#بېسارانی#
دەوای زەعفی دڵ، دەوای زەعفی دڵ
حەکیم نمانا، دەوای زەعفی دڵ
ڕېزەی قەندی بۊس خونچەی دەهەن گوڵ
سایەی پەروەردەی زوڵف بۊ سونبوڵ
جورعەی جە شەربەت مینای مەستی یار
قەترەی جە عەرەق، گوڵی فام ڕوخسار
عەننابی لەبان، شەربەتی لیمۊش
بە شەمعی دیدار باوەری بە جۊش
بە گەرمی ئەو شەمع بەیان نە قەوام
هەم دەفعی زەعفەن، هەم دەوای سەرسام
ماهیی سەقەنقور، سیمی ساقی ساف
مېسقاڵێ جە موشک ئاهۊی خوتەن ناف
پەی دەردەداران هەر ئېدەن عیلاج
چۇبی چینیینەن پەی سەردی میزاج
نوسخەی ئەی دەوا پەرێ ڕۊزگار
نیگاش بداران هەم دڵ، هەم دڵدار
[1]