#وەلی دېوانە#
مەولای لاڵشناس، مەولای لاڵشناس
مەولەوی ئەولەوی دانای لاڵشناس
هەیاسی دوڕناس ئەسڵ و نەسەب خاس
نەژادی پاکان، «نظامی» قېیاس
«فیردەوسی طۇسی»، «جامی» مڵک جام
«خاقانی» خەیاڵ، «ئەنوەر»ی ئەییام
«سەعدی» سوخەندان بەحری مەعانی
«حافظ»ی (شیراز) «صائب»ی سانی
بەتای بېهەمتای قەییومی بېچۇن
هەمتای تۊ کەمەن نە ڕۇی دەوری دۇن
شەوکەت خۇشەچین پەیدای مەعناتەن
عیسمەت نە ئەوساف سیفاتت ماتەن
مەولانا «زەهیر»، «فارابی»ی دەور
فوزەلای فازېڵ نادرەی وەش تەور
هەنی چەند شەعرای ئاسف نیشانان
دەرس نە مەدرەسەی عېلمی تۊ وانان
غەواصی موحیت دەریای عولۇمی
شیعری مەسنەویت، مەر «مەولای ڕۇمی»
تۊ شاڵڵا هەنی پایەت بۊ زېیاد
من چېشم کە نام من ئاری وەیاد
غەرەز هەر ئېدەن بوزورگیت کەردەن
نامی بەندەی وېت وەیاد ئاوەردەن
ئەڵبەت وېت وەحاڵ پەشېویم زانان
جە ڕۇی ئېلتیفات نامەت کېیانان
کەردەنت ئېزهار، مەولای کەرەم سەیل
تۊ ساحېب لوتفی یەعنی من بېمەیل؟
من قەسەم وە زات ئەو کەس یەگانەن
دایېم نام تۊم ویردی زوانەن
هەر چەند وە خدمەت تۊ ئاشنا نیم
بەڵۍ جە فېکرت ساتێ غافڵ نیم
دڵ پەروانەوار جە شەو تا وە ڕۊ
هەر ها نە خەیاڵ وەسڵ و دېیەن تۊ
من کە هامتەرکیب عومرم نامی تۊن
نیشاتی زەینم کۊی کەلامی تۊن
نادیدە حوببت جا گېرتەن نە دڵ
هەرگیز جە سەودات دڵ نېیەن غافڵ
کەلامت سەرمەشق ئینشای زەینمەن
نامت بینایی هەر دۇ عەینمەن
(لاتەشبېﮪ) چۇن «وەیس» ڕمۇدەی «ڕەسۇڵ»
هەر هام نە تەحسیل وەسڵت کەم وسۇڵ
نەوا بواچی جەو زامن دۇریم
دېوانە بەندەی مەولای «ڕەنجۇری»م
[1]