#وەلی دېوانە#
یاران نەو-وەهار، یاران نەو-وەهار
ئېم ساڵ وە بەختم بېفەڕ نەو-وەهار
ئاما وە دامان کۊچی تەڵمیت بار
هەرچەند نیگام کەرد نەدیم کۊچی یار
خېڵان گشت ئامان وە ژێری دامان
پەخش بین وە دامان بارگەی ئیمامان
نە کۊچی یار بۍ، نە دەنگی یاران
وەهار وەنەم بی وە ژاری ماران
هەر گوڵ جە ڕەنگێ بەرئاما جە خاک
ئەوان گوڵخەندان من دیدە نمناک
هەر غونچە وەنەم بی وە پەیکانێ
هەر گوڵێ وە نېش خاری هېجرانێ
هەر لالە داخێن وە سەد هەزار داخ
داخ مەنیا وە دڵ حەسرەتکېشم ئاخ
سونبوڵ چۇن فېشتەر نېش مەدۊم نە دڵ
تېژتەرەن جە خار نە پام بەرگی گوڵ
نەرگس مەوینۊ ئەندۊم بەرز مەبۊ
وە جەستەم قەقنەس … تەرز مەبۊ
سۊسەنان زوان تانەکېشان لێم
جە داخ دۇری دۇر وڵاتان وېم
سەیر چەمەن لێم چۇن ژاری مارەن
هەر ئېد مەژنەۇن ماچان وەهارەن
پەی چی جە دۇری شای شەم جەمینم
ها وەختەن بەرشۊ گېیانی شیرینم
یاران هامسەران سا چۇن مەبۊ چۇن
من «تەبەس» جامەن «شەم» کەوت ئەو سەر تۇن
[1]