت نەوجا دیار بین
جەو زەخمی پەیکان گرد خەبەردار بین
جە ڕووی تەککەبور هیچ نەکەرد ئەندېش
بەر ناوەرد پەیکان جە دامانی وېش
تا یاوا مەنزڵ وە کام و ناکام
ساقش مەجرووح بیی چەنی ئېشی زام
وە فەریادی بەرز مەناڵا جە دەرد
وڎای محەمەد منش قەتڵ کەرد
جەناگاه قابیز قەبزی ڕۊحش کەرد
ئەو هەم وە کوورەی دوزەخ تەشریف بەرد
هەر پەنج ئەبلەڕەنگ بۍ زیاڎ و کەم
وە ناری دوزەخ واسڵ بین پەی سوم.[1]