باخچێوە بېگەرد
نویستەی: میزا ئۆلقاڎرو پاوەی
بەشۍ سەڎ و چل و چوارەمە
دمای یەرۍ ساڵا جە کوششی پەنهانی پەی یاونای پېخامەکەیش، پېخامئاوەرو ئیسلامی نبوەتو وېش ئاشکرا کەرد، لوانە دلۍ جەنگێ سەرەمڕەی چەنی کافر و دوە ڕوەکا.
شای خەتمی پەناه، سالاری سەروەر
دەسگیری دنیا، شەفیعی مەحشەر
بەحسی نبوەت هەر پەنهان مەکەرد
وە مەخفی دەعوەت، ساڵ وە سەر مەوەرد
سدیقی ئەکبەر، ڕازیی بۊ حەقق لېش
تەکلیفش مەکەرد بە یارانی وېش
دایېم پەنهانی هەر شەب، تا بەشام
مەوانا بە شەوق داستانی ئیسلام
سێ ساڵ وەی نەفەس تەمام گرد وېیەرد
خەیلێ کەس نە ڕای هیدایەت ئاوەرد
حەزرەت، نبوەت، وېش ئاشکار کەرد
پەنا هەم بە زات پاک ئەقدەس بەرد
دەس کەرد وە تەبلیغ دەعوەتی یاران
سەڎای بوزورگیش، وېیەرد جە شاران
هەر ساڵ دوو سێ کەس موسوڵمان مەکەرد
گومڕاهان نزای هیدایەت ئاوەرد
ئەوەڵجار موشریک تایفەی کوففار
هیچ کەس جە قەولش نمەکەرد ئینکار
گاه گاه وەلاشان تەشریف مەبەردش
پەرێ ئیمتیحان گوزەر مەکەردش
مەواتەن ئەی شەخس گردین بیی ڕاغیب
ئیبنی عەبدوڵڵا عەبدولموتەلیب
ئەمری عەزیمی گرتەنش نەوەر
جە ئاسمانان مدەران خەبەر
چەو دەم خوداوەند تاکی تەنیای فەرد
بت وە بتپەرست یەکسەر مەعیوب کەرد
فەرما کافران دوزەخ جاشانەن
شەیتانی لەعین ڕەهنماشانەن
چەو دەم موشریکان گومڕای بۍ خەبەر
یەکسەر بیین دوشمەن گرووی پېغەمبەر
قەبیلەی قوڕەیش حەسەد مەبەردەن
یەکسەر تەمەڼای قەتڵش مەکەردەن
نەقڵەن جە حەزرەت عائیشەی ئەنوەر
ئومەلمومنین سەدیقەی سەروەر
ئەو هەم جە حەزرەت ڕوایەت کەردەن
پەوکەی ئاشکار تەمام بۍ پەردەن
فەرما چوون داشتەم یەک هامسایەی بەد
بەریی جە ئیمان جە گرد مەزهەب ڕەد
حەزرەت بەو حەیا هەر بەو نەرمەوە
بەو لەفزی شیرین هەر بەو شەرمەوە
مەواتەن: ئەی قەوم بن عەبدولمەناف
دڵ جە هامسایی وېتان بکەن ساف
زوڵمی کافران یاوا بە غایەت
ڕاویی هەم وەیتەور کەردەن ڕوایەت
واتش: یەک تۊبەت مەگېڵام دڵخواز
دیم حەزرەت جە تاف مەوقی زیلحیجاز
من موعامەلەی ئەشیا مەکەردم
ئیبرازیمەم بۍ چەنی ئەو مەردم
حەزرەت حوللەسەوز جە تەدارەک
وستەبۍ وە بان دۊشی موبارەک
وات: ئەی مەخلووق حەقق ئېدەن وەڵڵا
نییەن غەیر جە(لا الاهە الاڵڵا).[1]